الماتى وبلىسىندا «20 يگى ءىس» جوباسى باستاۋ الدى
ايماقتاعى ءاربىر ەتنومادەني بىرلەستىك ءدال وسىنشا شارا وتكىزۋى ءتيىس.
وبلىستاعى شەشەن-ينگۋش ورتالىعىنىڭ وكىلدەرى تالدىقورعانداعى كۋردتار قاۋىمداستىعىنىڭ ايماقتىق فيليالىنىڭ مۇشەلەرىمەن بىرگە قاراتال اۋدانىنداعى ۇشكومەي ورتالاۋ مەكتەبىنە باردى.
بۇل كەنتتىڭ نەگىزگى تۇرعىندارى شەشەن جانە كۋرد ۇلىستارىنىڭ وكىلدەرى، سوندىقتان اتالعان ورتالىق ءبىلىم مەكەمەسىن ءوز قامقورلىعىنا الدى.
مەكتەپتە 1-9 - سىنىپتاردا ءبىلىم الىپ جۇرگەن 35 بالا بار. كەيدە ساباقتار قاتار وتكىزىلەدى. ءبىلىم وشاعىنىڭ ماسەلەلەرى از ەمەس، مەكتەپ بولمەلەرىنەن باستاپ، ديداكتيكالىق ماتەريالدارعا دەيىن جەتىسپەۋشىلىگى بايقالادى. اسسامبلەيا مۇشەلەرى بۇل ماسەلەلەردى شەشۋگە كومەگىن كورسەتۋدە. ولار مەكتەپ وقۋشىلارىمەن كەزدەسىپ، كوكتەمگى دەمالىس كەزىندە وبلىس ورتالىعىنا ەكسكۋرسيا ۇيىمداستىرۋدى ۋادە ەتتى.
«وتكەن جىلى بۇل مەكتەپتى ءوز قامقورلىعىمىزعا الىپ، سۋ ماسەلەسىن، مەكتەپتىڭ قورشالۋى پروبلەمالارىن تولىق شەشتىك، قاجەتتى كىتاپتار اكەلدىك»، - دەيدى وبلىستاعى شەشەن-ينگۋش ەتنومادەني بىرلەستىگى باسقارماسى ءتوراعاسىنىڭ ورىنباسارى اسيا يبراگيموۆا.
