ش ى ۇ دامۋىنىڭ 2025-جىلعا دەيىنگى ستراتەگياسىن جاساۋ ۇيىمنىڭ ودان ءارى تاعدىرىن ايقىندايدى - ق ح ر- داعى ر ف ەلشىسى
«ش ى ۇ ۇلتتىق ۇيلەستىرۋشىلەرى كەڭەسىنىڭ قاڭتارداعى وتىرىسىندا اعىمداعى جىلعا جۇمىس جوسپارى بەكىتىلدى، وندا كوپتەگەن كەڭ اۋقىمدى شارالار كوزدەلىپ وتىر. ولاردىڭ باستىسى 9-10- شىلدەدە ۋفا قالاسىندا وتەتىن شاڭحاي ىقتىماقتاستىق ۇيىمى مۇشە-مەملەكەتتەرى باسشىلارى كەڭەسىنىڭ وتىرىسى، سونداي-اق ش ى ۇ مۇشە-مەملەكەتتەرى ۇكىمەت باسشىلارى كەڭەسىنىڭ وتىرىسى (كۇزدە) بولماق»، - دەدى ول.
ونىڭ ايتۋىنشا، رەسەيلىك تاراپ قازىردىڭ وزىندە ارىپتەستەرگە ءسامميتتى وتكىزۋدىڭ الدىن الا باعدارلاماسى، كۇن ءتارتىبى جانە وسى شارا اۋقىمىندا قول قويىلاتىن قۇجاتتار ءتىزىمىنىڭ جوباسىن ازىرلەدى. 15- اقپانعا دەيىن ۋفا دەكلاراتسياسىنىڭ، سونداي-اق مەملەكەت باسشىلارى كەڭەسىنىڭ الداعى وتىرىسىنىڭ قورىتندىلارى جونىندە اقپاراتتىق حابارلاما جوبالارى ءازىر بولادى.
سامميت اۋقىمىندا ءبىرقاتار ماڭىزدى قۇجاتتارعا، اتاپ ايتقاندا، ۇيىم مۇشەلەرىنىڭ شەكارا ماسەلەلەرىنە قاتىستى ىنتىماقتاستىعى، سونداي-اق «ءۇش جاماندىق كۇشىنە» جانە ەسىرتكى قاۋپىنە قارسى تۇرۋ سياقتى ماڭىزدى سالالار بويىنشا قۇجاتتارعا قول قويىلماق.
«ءسامميتتىڭ ماڭىزدى قۇجاتتارىنىڭ ءبىرى ەكىنشى دۇنيە جۇزىلىك سوعىستاعى جەڭىستىڭ 70 جىلدىعىمەن بايلانىستى ازىرلەنىپ جاتقان ش ى ۇ مۇشە-مەملەكەتتەرى باسشىلارىنىڭ مالىمدەمەسى بولماق. بۇل ماسەلەنى تالقىلاۋدا ۇيىمنىڭ بارلىق مۇشەلەرى تۇگەلدەي اۋىزبىرشىلىك كورسەتتى»، - دەپ اتاپ ءوتتى ول.
ا. دەنيسوۆ ش ى ۇ- عا رەسەيلىك ءتوراعالىق اياسىندا 2015-جىلدىڭ ءبىرىنشى جارتىسىندا جەڭىسكە ارنالعان ءبىرقاتار شارالار وتكىزۋ جوسپارلانىپ وتىرعانىن اتاپ ءوتتى، سونىڭ ىشىندە «ەكىنشى دۇنيە جۇزىلىك سوعىستىڭ ساباقتارى: جاھاندىق قاۋىپتەر الدىنداعى توپتاسۋ» تاقىرىبىندا عىلىمي-پراكتيكالىق كونفەرەنسيا وتكىزىلمەك.
رەسەيلىك ديپلومات سونداي-اق كوكتەمدە جانە جازدا ش ى ۇ مۇشە-مەملەكەتتەرى قاۋىپسىزدىك كەڭەسى حاتشىلارىنىڭ، قورعانىس، كولىك، مادەنيەت جانە دەنساۋلىق ساقتاۋ مينيسترلەرىنىڭ كەزدەسۋلەرى وتكىزىلەتىنىن، سونداي-اق ۇيىمعا قاتىسۋشى ەلدەردىڭ ءارتۇرلى ۆەدومستۆولارى باسشىلارى دەڭگەيىندە باسقا دا وتىرىستار وتەتىنىن ەسكە سالدى.
«كوپتەگەن مىندەتتەردىڭ ىشىندە ەكى ماسەلەگە سىزدەردىڭ نازارلارىڭىزدى اۋدارعىم كەلەدى - ولار: ش ى ۇ- نىڭ 2025-جىلعا دەيىنگى دامۋ ستراتەگياسى مەن ۇيىمعا جاڭا مۇشەلەر قابىلداۋ. وسى ەكى تاقىرىپ تا شاڭحاي ۇيىمىنىڭ ودان ءارى تاعدىرىن ايقىندايدى جانە ونىڭ ۇزاق مەرزىمدى دامۋىنا جاڭا باعىتتار قوسادى»، دەپ اتاپ كورسەتتى ول.
«رەسەيلىك ءتوراعالىق ىسكەرلىك جانە ينۆەستيتسيالىق ىنتىماقتاستىققا ۇلكەن ماڭىز بەرەدى»، دەدى ول، سونىمەن قاتار الداعى ۋفادا وتەتىن سامميت اياسىندا ش ى ۇ بانكارالىق بىرلەستىگى مەن ىسكەرلىك كەڭەسىنىڭ وتىرىستارى وتەتىنىن حابارلادى.
سونىمەن قاتار وسى جىلعى ماۋسىم ايىندا سانكت-پەتەربۋرگتەگى حالىقارالىق 19-ەكونوميكالىق فورۋم اۋقىمىندا ش ى ۇ بيزنەس-فورۋمىن وتكىزۋ جوسپارلانۋدا، ر ف ەلشىسىنىڭ ايتۋىنشا، بيىلعى جىلعى ناۋرىز ايىندا وتەتىن ش ى ۇ فورۋمىنىڭ 10- مەرەيتويلىق سەسسياسىندا (حانتى-مانسي ق.) «جىبەك جولى ەكونوميكالىق بەلدەۋى» باستى تاقىرىپتاردىڭ ءبىرى بولماق.
