جاپونيا سىرتتان كەلگەن تۋريستەر سانىن 20 ميلليونعا دەيىن قالاي ۇلعايتپاق؟
بۇل كورسەتكىشكە كۇنشىعىس ەلى 2020 -جىلعا قاراي قول جەتكىزبەك.
ول ءۇشىن ۇكىمەت ەلگە كىرۋ رەجيمىن جەڭىلدەتىپ، اۋەجايلار مەن كورىكتى ورىندار ارالىعىندا قاتىنايتىن تەگىن اۆتوبۋستاردى ىسكە قوسۋدى جوسپارلاپ وتىر.
بۇدان بولەك، Duty Free سياقتى دۇكەندەر سانىن ارتتىرۋ قاراستىرىلعان. جاپونيا ۇكىمەتى ەكونوميكالىق توقىراۋدان شىعۋ ءۇشىن 2013 -جىلى ارنايى ستراتەگيا قابىلدادى. بۇل قۇجاتتا ءتۋريزمدى جان- جاقتى وركەندەتۋ دە قاراستىرىلعان.
قازىرگى تاڭدا كۇن شىعىس ەلى تۋريستەر ءۇشىن تارتىمدى مەملەكەتتەردىڭ بىرىنە اينالىپ وتىر. بۇعان ۇلتتىق ۆاليۋتا يەننىڭ ارزانداۋى دا سەپ بولسا كەرەك.
ياۋ شانديىڭ، قىتاي تۇرعىنى:
- ءبىز ەندى عانا توكيوعا كەلىپ قوندىق. قاي جەرگە بارساڭ دا، مۇندا ءبارى ارزان. ساپالارى دا جوعارى.
تۋريستەر ءۇشىن تارتىمدىلىعى جاعىنان جاپونيا ەكى جىل بۇرىن 27-ورىنعا يە بولعان. ۇكىمەت الداعى 5 جىلدا بۇل كورسەتكىشتى 12 ساتىعا كوتەرۋدى جوسپارلاپ وتىر. ول ءۇشىن ۆيزا بەرۋ رەجيمىن جەڭىلدەتۋ قاراستىرىلعان. بۇگىننىڭ وزىندە وڭتۇستىك- شىعىس ازيانىڭ 11 ەلىنىڭ حالىقتارى بۇل مەملەكەتكە ءبىر عانا تولقۇجاتپەن كىرە الادى. ەندى وسى ءتىزىمدى ۇلعايتۋ كوزدەلگەن. سونداي-اق شەنەۋنىكتەر ينتەرنەتتى تەگىن قىلىپ، eDutyFre دۇكەندەرىن كوپتەپ اشپاق.
يچيرو تاكاحاشي، جاپونيانىڭ تۋريزم بويىنشا اگەنتتىگى ءبولىمىنىڭ ديرەكتورى:
- الەمنىڭ 200 مىڭ جەرىندە تەگىن سىمسىز ينتەرنەتكە قوسىلۋعا مۇمكىندىك تۋادى. ول ءۇشىن ءبىر رەت تىركەلسە بولعانى.
ساياحاتشىلار ءۇشىن جاعىمدى جاڭالىقتار بۇنىمەن شەكتەلمەيدى. جاپونيادا كولىكتى جالعا الۋ ءتىپتى وڭايعا تۇسپەك. بۇل ءبىر. ەكىنشىدەن، اۋەجايلار مەن ساۋدا ورتالىقتارىنىڭ اراسىندا تەگىن اۆتوبۋستار قاتىنايدى. ۇشىنشىدەن، دەمالىس ورىنداردا ءبىر ەمەس، بىرنەشە تىلدە قىزمەت كورسەتىلەدى. تۋريستىك جەرلەر مەن شيپاجايلار تۋرالى اقپاراتتار دا كوبەيەدى.
يچيرو تاكاحاشي، جاپونيانىڭ تۋريزم بويىنشا اگەنتتىگى ءبولىمىنىڭ ديرەكتورى:
- بىلتىر تۋريستەر جاپونيادا 2 تريلليون يەن اقشا جۇمسادى. 2020 -جىلعا قاراي ءبىز بۇل كورسەتكىشتى 4 تريلليون يەنگە دەيىن ۇلعايتۋىمىز كەرەك. ول ءۇشىن باج سالىعىنسىز ساۋدامەن اينالىساتىن دۇكەندەردىڭ سانىن ارتتىرامىز.
ەندى سانداردى سويلەتسەك. الەمدىك ىشكى جالپى ءونىمنىڭ %9,5 ىن تۋريزم مەن ساياحات قۇرايدى. ونىڭ %2 ى جاپونيانىڭ ەنشىسىندە. دەمەك بۇل سالانىڭ وسى ەلدەگى بولاشاعى زور، - دەيدى ماماندار. بىلتىر كۇنشىعىس ەلىنە كەلگەن تۋريستەردىڭ سانى 10 ميلليونعا جەتكەن.
www.24.kz
