الماتى 2026-جىلعى قىسقى وليمپيادا ويىندارىن وتكىزۋگە ۇسىنىس بەردى مە - بايبەكتىڭ جاۋابى

«وزدەرىڭىز بىلەتىندەي، ءبىز جىلدىڭ باسىندا قىسقى ۋنيۆەرسيادانى وتە ناتيجەلى وتكىزدىك. ۋنيۆەرسيادا - وليمپيادانىڭ الدىنداعى وتە اۋقىمدى سپورتتىق سايىس. وعان بارلىعى جوعارى باعا بەردى. بىزدەن كەيىن تايپەيدە بولعان وتىرىستا «الماتى - ۋنيۆەرسيادانى تاريحتا ەڭ كەرەمەت وتكىزگەن قالا» بولعانى تۋرالى ايتىلدى. سوندىقتان، ءبىزدىڭ سايىس وتكىزۋ تاجىريبەمىزدى قازىرگى تاڭدا بارلىعى زەرتتەپ جاتىر»، - دەيدى قالا اكىمى.

ونىڭ ايتۋىنشا، الماتىدا قىسقى سپورت تۇرلەرى ءۇشىن ينفراقۇرىلىمنىڭ ءبارى دايىن. «سول سەبەپتى، مۇمكىن الماتى قىسقى وليمپيادانى وتكىزۋى كەرەك دەگەندى ايتىپ جاتقان كورىنەدى. ءبىراق، مەن سىزدەرگە رەسمي تۇردە ايتا الامىن. الماتى قالاسى 2026-جىلى قىسقى وليمپيادا ويىندارىن وتكىزۋ تۋرالى ءوتىنىم بەرگەن جوق. ءبىراق، بىزدەن «سىزدەردە ءبارى دايىن عوي، ءوتىنىم بەرەسىزدەر مە» دەپ سۇراپ جاتىر. ءبىزدىڭ ا+ ۇلتتىق كومپانياسى ۋنيۆەرسيادانىڭ اشىلۋى مەن جابىلۋىن كەرەمەت جاقسى جاساعان. شەتەلدىكتەر كەلگەن كەزدە «بۇل شارانى كىمدەر وسىلاي ۇيىمداستىردى، امەريكالىقتار ما» دەپ سۇرادى. ءبىز «جوق، ءوزىمىزدىڭ قازاق كومپانياسى» دەپ جاۋاپ بەردىك.

سوندىقتان، شەتەلدىك مەيماندار سايىستىڭ اشىلۋى مەن جابىلۋى وليمپيادا ويىندارىنان كەم بولماعانىن ايتىپ جاتىر. جالپى، ەكسپو، ۋنيۆەرسيادا سەكىلدى شارالاردى وتكىزۋ مەملەكەتكە كوپ تاجىريبە بەرەدى. كەزىندە وليمپيادانى وتكىزگەن توكيو ينفراقۇرىلىمىن سول شارا ارقىلى كوتەرىپ العان. قايتالاپ ايتارىم - الماتى قالاسى بۇل تۇرعىدا ەشقانداي ۇسىنىس بەرگەن جوق»، - دەپ ءتۇيدى باۋىرجان بايبەك.

اۆتور: ايان بەكەن ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى