ەلوردادا 2025 -جىلدان باستاپ كاسىبي تەحنيكالىق ءبىلىم تولىقتاي تەگىن بەرىلەدى
بۇل تۋرالى نۇر- سۇلتان قالاسى ءبىلىم باسقارماسىنىڭ باسشىسى قاسىمحان سەنعازييەۆ ءمالىم ەتتى، دەپ حابارلايدى قازاقپارات ءتىلشىسى.
«ءبىز قازىر ءبىلىم بەرۋدە ۇلتتىق جوباعا سايكەس جۇمىس ىستەپ جاتىرمىز. سونىڭ اياسىندا ەلوردادا 2025 -جىلعا دەيىن كاسىبي تەحنيكالىق ءبىلىم بەرۋدى تولىقتاي تەگىن ەتۋدى جوسپارلاپ وتىرمىز. ارينە، جۇمىس اۋقىمدى بولعاندىقتان بىردەن كوشە المايمىز. سەبەبى ءبىر ساتتە 25 مىڭ استانالىق ستۋدەنتتى تەگىن بىلىممەن قامتۋ مۇمكىن ەمەس. وسى ورايدا ءبىز ەسەپتەي كەلە، بيىل تەگىن كاسىبي تەحنيكالىق ءبىلىم بەرۋگە كوشۋدى 65 پايىزعا، كەلەسى جىلى 70 پايىزدان اسا، ال 2024 -جىلى 80 پايىزدان اسىرماقپىز. 2025 -جىلى تولىقتاي تەگىن ءبىلىم بەرۋگە كوشىرىلەدى»، - دەدى قاسىمحان سەنعازيەۆ.
ونىڭ ايتۋىنشا، كاسىبي تەحنيكالىق كادرلاردى دايارلاۋدا بيزنەس قاۋىمداستىقتىڭ ىقپالى بولۋى كەرەك.
«كادر جوق دەپ جاتادى. ءبىز كادردى ازىرلەپ جاتىرمىز. مەنىڭشە، كادر ماسەلەسىن شەشۋدە بيزنەستىڭ دە قىزىعۋشىلىق تانىتقانى ءجون. ەلوردادا تەگىن كاسىبي تەحنيكالىق ءبىلىم بەرۋدى ۇيىمداستىرۋدا ناقتىلاۋ بويىنشا ءبىز قازىر اكىمنىڭ اتىنا قىزمەتتىك حاتتى ازىرلەپ قويدىق. اكىم كەلىسىمىن بەرگەن سوڭ، ىسكە كىرىسەمىز»، - دەيدى ول.
ايتا كەتەيىك، بۇگىن نۇر- سۇلتان قالاسى ۇلتتىق كاسىپكەرلەر پالاتاسى جانە قالالىق ءبىلىم بەرۋ باسقارماسىنىڭ ۇيىتقى بولۋىمەن ەلوردا مەكتەپتەرى، بالاباقشالارىندا قوسىمشا ورىننىڭ قاجەتتىلىگى جانە ءبىلىم بەرۋ ۇيىمدارىنىڭ باسقا دا پروبلەمالارىنا ارنالعان وتىرىس ءوتتى.
اۆتور: ءالي يبرايەۆ
