قىزىلوردا ىشكى ىستەر دەپارتامەنتىندە 20 عا جۋىق وزگە ۇلت وكىلدەرى قىزمەت ەتەدى
تۋعان ەلىنىڭ تۋىنىڭ استىندا بىرىگىپ، تۋعان جەردىڭ تۇعىرىن بيىك ەتۋگە بەل شەشكەن ولار پەرزەتتىك پارىزدارىن لايىقتى وتەپ كەلەدى. وزىنە جۇكتەلگەن قىزمەتتىك مىندەتتەرىن ادال ورىنداعانى ءۇشىن ق ر ىشكى ىستەر مينيسترلىگىنىڭ، ىشكى ىستەر دەپارتامەنتى باستىعىنىڭ العىس حاتتارى مەن قۇرمەت گراموتالارىنىڭ بىرنەشە مارتە يەگەرلەرى اتانعان. بارلىعى دەرلىك قازاقستان رەسپۋبليكاسىنىڭ مەملەكەتتىك ءتىلىن تولىق مەڭگەرىپ، جۇمىس بارىسىندا دا، كۇندەلىكتى تۇرمىستا دا ءبىر ادامداي قازاق تىلىندە ەركىن قارىم-قاتىناس جاساي الادى.
جىل سايىن «تىلدەردى وقىتۋدىڭ وڭىرلىك ورتالىعى» ۇيىمداستىراتىن مەملەكەتتىك ءتىلدى وقىتۋ كۋرسىنا قاتىسىپ، بىلىكتەرى مەن بىلىمدەرىن جەتىلدىرۋدە. ق ر پرەزيدەنتى نۇرسۇلتان نازاربايەۆ قازاقستان حالقى اسسامبلەياسىنىڭ XII سەسسياسىندا «ءوزىن قازاقستاننىڭ ازاماتى سانايتىن كەز كەلگەن ادام، كەز كەلگەن ۇلتتىڭ وكىلى بارلىق وركەنيەتتى ەلدەردەگىدەي مەملەكەتتىك ءتىلدى مەڭگەرۋگە ۇمتىلۋى ءتيىس»، - دەپ ءوز ۇندەۋىن جەتكىزدى ەمەس پە؟! مىنە، ءتىلدى يگەرۋدى ازاماتتىق ۇستانىمى، قۇشاعىن ايقارا اشقان قازاقستان الدىنداعى پەرزەنتتىك پارىزى سانايتىن ءى ءى د قىزمەتكەرلەرى ەلباسىنىڭ ءسوزىن جۇزەگە اسىرۋدا.
سونىمەن قاتار، ىشكى ىستەر ءمينيسترىنىڭ قولداۋىمەن جىل سايىن ۇيىمداستىرىلاتىن مەملەكەتتىك ءتىل ساياساتىن كەڭىنەن ناسيحاتتاپ، ءتارتىپ ساقشىلارىنىڭ قوعامداعى وڭ يميدجىن قالىپتاستىرۋ، مەملەكەتتىك ءتىلدى قۇرمەتتەۋ، مارتەبەسىن ارتتىرۋ، پاراساتتىلىق رۋحىن كوتەرۋگە باعىتتالعان «پاراساتتى پوليتسەي» اتتى بايقاۋعا ۇنەمى قاتىسۋدا. اسىرەسە، قازالى اۋداندىق ىشكى ىستەر ءبولىمى يۋۆەنالدى پوليتسيا باسقارماسىنىڭ تەرگەۋشىسى تەن اينۇر، وبلىستىق ىشكى ىستەر دەپارتامەنتى كوشى-قون پوليتسيا باسقارماسىنىڭ ينسپەكتورى ۋگاي بوريس، قالالىق ىشكى ىستەر باسقارماسىنىڭ انىقتاۋشىسى فەدورۋك ۆلاديمير سىندى قىزمەتكەرلەر ءار وڭىردەن قاتىساتىن پوليتسەيلەرمەن يىق تىرەسە باق سىناسىپ، سىر ەلىنىڭ، ىشكى ىستەر دەپارتامەنتىنىڭ نامىسىن ابىرويمەن قورعاپ كەلەدى. «جىگىتكە جەتى ونەر دە از» دەمەكشى، بارلىعى دەرلىك بىرىنەن-ءبىرى وزعان «سىر ەلى- جىر ەلى» اتانعان قاسيەتتى ولكەنىڭ كيەسى قونعان كۇمىس كومەي، جەز تاڭداي انشىلەرى، قاسيەتتى ونەر يەلەرى. مەملەكەتتىك مەرەكەگە وراي ۇيىمداستىرىلاتىن ءىس-شارالاردا كوپتەن سۋىرىلىپ شىعىپ، كوكەيىڭدى كەرنەپ، پاتريوتتىق سەزىمىڭدى وياتار اندەرىن ارنايتىن دا وسىلار.
«ۇلت تاعدىرىن ۇرپاق شەشەتىنى ايقىن. ءبىرى - قازاقتىڭ قىزىن الىپ كۇيەۋ بالا اتانسا، ءبىرى - قازاقى وتباسىعا ساليقالى كەلىن اتانىپ، قازاقى شاڭىراقتىڭ ءتۇتىنىن تۇتەتىپ وتىر. وسى ورايدا، تۇراقتىلىق پەن حالقىمىزدىڭ تىنىشتىعىن كۇزەتىپ، ەلگە قورعان بولىپ جۇرگەن وزگە ۇلتتى اپا-اعالارىمىز بالالارىنا ادەت-عۇرپىمىزدى، قازاقى ءدىلىمىزدى، رۋحاني قۇندىلىقتارىمىزدى بويلارىنا سىڭىرە وتىرىپ تاربيە بەرىپ جاتىر دەگەن سەنىمدەمىز. ويتكەنى ۇلتى قازاق بولماسا دا ءسوزى قازاق، جۇرەگى قازاق باۋىرلارىمىزدان ناعىز ۇلتجاندى، قازاق ەلىنىڭ بولاشاق قورعاۋشىلارى مەن باتىرلارى ءونىپ شىعاتىنى ايقىن»، - دەيدى گ. قايىربەرگەنوۆا.
اۆتور: ەلۋباي اۋەزوۆ
