قازاقستاندا ەكى اتوم ستانسياسى 2025 - جىلعا دەيىن سالىناتىن بولدى

ىسكە قىزۋ كىرىسكەن ەنەرگەتيكا مينيسترلىگى نىسانداردىڭ قۇرىلىسىن زاڭداستىرۋ ءۇشىن جاڭا زاڭ جوباسىن بۇگىن ماجىلىسكە الىپ كەلدى. الايدا دەپۋتاتتار القىنعان شەنەۋنىكتەرگە الەمدەگى اپاتتاردى ەستەرىنە سالىپ، اسىقپاۋعا كەڭەس بەردى. ءتىپتى ميللياردتتار بولىنەتىن جوبانىڭ تيىمدىلىگىنە كۇمان كەلتىرىپ وتىر.

بۇگىن دەپۋتاتتار قاۋىپتەنىپ، ال شەنەۋنىكتەر قىزعىشتاي قورعاعان اتوم ەلەكتر ستانسيالارىنىڭ ەلىمىزدە ءالى ىرگەتاسى دا قالانباعان. جوسپار بويىنشا قوس ستانسيا بالقاش كولىنىڭ ماڭى مەن كۋرچاتوۆ قالاسىنان سالىنۋى ءتيىس. سول نىسانداردى زاڭداستىرىپ الۋ ءۇشىن بۇگىن ەنەرگەتيكا ۆيسە- ءمينيسترى ماجىلىسكە «اتوم ەنەرگياسىن پايدالانۋ تۋرالى» جاڭا قۇجاتتى الىپ كەلىپتى.

باقىتجان جاقساليەۆ، ق ر ەنەرگەتيكا ۆيتسە- ءمينيسترى:

- زاڭ جوباسىندا مەملەكەتتىك قۇپيا اقپاراتتارعا تۇزەتۋلەر ەنگىزدىك. ەندى ەكولوگيالىق اقپارات پەن يادرولىق الاڭداردىڭ قاۋىپسىزدىگى تۋرالى مالىمەتتەر قولجەتىمدى بولادى. جالپى، قۇجات ادام دەنساۋلىعىن قورعاي وتىرىپ، تابيعاتقا زيانسىز اتوم ەنەرگياسىن ءتيىمدى پايدالانۋعا باعىتتالعان.

ۆيسە- ءمينيستردى دەپۋتاتتار بىردەن قولداي قويمادى. حالىق قالاۋلىلارى قازاقستاندا سالىناتىن اتوم ستانسيالارىنان كۇماندانىپ وتىر. ويتكەنى، قازىر ۋران الپاۋىتى سانالاتىن اۆستراليانىڭ ءوزى ا ە س- تان باس تارتىپ، ونىڭ قۇرىلىسىنا زاڭ جۇزىندە تىيىم سالىپتى.

ايتكۇل ساماقوۆا، ءماجىلىس دەپۋتاتى:

- سىزدەر جوعارى اكتيۆتى يادرولىق قالدىقتاردى قالاي جويماقسىزدار؟ بۇل ماسەلە قازاقستان تۇگىلى بۇكىل الەمدە شەشىمىن تاپپاعان. جالپى، ەلىمىز ءۇشىن ا ە س سالۋ ەكونوميكالىق جاعىنان قانشالىقتى ءتيىمدى؟

ۆيسە- مينيستر الاڭداۋعا نەگىز جوق دەدى. شەنەۋنىكتەر مەن ماماندار اتوم ەنەرگياسىنىڭ تيىمدىلىگىن جان- جاقتى زەرتتەپ، ساراپتاما جۇرگىزگەن. ەلىمىزدەن قاۋىپتى قالدىقتاردىڭ دا كوزىن جوياتىن جەر تابىلاتىن كورىنەدى.

باقىتجان جاقساليەۆ، ق ر ەنەرگەتيكا ۆيسە- ءمينيسترى:

- ارينە، ا ە س قۇرىلىسىن جوسپارلاعاندا مىندەتتى تۇردە ونىڭ قالدىعىن قايدا جىبەرەمىز دەگەن سۇراق تۇرادى. ا ە س كەم دەگەندە 60  جىل پايدالانۋعا بولادى. كەيىن، كوزىن جويۋ كەرەك. ال، ءبىز قالدىقتاردى سەمەيدەگى سىناق پاليگونىنا كومۋىمىز مۇمكىن.

ماجىلىسمەندەردىڭ قاۋىپتەنۋى بەكەر ەمەس. حالىقارالىق تاجىريبەگە سۇيەنسە، الەمدە كۇلى كوككە ۇشقان اتوم ستانسيالارى جەتەرلىك. ماسەلەن، 4 جىل بۇرىن جاپونيادا جەر سىلكىنىسىنىڭ كەسىرىنەن فۋكۋسيما ا ە س ءىرى اپاتقا ۇشىراپ، بىرنەشە ەنەرگوبلوك توقتاپ قالدى.

 - ءبىراق، قوس ستانسيانىڭ قۇرىلىسى ناقتى قاي كۇنى باستالاتىنى ازىرگە بەلگىسىز. جالپى، قازاقستان ا ە س سالۋعا 17 جىلدان بەرى ۇمتىلىپ كەلەدى. باستاپقىدا ماماندار ستانسيا ماڭعىستاۋ وبلىسىنداعى اتوم ەنەرگيا كومبيناتىنىڭ بازاسىندا بولعانى دۇرىس دەپ شەشتى. كەيىن بۇل جوبا توقتاپ قالدى. ەندى بالقاش كولىنىڭ ماڭى مەن كۋرچاتوۆ قالاسى تاڭدالىپ وتىر. ەلىمىزدەگى اتوم ەلەكتر ستانسيالارىن رەسەيدىڭ «روس اتومى» سالادى.

«ك ت ك» تەلە ارناسى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى