شىمكەنت حالقىنا 2030 -جىلعا قاراي جارتى ميلليوننان استام ادام قوسىلادى
جيىنعا بايدىبەك، قازىعۇرت، ورداباسى، سارىاعاش، سايرام، تۇلكىباس جانە تولەبي اۋداندارى مەن شىمكەنت، ارىس قالالارىنىڭ باسشىلارى، ساۋلەت جانە قالا قۇرىلىسى، وبلىستىق باسقارما باسشىلارى قاتىستى، دەپ حابارلايدى قازاقپارات ءتىلشىسى.
جيىندا ءسوز العان رەسپۋبليكالىق مەملەكەتتىك قالا قۇرىلىسىن جوسپارلاۋ جانە كاداستر ورتالىعىنىڭ باس ديرەكتورى تۇرلىبەك مۇسابايەۆ شىمكەنت اگلومەراتسياسىن اۋماقتىق دامىتۋدىڭ ءوڭىرارالىق سحەماسى ازىرلەنگەنىن جەتكىزدى.
«ازىرلەنگەن جوباعا سايكەس شىمكەنت اگلومەراتسياسىنىڭ اۋماعى 1573,5 مىڭ گەكتاردى قۇرايدى. شىمكەنت اگلومەراتسياسىنىڭ اۋماعىندا 1,8 ميلليون تۇرعىنى بار 367 ەلدى مەكەن ورنالاسقان. بۇدان بولەك، 5 مىڭنان استام تۇرعىنى بار 35 ەلدى مەكەننىڭ باس جوسپارى جاساقتالىپ وتىر»، - دەدى تۇرلىبەك تۇرىكپەن ۇلى.
جاڭا جوباعا سايكەس، 2020 -جىلعا قاراي شىمكەنت اگلومەراتسياسىنا جاتاتىن اۋماقتا حالىق سانى 185 مىڭنان استام ادامعا نەمەسە 10,3 پايىزعا ارتىپ، 1986087 ادامدى قۇرايدى دەگەن بولجام جاسالىپ وتىر. ال 2030 -جىلعا قاراي قالاداعى حالىق سانى 534779 عا كوبەيىپ، 2 ميلليون 335 مىڭ 773 ادامدى قۇرايدى دەپ بولجانۋدا.
ازىرلەنگەن جوباعا قانىققان ءوڭىر باسشىسى ءتيىستى سالا باسشىلارىنا وزگەرىستەر مەن ۇسىنىستاردى ەگجەي-تەگجەيلى تاعى دا پىسىقتاپ شىعۋعا تاپسىرما بەردى.
«شىمكەنت قالاسىنىڭ اگلومەراتسياسى وسىعان دەيىن بىرنەشە رەت كەڭ كولەمدە تالقىلانعان بولاتىن. وسى ماقساتتا وبلىسىمىزداعى ءتيىستى باسقارمالار تىڭعىلىقتى جۇمىس جۇرگىزىپ، وزگەرىستەر مەن ۇسىنىستاردى ەنگىزىپ شىقتى. ەندى بۇل جوبامىزدى الداعى جەلتوقسان ايىندا ۇكىمەتتىڭ وتىرىسىنا بەكىتۋگە ۇسىناتىن بولامىز. سوندىقتان اتتەگەن-اي دەيتىندەي ماسەلەلەر بولماۋى ءتيىس»، - دەدى جانسەيىت تۇيمەبايەۆ.
ايتا كەتەيىك، شىمكەنت قالاسىن اۋماقتىق دامىتۋدىڭ ءوڭىرارالىق جوباسىن ق ر ينۆەستيسيالار جانە دامۋ مينيسترلىگىنە قاراستى قۇرىلىس جانە تۇرعىن ءۇي-كوممۋنالدىق شارۋاشىلىق كوميتەتى ازىرلەگەن بولاتىن. اتالعان جوباعا سايكەس كونترماگنيتتەر رەتىندە اۋدانداردىڭ دا اكىمشىلىك ورتالىقتارى انىقتالعان. وڭتۇستىك باعىتىندا - سارىاعاش قالاسى، باتىس باعىتىندا - ارىس قالاسى، شىعىس باعىتىندا - تۇرار رىسقۇلوۆ سەلوسى بولىپ بەلگىلەنگەن.
