ەل ەكونوميكاسىنداعى شاعىن جانە ورتا بيزنەستىڭ ۇلەسى 2050-جىلى 50 پايىزعا جەتۋى ءتيىس - ن. نازاربايەۆ

ەلباسىنىڭ سوزدەرىن ق ر پرەمەر-ءمينيسترىنىڭ ءبىرىنشى ورىنباسارى باقىتجان ساعىنتايەۆ وقىپ بەردى.

«قۇرمەتتى سەزد دەلەگاتتارى! ءبىزدىڭ ەلىمىزدە 1 ميلليون 200 مىڭنان استام كاسىپورىن مەن جەكە كاسىپكەر جۇمىس ىستەيدى. شاعىن جانە ورتا بيزنەس سەكتورىندا 3 ميلليونعا جۋىق ادام ەڭبەكتەنۋدە. رەسپۋبليكانىڭ الەۋمەتتىك جاعدايى ولاردىڭ جۇمىسىنا تاۋەلدى. وتاندىق نارىقتىق ەكونوميكانىڭ نەگىزىن قۇرايتىن كاسىپكەرلىكتى دامىتۋ - قازاقستاننىڭ ستراتەگيالىق باسىمدىعى. ەل ەكونوميكاسىنداعى شاعىن جانە ورتا بيزنەس ۇلەسى 2050-جىلى 50 پايىزعا جەتۋى ءتيىس. العا قويعان بۇل مىندەتكە قول جەتكىزۋ بيزنەس ورتا مەن مەملەكەت كۇشىن بىرىكتىرگەن كەزدە عانا مۇمكىن بولادى»، دەلىنگەن ەلباسى سوزىندە.

سونىمەن قاتار، پرەزيدەنت سوڭعى جىلدارى وتاندىق كاسىپكەرلىككە قولداۋ كورسەتۋ مەن ينۆەستيتسيا تارتۋعا قولايلى شارتتار جاسالىپ جاتقاندىعىن دا تىلگە تيەك ەتتى.

«تەڭدەسسىز شارتتار قۇرىلدى جانە بۇگىنگى نارىقتىق جاعدايدا ماڭىزى ارتىپ كەلە جاتقان جەكە كاسىپكەرلىكتىڭ باستامالارىن قولداۋدى قولعا الۋ قاجەتتىلىگى تۋىندادى. بۇل رەتتە ۇلتتىق كاسىپكەرلەر پالاتاسى ماڭىزدى ءرول اتقارۋى ءتيىس. ول وتكەن جىلدىڭ ىشىندە تۇراقتى تاۋەلسىز ينستيتۋت رەتىندە ءوزىن كورسەتتى جانە بيزنەس قاۋىمداستىق مۇددەسىن قورعاۋدا قىرۋار جۇمىستار اتقاردى. بۇگىنگى كۇنى الەمدىك ەكونوميكادا ىشكى نارىققا اسەر ەتەتىن كۇردەلى ماسەلەلەرگە تاپ بولىپ وتىرمىز. بۇل ءبىر جاعىنان جاڭا مۇمكىندىكتەردى دە تۋىنداتادى. كاسىپكەرلەر پالاتاسى ەلدەگى كاسىپكەرلىكتى ودان ارى دامىتۋعا باعىتتالعان ءتيىمدى شارالاردى جاساۋ ۇدەرىسىنە بەلسەندى تۇردە ارالاسۋدا. بۇل ءوزارا قارىم-قاتىناس الەۋەتى كەز كەلگەن قيىندىقتاردى باستان وتكەرۋگە مۇمكىندىك بەرەدى»، - دەلىنگەن مەملەكەت باسشىسىنىڭ سوزىندە.

اۆتور: جاسۇلان جولدىبايەۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى