ەلشى ءماجىلىس دەپۋتاتتارىن تۇرىكمەنستاننىڭ بەيتاراپ ەل اتانۋىنىڭ 20 جىلدىعىنا قاتىسۋعا شاقىردى
تاراپتار ەكى جاقتى ىنتىماقتاستىقتىڭ اۋقىمدى ماسەلەلەرىن تالقىلاي كەلىپ، وتىن-ەنەرگەتيكالىق سالا، اۋىل شارۋاشىلىعى، كولىك جانە كوممۋنيكاتسيا باعىتتارىنا ايرىقشا نازار اۋداردى.
سونداي-اق قازاقستاندىق-تۇركىمەندىك قارىم-قاتىناس دەڭگەيىنە جوعارى باعا بەرىپ، ونىڭ تۇراقتى دامۋىنا ەكى ەل باسشىلارىنىڭ سەرپىن بەرىپ كەلە جاتقانىن العا تارتتى.
ءماجىلىس سپيكەرى الەمدىك ەكونوميكادا بولىپ جاتقان عالامدىق ۇدەرىستەردى نازار اۋدارا كەلە، قازاقستان پرەزيدەنتىنىڭ داعدارىستىڭ جاعىمسىز ىقپالىنا قارسى باعىتتالعان ماڭىزدى باستامالارىن اتاپ ءوتتى.
ءوز كەزەگىندە مەيمان نۇرسۇلتان نازاربايەۆتىڭ كورەگەن ساياساتىنا جەتە ءمان بەردى.
پارلامەنتارالىق بايلانىستاردى نىعايتۋعا دا ايرىقشا كوڭىل ءبولىندى. قابيبوللا جاقىپوۆ ءوزىنىڭ تۇركىمەندىك ارىپتەسىنە اعىمداعى جىلى كۇزدە استانادا وتەتىن تۇركى تىلدەس مەملەكەتتەر پارلامەنتتىك اسسامبلەياسىنىڭ التىنشى پلەنارلىق وتىرىسىنا قاتىسۋ ءۇشىن قازاقستانعا كەلۋگە شاقىرۋ جولدادى.
ماگتىمگۋلى اكمىرادوۆ ءماجىلىس دەپۋتاتتارىن بيىل مەرەيتويلىق جىل اياسىندا اشحابادتا وتەتىن تۇركىمەنستاننىڭ بەيتاراپ ەل اتانۋىنىڭ 20 جىل تولۋىنا ارنالعان شارالارعا قاتىسۋعا شاقىردى.
وسى رەتتە تاراپتار ەكى ەل ءۇشىن دە ماڭىزدى 2015-جىل قوس مەملەكەت حالىقتارىنىڭ قارىم-قاتىناسىن نىعايتۋعا جاڭا مۇمكىندىكتەر اشاتىنىنا سەنىم ءبىلدىردى، دەپ حابارلادى ءماجىلىستىڭ باسپا ءسوز قىزمەتى.
