اقمولا وبلىسىنىڭ اكىمى كوكشەتاۋداعى قازاق مۋزىكالىق- دراما تەاترىنىڭ ۇجىمىن 20 جىلدىعىمەن قۇتتىقتادى - فوتو
«وسىدان تۋرا 20 جىل بۇرىن وسى ونەر وشاعى قۇرىلدى. قانشاما جۇمىستار اتقارىلدى، ءبارى ويداعىداي ورىندالىپ بۇگىندە تەاتر ءبارىمىزدىڭ ماقتانىشىمىزعا اينالدى. ول كەز وتە قيىن كەزەڭ بولاتىن، ويتكەنى كوكشەتاۋلىق تەاترعا بۇكىل رەسپۋبليكادان تاجىريبەلى ارتىستەر ىزدەگەن ەدىك. وسى وتكەن كەزەڭ ارالىعىندا ءبىزدىڭ تەاترمەن بىرگە كوپتەگەن مادەني قايراتكەرلەردىڭ، ونەر سۇيەر قاۋىمنىڭ جاڭا لەگى دۇنيەگە كەلدى.
ارينە، سىزدەردىڭ ءارقايسىلارىڭىز جالپى ءوڭىردىڭ، ەلىمىزدىڭ قوعامدىق- مادەني ءومىرىن دامىتۋعا وراسان ۇلەس قوستىڭىزدار. بۇگىنگى مەرەيتوي كۇنى مىقتى دەنساۋلىق، وتباسىلىق باقىت، شابىت جانە ساتتىلىك تىلەيمىن»، - دەدى وبلىس اكىمى.
ءوز كەزەگىندە تەاتر جەتەكشىسى مارال جاقىپوۆا وبلىستىق تەاتردىڭ قول جەتكىزگەن جەتىستىكتەرىن ايتىپ بەردى. تەاتر وسى جىلدار ىشىندە ءتۇرلى جانرداعى 111 درامالىق شىعارمانى ساحنالاعان. وتاندىق شىعارمالارمەن قاتار شەت ەلدىك، الەمدىك دراماتۋرگيا دا قامتىلىپ كەلەدى. تەاتر اكتەرلەرىنىڭ ساحنالىق شەبەرلىكتەرىن تەاتر فەستيۆالدەرىندە العان ماراپپاتارىنان كورۋگە بولادى. تەاتر ترۋپپاسى وننان استام رەسپۋبليكالىق، بەس حالىقارالىق تەاتر فەستيۆالدەرى مەن فورۋمدارىنا قاتىسىپ، «ەڭ ۇزدىك قويىلىم»، «ەڭ ۇزدىك اكتەرلىك انسامبل»، «تاريحي تاقىرىپتى ءساتتى يگەرگەنى ءۇشىن»، «تاريحي تۇلعانى ۇلىقتاعانى ءۇشىن»، «ەڭ ۇزدىك ەر ادام ءرولى ءۇشىن» ت. ب. نوميناتسيالار بويىنشا ماراپاتتالعان.
ونان كەيىن تەاتر باسشىسى ۇجىمنىڭ الداعى جوسپارلارىمەن ءبولىسىپ، ونەر وشاعىنىڭ ءجۇرىپ وتكەن جولى تۋرالى «تاۋەلسىز ەل - تەاتر تاريحىندا» دەپ اتالاتىن سۋ جاڭا كىتاپتى سىيعا تارتتى.
ەسكە سالا كەتسەك، شاحمەت قۇسايىنوۆ اتىنداعى وبلىستىق قازاق مۋزىكالىق- دراما تەاترىنىڭ مەرەيتويلىق ءىس- شاراسى قازاقستان رەسپۋبليكاسى تاۋەلسىزدىگىنىڭ 25 جىلدىعى اياسىندا وتۋدە.
اۆتور: اسلان وسپانوۆ
