2033-جىلعا دەيىن 100 ميلليون توننا رەسەي مۇنايىن تاسىمالداۋ جوسپارلانىپ وتىر - پرەزيدەنت
رەسەي مۇنايىن ەلىمىز ارقىلى تاسىمالداۋ قارقىنى وسە تۇسەدى. بۇل تۋرالى ق ر پرەزيدەنتى قاسىم-جومارت توقايەۆ «يزۆەستيا» گازەتىنە بەرگەن سۇحبات بارىسىندا ءمالىم ەتتى، دەپ حابارلايدى Kazinform.
«قازاقستان مەن رەسەيدىڭ مۇناي سالاسىنداعى ىنتىماقتاستىعى بۇرىننان تابىستى دامىپ كەلەدى. ەلىمىزدە «لۋكويل» جانە «تاتنەفت» سياقتى رەسەيلىك كونتسەرندەر جەمىستى جۇمىس ىستەپ جاتىر. بيىل اقپان ايىندا «قازمۇنايگاز» بەن «لۋكويل» كاسپي تەڭىزىنىڭ قازاقستاندىق بولىگىندەگى «قالامقاس تەڭىز»، «حازار»، «اۋەزوۆ» كەن ورىندارىن يگەرۋ جوباسى بويىنشا ءبىرقاتار كەلىسىم جاسادى»، - دەپ جاۋاپ بەردى مەملەكەت باسشىسى سۇحبات ساۋالىنا.
مەملەكەت باسشىسى ايتقان مالىمەتكە سايكەس وتكەن جىلى «Kazakhstan Petrochemical Industries (KPI)» مۇناي حيمياسى كەشەنىنىڭ قۇرىلىسى اياقتالدى.
ول الەمدە پوليپروپيلەن وندىرەتىن ەڭ ءىرى ون كاسىپورىننىڭ قاتارىنا كىرەدى. اتالعان جوباعا رەسەيلىك «سيبۋر» كومپانياسى دا قاتىسادى.
ودان بولەك، 2022-جىلى ساران قالاسىندا «تاتنەفت» كومپانياسىنىڭ قاتىسۋىمەن اۆتوموبيل دوڭگەلەكتەرىن شىعاراتىن «KamaTyresKZ» زاۋىتى سالىندى.
«ەكى ەلدىڭ اۋماعى ارقىلى تاسىمالداناتىن مۇنايدىڭ ۇلەسى ايتارلىقتاي زور. قازاقستان مۇنايىنىڭ 80 پايىزعا جۋىعى رەسەي اۋماعى ارقىلى (كاسپي قۇبىر جەلىسى كونسورتسيۋمى) سىرتقى نارىققا ەكسپورتتالادى. سول سياقتى رەسەي مۇنايى قازاقستان اۋماعى ارقىلى قىتاي حالىق رەسپۋبليكاسىنا جەتكىزىلەدى. 2033-جىلعا دەيىنگى كەزەڭدە 100 ميلليون توننادان استام رەسەي مۇنايىن تاسىمالداۋ جوسپارلانىپ وتىر»، - دەيدى ق. توقايەۆ.
