2029-2030-جىلدارى ۇلتتىق قوردى 100 ميلليارد تەڭگەگە تولتىرۋ كەرەك - جۇمانعارين
استانا. KAZINFORM - پرەمەر-ءمينيستردىڭ ورىنباسارى - ۇلتتىق ەكونوميكا ءمينيسترى سەرىك جۇمانعارين Kazinform اگەنتتىگىنە ەكسكليۋزيۆتى سۇحبات بەردى. ۆەدومستۆو باسشىسى سالىق رەفورماسىنىڭ ءمانىن ءتۇسىندىردى.
- ءبىز بيۋجەت دامۋىن كوتەرمەسەك، ەشقانداي بولاشاق بولمايدى. كوبى ۇكىمەت، ۇلتتىق ەكونوميكا مينيسترلىگى تەك قانا سالىق رەفورماسىن كورىپ تۇر، سول رەفورما ارقىلى ءوز جاعدايىن جاساعالى جاتىر دەپ ويلايدى. ول - مۇلدەم دۇرىس ەمەس، سەبەبى ءبىرىنشى باعىت - بيۋجەتتىك رەفورما. پرەزيدەنت بيۋجەت كودەكسىنە قول قويدى، شەشىلگەن ماسەلە، - دەدى سەرىك جۇمانعارين اڭگىمە بارىسىندا.
وسى ورايدا مينيستر كەلەسى جىلى پارلامەنتتە باسقا بيۋدجەتتىك جوبا قارالاتىنىن مالىمدەدى.
- سالىق رەفورماسىنىڭ ماقساتى - سالىق فيلوسوفياسىن وزگەرتۋ. ۇكىمەت پەن كاسىپكەرلەردىڭ اراسىندا جاڭا الەۋمەتتىك شارت جاساسۋ، سالىق بازاسىن كوتەرۋ. قارجىلىق جۇيەنى تۇراقتاندىرۋ. سونىمەن قاتار ۇلتتىق قوردان قارجى الۋدى ازايتىپ، ونىڭ كولەمىن 2029-2030-جىلدارى 100 ميلليارد تەڭگەگە دەيىن تولتىرۋ كەرەك، ول - بولاشاق ۇرپاققا قالاتىن قاراجات. داعدارىس باستالسا، ارتىمىزدا تەك ۇلتتىق قور بار، باسقا ەشتەڭە جوق. ءۇشىنشى ماسەلە، ناقتى سەكتوردى قارجىلاندىرۋ. بيىل «بايتەرەك» حولدينگىنىڭ كاپيتالىن 1 تريلليون تەڭگەگە كوتەرىپ، قوسىمشا 8 تريلليون تەڭگە ءبولىپ، ناقتى سەكتوردىڭ بيزنەس جوبالارىنا قاراجات باعىتتاپ وتىرمىز. ءبىزدىڭ دامۋ بيۋجەتىمىز - 2 تريلليون تەڭگە، ءتورت ەسە كوبەيتىپ وتىرمىز، ياعني بۇل - بيۋجەتتەن تىس اقشا تابۋ. وعان قوسىمشا بيىل 1 تريلليون تەڭگەگە اقىلى جولدار سالامىز، 1 تريلليون تەڭگەگە 585 شاقىرىم جاڭا تەمىرجول سالامىز جانە قولدانىستاعى تەمىرجولدار جوندەلەدى. سونىمەن قاتار 19 ميلليون شارشى مەتر تۇرعىن ءۇي سالامىز. بيزنەس جوبالار ءتيىمدى بولسا، العان قارىزدى بيۋجەتكە قايتارىپ بەرەدى، - دەيدى ۇكىمەت باسشىسىنىڭ ورىنباسارى.
ايتا كەتەيىك، 9-ساۋىردە ءماجىلىس سالىق كودەكسىنىڭ جاڭا جوباسىن ءبىرىنشى وقىلىمدا ماقۇلدادى.
سالىق كودەكسىنىڭ جاڭا جوباسى بويىنشا سالىق ەسەبىن تاپسىراتىندار سانى 30 پايىزعا قىسقارادى.
ەسكە سالساق، قوسىلعان قۇن سالىعى سالىناتىن اينالىمنىڭ تومەنگى شەگى 40 ميلليون تەڭگە بولادى.
سونداي-اق سەرىك جۇمانعارين كورپوراتيۆتىك تابىس سالىعىنىڭ مولشەرلەمەسى وسەتىن سالالاردى اتادى.
