قازاقستاندا شەنەۋنىكتەرگە قۇنى 20 مىڭ تەڭگەدەن اساتىن سىيلىق الۋعا تىيىم سالىنادى - باسپا سوزگە شولۋ
***
شىعىس قازاقستان وبلىسىنىڭ اكىمى دانيال احمەتوۆ ءوڭىر جۇرتشىلىعى الدىنداعى العاشقى ەسەپتىك كەزدەسۋىن وتكىزدى. وسى جايت ارقاۋ بولعان ماقالا «ەگەمەن قازاقستان» گازەتىنىڭ سەنبىلىك سانىندا «ءوڭىردى وركەندى ىستەر كۇتىپ تۇر» دەگەن تاقىرىپپەن بەرىلگەن. باسىلىمنىڭ جازۋىنشا، د. احمەتوۆ الدا اتقارىلاتىن جۇمىستار «نۇرلى جول» جاڭا ەكونوميكالىق ساياساتىنىڭ اياسىندا جۇزەگە اسىرىلاتىنىن اتاپ ءوتتى.
ەكونوميكالىق ءوسىمنىڭ تۇراقتىلىعىن قامتاماسىز ەتۋگە باعىتتالعان باعىت- باعدار جۇمىسپەن قامتۋدى جولعا قويۋ ارقىلى ناتيجەلى. بۇل رەتتە ەلباسى تاپسىرماسىنا سايكەس، ءبىرىنشى كەزەكتە جول قۇرىلىسى جۇرگىزىلەدى.
قازىر وبلىس اۋماعىنداعى «استانا- وسكەمەن» ماگيسترالىنىڭ 118 شاقىرىمى جوندەلدى. بيىل وسى جولدىڭ 53 شاقىرىمىن جوندەۋ جانە «الماتى- وسكەمەن» ماگيسترالىن جوبالاۋدى اياقتاۋ قاراستىرىلىپ وتىر. ونى ىسكە اسىرۋ ناتيجەسىندە 2020 - جىلعا قاراي اۆتوكولىك تاسىمالىن 1,5 ەسەگە ارتتىرۋ جانە 2 مىڭ جۇمىس ورنىن قۇرۋ كوزدەلگەن.
«وبلىس اكىمى تۇرعىن ءۇي قۇرىلىسىن جانداندىرۋعا اعىمداعى جىلى ەرەكشە كوڭىل بولىنەتىنىن جەتكىزدى. بيىل جالپى الاڭى 367 مىڭ شارشى مەتردى قۇرايتىن 1468 ءۇي سالىنادى. 31,7 ميلليارد تەڭگەنى قامتيتىن قۇرىلىس بارىسىندا 39 كوپپاتەرلى تۇرعىن ءۇي بوي كوتەرەدى.
جىل سوڭىنا دەيىن 19 كوپپاتەرلى ءۇي مەن 1429 جەكە ءۇي پايدالانۋعا بەرىلەدى. ناتيجەسىندە 3 مىڭعا تارتا جۇمىس ورنى قۇرىلىپ، 8 مىڭ ادام باسپانالى بولادى دەپ كۇتىلۋدە»، - دەپ جازادى باسىلىم.
«ەگەمەن قازاقستان» گازەتىنىڭ جازۋىنشا، كەشە پرەمەر-ءمينيستردىڭ ورىنباسارى بەردىبەك ساپاربايەۆ پاۆلودار وبلىسىنا بارعان جۇمىس ساپارى بارىسىندا كاسىپتىك- تەحنيكالىق كادرلاردى دايىنداۋ بويىنشا ۇلتتىق كەڭەستىڭ سەلەكتورلىق وتىرىسىن وتكىزدى. وتىرىسقا قاتىسۋشىلار دۋالدى ءبىلىم بەرۋ جۇيەسىن ەنگىزۋ، كوللەدجدەردى ءىرى كومپانيالاردىڭ باسقارۋىنا بەرۋ، سونداي-اق ەڭبەك نارىعىنىڭ كادرلارعا دەگەن سۇرانىسىن بولجاۋ ماسەلەلەرىن قىزۋ تالقىلادى. باسىلىمنىڭ جازۋىنشا، ەلىمىزدەگى كاسىپتىك- تەحنيكالىق كوللەدجدەردىڭ تەك 8 پايىزى عانا دۋالدى جۇيە بويىنشا ءبىلىم بەرەدى ەكەن. بۇل ماسەلەگە قاتىستى ۇلتتىق كاسىپكەرلەر پالاتاسى ءتوراعاسىنىڭ ورىنباسارى نۇرجان التايەۆ ءوز ويىن بىلدىرگەن.
ونىڭ ايتۋىنشا، كوللەدجدەردىڭ وقىتۋ ۇدەرىسى كەي كەزدە كاسىپورىنداردىڭ تالاپ- ۇدەسىنەن شىقپاي جاتادى. جالپى، كاسىپكەرلەر تاراپىنان قىزىعۋشىلىق جوق ەمەس. ماسەلەن، بىلتىرعى جىلى 13 مىڭ مامان دايىنداۋعا 666 ءوتىنىش تۇسكەن. «جالپى، 2014 - جىلى كاسىبي- تەحنيكالىق مامانداردى دايىنداۋعا مەملەكەت تاراپىنان 96 ميلليارد تەڭگە قارجى بولىنگەن. قارجىلاندىرۋ جىل وتكەن سايىن ءوسىپ وتىرادى. تەك جەرگىلىكتى بيلىكتەگىلەر بۇل جۇمىستى قاتاڭ باقىلاۋعا الۋ كەرەك»، - دەدى بەردىبەك ساپاربايەۆ. ماقالا «كاسىپتىك ءبىلىمنىڭ كەلەشەگى زور» دەگەن تاقىرىپپەن بەرىلگەن.
***
قازاقستاندىق شەنەۋنىكتەرگە قۇنى 20 مىڭ تەڭگەدەن اساتىن سىيلىق الۋعا تىيىم سالىنادى. بۇل رەتتە ناقتىلاي كەتەتىن ءبىر جايت بار، مەملەكەتتىك شەنەۋنىك سىيلىقتى العانىمەن، ءبىر اپتانىڭ ىشىندە ونى ەش قورىقپاستان مەملەكەت مەنشىگىنە وتكىزۋگە مىندەتتى. بۇل جايىندا «ەكسپرەسس ك» گازەتىنىڭ بۇگىنگى سانىنداعى «دارەنومۋ وسلۋ ۆ ۋشي نە زاگليادىۆايۋت» دەگەن تاقىرىپتاعى ماقالادا باياندالعان. «سىيلىققا» قاتىستى باپ 2016 - جىلى قابىلدانۋى ءتيىستى «جەمقورلىققا قارسى تۋرۋ» زاڭ جوباسىندا قاراستىرىلعان.
اتالعان قۇجاتتا ءبىزدىڭ لاۋازىمدى تۇلعالارعا وزدەرىنىڭ قىزمەتتىڭ مىندەتتەرىن ورىنداۋ بارىسىندا نەمەسە رەسمي قابىلداۋلاردا جالپىعا قابىلدانعان نورماعا سايكەس كادەسىيلار الۋعا رۇقسات ەتۋ كوزدەلگەن. دەگەنمەن، تارتۋدىڭ قۇنى 10 ايلىق ەسەپتىك كورسەتكىشتەن اسپاۋى ءتيىس.
***
«وسكەمەندەگى 12- مەكتەپتىڭ 12 جاستاعى وقۋشىسى كيريلل پوپوۆتىڭ «رەجيسسەرلىك» تىرناقالدى تۋىندىسى داۋ- داماي تۋىنداتۋى مۇمكىن»، - دەپ جازادى «ۆرەميا» گازەتى. جەتكىنشەك ءوزىنىڭ ۇيالى تەلەفونىمەن سىنىپتاعى توبەلەستى ءتۇسىرىپ، ونى عالامتورعا سالىپ جىبەرگەن. بەينەروليكتەن اۋىزىنان اق ءيت كىرىپ، كوك ءيت شىققان «جاس رەجيسسەر» سىنىپتاستارىن جابىرلەگەندىگىن انىق بايقاۋعا بولادى. وسىدان كەيىن ءجابىر كورگەن بالالاردىڭ اتا- انالارى كىشكەنتاي بۇزاقىنىڭ تۋعان- تۋىستارىن سوتقا بەرۋگە شەشىم قابىلداعان.
اۆتور: مارلان جيەمباي
