تەڭىز كەنىشىندە 20 مىڭ جۇمىس ورنى اشىلادى
كومپانيا اتىراۋ وبلىسىندا مۇناي قۇرامىنداعى ىلەسپە گاز، كۇكىرت سەكىلدى قوسپالاردى تازارتۋعا ارنالعان جاڭا زاۋىت تۇرعىزۋدى جوسپارلاپ وتىر.
ەگەر جوبا جۇزەگە اساتىن بولسا، 20 مىڭ جۇمىس ورنى اشىلماق. تەڭىز كەنىشىندە بوي كوتەرەتىن بۇل زاۋىت مۇناي تازارتۋعا ارنالعان ءۇشىنشى كاسىپورىن بولادى. ال تەحنولوگياسى جونىنەن الەمدەگى ەڭ وزىعى.
جوبا جۇزەگە اسقاندا كومپانيا جىلدىق مۇناي ءوندىرىسىن قازىرگى 24 ميلليوننان 36 ميلليون تونناعا جەتكىزۋدى كوزدەيدى. ارينە، الەمدىك نارىقتاعى كومىرسۋتەگى شيكىزاتى باعاسىنىڭ قۇلدىراۋى «تەڭىزشەۆرويل» كومپانياسىن دا اينالىپ وتكەن جوق. سوعان قاراماستان، كومپانيا جوبانى جولدا قالدىرماۋعا جۇمىلۋدا.
- بۇگىندە تەڭىزدە قۇرىلىس الاڭىن دايىنداۋ جۇمىستارى قولعا الىنۋدا. اتاپ ايتقاندا بولاشاق زاۋىتقا ينجەنەرلىك جۇيە تارتۋ، ۆاحتالىق كەنتتىڭ قۇرىلىسى ءجۇرىپ جاتىر جانە «پرورۆا» جارتى ارالىنان تەڭىز پورتىنىڭ قۇرىلىسى باستالدى، - دەدى كومپانيانىڭ ستراتەگيالىق جوسپارلاۋ جانە تالداۋ ءبولىمىنىڭ باسشىسى مۇرات مۇڭبايەۆ.
جوبانى جۇزەگە اسىرۋدىڭ العاشقى كەزەڭىنە كومپانيا 1 ميلليارد ا ق ش دوللارى كولەمىندە قارجى بولگەن. ەندى قۇرىلىس جۇمىستارىن جۇرگىزەتىن جانە زاۋىت قوندىرعىلارىن قۇراستىراتىن مەردىگەرلەر انىقتالۋدا. بۇگىندە ىرگەتاسى قالانىپ جاتقان ۆاحتالىق كەنتتىڭ قۇرىلىسىنا كومپانيا 450 ميلليون ا ق ش دوللارى كولەمىندە قارجى قاراستىرعان. ونىڭ قۇرىلىسىندا 2 مىڭعا تارتا ادام ەڭبەك ەتىپ جاتىر.
بۇل ارادا ەڭ ماڭىزدىسى - تەڭىزدەگى وندىرىستە 20 مىڭ جۇمىس ورنى اشىلادى. ونىڭ 15 مىڭى جوبا قۇرىلىسىنا قاتىستىرىلسا، قالعان 5 مىڭ ادام كومپانيانىڭ ءتۇرلى تاپسىرىستارىن ورىندايتىن بولادى. اتالعان جوبانىڭ تەڭىز مۇنايىن يگەرۋ كولەمىن ارتتىرۋمەن قاتار جالپى ەلىمىز بويىنشا جاڭا جۇمىس ورىندارىنىڭ اشىلۋىنا دا يگى ىقپالى بولماق.
قازىردىڭ وزىندە پاۆلودار، سولتۇستىك قازاقستان جانە شىعىس قازاقستان وبلىستارىنداعى وتاندىق كومپانيالار زاۋىت قۇرىلىسىنا قاتىسۋعا تاپسىرىس بەرگەن. بۇل ءوز كەزەگىندە تەك اتىراۋ وبلىسىنىڭ عانا ەمەس، بۇكىل قازاقستان ەكونوميكاسىنىڭ دامۋىنا زور مۇمكىندىك بەرەتىنى انىق.
