2025-جىلى الماتىدا تۋريزمدى دامىتۋ ءۇشىن نە ىستەلەدى
الماتى. KAZINFORM - وتكەن جىلدىڭ 9 ايىندا الماتىعا 1,7 ميلليون تۋريست كەلگەن.
الماتى - تۋريستەر ءۇشىن ەلىمىزدەگى ەڭ تارتىمدى قالالارىنىڭ ءبىرى. Kazinform اگەنتتىگى قالالىق تۋريزم باسقارماسىنان بيىل جاڭا تۋريستەردى تارتۋ بويىنشا مەگاپوليستە قانداي جۇمىستار اتقارىلاتىنىن سۇرادى.
رەسمي جاۋاپقا سايكەس، 2024-جىلدىڭ 9 ايىندا الماتىعا 1,7 ميلليون قوناق كەلگەن. ونىڭ ىشىندە 507,5 مىڭ ادام شەتەلدىك مەيماندار بولسا، 1,2 ميلليون ادام - ىشكى تۋريستەر. جالپى شەتەلدىك تۋريستەر الەمنىڭ 100 دەن استام ەلىنەن كەلگەن بولسا، ونىڭ ىشىندە كوش باستاپ تۇرعان رەسەي ازاماتتارى - 117534. ەكىنشى ورىندا ءۇندىستان - 82731 تۋريست، ءۇشىنشى ورىندا قىتاي - 73328 تۋريست. سونىمەن قاتار تۇركيا مەن ا ق ش العاشقى بەستىككە ەندى. تۇركيادان كەلگەن تۋريستەر سانى – 26273، ال ا ق ش- تان - 21561 تۋريست.
تۋريزم باسقارماسى بيىل قالانى حالىقارالىق ارەنادا تانىستىرۋ ءۇشىن 9 حالىقارالىق تۋريستىك كورمەگە، 1 جەرگىلىكتى كورمەگە، 4 MICE فورماتىنداعى كورمەگە قاتىسۋ جوسپارلانعانىن جابارلادى. سونداي-اق 2025-جىلى 11 شەتەلدىك قالادا الماتى تۋريزمى كۇنى وتكىزىلەدى.
ودان بولەك وسى جىلى TripAdvisor ،Expedia ،Spottedbylocals ،Edreams سىندى حالىقارالىق پلاتفورمالارمەن ىنتىماقتاستىق ورناتۋ جانە قالانىڭ تۋريستىك الەۋەتىن سيفرلىق مەديادا ناسيحاتتاۋ جوسپارلانعان.
- بۇل شارالار الماتىنىڭ حالىقارالىق تۋريستىك ورتالىق رەتىندەگى پوزيتسياسىن نىعايتۋعا، تۋريستىك قىزمەت كورسەتۋ ساپاسىن جاقسارتۋعا جانە ينفراقۇرىلىمدى دامىتۋعا باعىتتالعان، - دەلىنگەن باسقارما جاۋابىندا.
ەسكە سالايىق، بيىل الماتى تاۋلارىندا جاڭا 3 كەمپينگ-ايماق اشىلاتىنىن جازعانبىز.
ودان بولەك الماتىدا الداعى ءۇش جىلدا 5615 نومىرگە ارنالعان 37 قوناق ءۇي سالىنادى.
ايتا كەتەيىك، بىلتىر الماتىدا قىتايداعى قازاقستان تۋريزم جىلى جابىلعان بولاتىن.
