قىسقى ۋنيۆەرسيادا-2023: قازاقستان حوككەيشىلەرى وڭتۇستىك كورەيادان باسىم ءتۇستى

كەزدەسۋ بارىسىندا قازاقستاندىق حوككەيشىلەر العاشقى بولىپ ەسەپ اشتى. ويىننىڭ 14-مينۋتىندا ءالي قاسەنوۆ مەرگەندىك تانىتتى.

ەكىنشى كەزەڭ باستالعاننان كەيىن كورەيلىك حوككەيشىلەر تارازى باسىن تەڭەستىرسە، 24، 26-مينۋتتاردا كيريلل پولوحوۆ قازاقستان قۇراماسىنىڭ باسىمدىعىن ارتتىردى.

ال 38-مينۋتتا قازاقستاندىق ماكسيم مۋحامەتوۆ قاقپانى ءدال كوزدەدى.

وسىلايشا قازاقستاندىق حوككەيشىلەرى قارسىلاسىنان 5:1 ەسەبىمەن باسىم ءتۇستى.

قازاقستاندىق حوككەيشىلەر ۆ توبىندا وڭتۇستىك كورەيا، ۆەنگريا، ۇلى بريتانيا، سلوۆاكيا جانە ا ق ش-پەن سىنعا تۇسەدى.

اتالعان توپتا العاشقى تۋردا ا ق ش قۇراماسى ۇلى بريتانيا 18:0 ەسەبىمەن تىزە بۇكتىرسە، سلوۆاكيا حوككەيشىلەرى ۆەنگريادان 4:0 ەسەبىمەن باسىم ءتۇستى.

ەندى ەلىمىزدىڭ ستۋدەنتتەر قۇراماسى 13-قاڭتاردا ۆەنگريامەن شەبەرلىك بايقاسادى. ودان كەيىن 16-قاڭتاردا ۇلىبريتانيا، 17-قاڭتاردا سلوۆاكيا، 18-قاڭتاردا ا ق ش قۇراماسىمەن وينايدى.

ا توبىندا جاپونيا لاتۆيادان 8:3، چەحيا شۆەتسيانى 7:2, كانادا ۋكراينانى 6:1 ەسەبىمەن جەڭدى.

قىسقى ۋنيۆەرسيادا ا ق ش-تىڭ لەيك-پلەسيد قالاسىندا 12 جانە 22-قاڭتار ارالىعىندا بولادى.

قازاقستان ستۋدەنتتەر قۇراماسى ءدۇبىرلى دوداعا توعىز مارتە قاتىستى. 1995 -جىلى يسپانيانىڭ حاكا قالاسىندا چەمپيوندىق تۇعىرعا كوتەرىلسە، 1993، 2013، 2015، 2017 -جىلداردا كۇمىس، 2007 -جىلى قولا مەدال يەگەرى اتاندى.

ەسكە سالساق، شايبالى حوككەيدەن قازاقستان ستۋدەنتتەر قۇراماسىنىڭ باس باپكەرى قىزمەتىنە عالىم مامبەتاليەۆ تاعايىندالدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى