قازاقستاندا 2025-جىلى عالىمداردىڭ سانى 1,5 ەسەگە كوبەيەدى
بۇل تۋرالى ق ر ءبىلىم جانە عىلىم مينيسترلىگى عىلىم كوميتەتىنىڭ ءتوراعاسى جاننا قۇرمانعاليەۆا ءمالىم ەتتى، دەپ حابارلايدى قازاقپارات ءتىلشىسى.
«بىزدەگى كۇردەلى ماسەلەلەردىڭ ءبىرى - عالىمدار سانىنىڭ كۇرت ازايۋى. قازىرگى تاڭدا ەلىمىزدە عىلىم سالاسىندا ەڭبەك ەتۋشىلەردىڭ سانى 22 مىڭنان ءسال عانا اسادى. وسى ورايدا ۇلتتىق جوبا اياسىندا 2025-جىلى ەلىمىزدەگى عالىمدار سانىن كوبەيتۋدى ياعني كەمىندە 34 مىڭعا جەتكىزۋدى كوزدەپ وتىرمىز. الدىمەن عىلىم سالاسىن قارجىلاندىرۋعا قاتىستى ماسەلەنى رەتتەپ الۋ كەرەك. بۇل ماسەلەنى سوڭعى 2 جىلدا ەرەكشە نازار الىپ كەلەمىز. سونىڭ ناتيجەسىندە 2020-2021-جىلى عىلىمعا بولىنەتىن قارجى كولەمى 2 ەسەگە ارتتى. جانە وتاندىق عىلىم سالاسىنا بولىنەتىن قارجىعا تەك ءبىزدىڭ مينيسترلىك قانا ەمەس، ودان بولەك 9 ورتالىق مەملەكەتتىك ورگان جاۋاپتى»، - دەدى جاننا قۇرمانعاليەۆا و ك ق- دە وتكەن باسپا ءسوز ءماسليحاتىندا.
كوميتەت باسشىسىنىڭ سوزىنە سەنسەك، بيىل عىلىم سالاسىنا 83 ميلليارد تەڭگەدەن استام قارجى ءبولىندى.
«سول قارجىعا ءبىزدىڭ كوميتەت عالىمدارعا ارنالعان 5 گرانتتىق جانە 2 باعدارلامالىق بايقاۋ جاريالادى. قازىرگى تاڭدا ەلىمىزدە 1164 عىلىمي جوبا قارجىلاندىرىلىپ جاتىر. ودان بولەك، مەملەكەت باسشىسىنىڭ تاپسىرماسىنا سايكەس 2 رەت جاس عالىمدارعا ارنالعان كونكۋرس ۇيىمداستىرىلدى. سونىڭ ناتيجەسىندە 315 عىلىمي جوبا ىسكە اسىرىلدى. بۇگىندە ەلىمىزدە 2 مىڭنان استام جاس ماماندار عىلىممەن اينالىسىپ جاتىر»، - دەيدى ول.
بۇعان دەيىن ج. قۇرمانعاليەۆا وتاندىق عالىمدار ورتاشا قانشا جالاقى الاتىنىن ايتتى.
ودان بولەك، عىلىم كوميتەتى ءتوراعاسىنىڭ سوزىنشە، ەلىمىزدە عىلىمي مەكەمەلەردى ىرىكتەۋ مەن قارجىلاندىرۋ ەرەجەسى ازىرلەنىپ جاتىر.
