2023-جىلى قازاقستاندا گاز ەكسپورتى توقتاپ قالاۋى مۇمكىن
بۇل تۋرالى ماجىلىستەگى ۇكىمەت ساعاتىندا QazaqGaz ۇ ك ا ق باسقارما ءتوراعاسى سانجار جاركەشوۆ ءمالىم ەتتى، دەپ حابارلايدى قازاقپارات ءتىلشىسى.
«2024-جىلى گاز سالاسى داعدارىسقا تاپ بولۋى مۇمكىن. ەگەر تۇتىنۋشىلاردىڭ بارلىق وتىنىمدەرىن ورىنداساق، وندا بۇل داعدارىس 2023-جىلى بايقالادى. بىرىنشىدەن، تاۋارلى گازدىڭ تاپشىلىعى 2024-جىلى باستالادى. ىشكى نارىققا قاجەت كولەم قولدا بار رەسۋرستاردان اسىپ تۇسەدى. ەگەر شۇعىل شارالار قابىلدانباسا، گاز ەكسپورتى 2023-جىلى توقتاپ قالۋى ىقتيمال»، - دەدى س. جاركەشيەۆ.
وسى ورايدا ول ىشكى باعانى سۋبسيديالاۋ باعىتىندا ەكسپورت باستى تابىس كوزى بولعانىن ەسكە سالدى.
«ىشكى نارىقتا جاڭادان ءىرى تۇتىنۋشىلار پايدا بولىپ وتىر. ولاردىڭ اراسىندا جىلۋ ەلەكتر ورتالىقتارىن گاز جاعۋعا اۋىستىرۋ جوبالارى، جاڭا وندىرىستەردى گازعا قوسۋ، سونداي-اق ءىرى كوممەرتسيالىق تۇتىنۋشىلاردىڭ جۇيەگە قوسىلۋى بار»، - دەدى باسقارما ءتوراعاسى.
س. جاركەشيەۆ ماجىلىستەگى ۇكىمەت ساعاتىنان كەيىن تىلشىلەرگە گاز ەكسپورتىنىڭ شارتتارى تۋرالى ايتتى.
«جىل سايىن بىزدە قىتايمەن 10 ميللياردقا دەيىن ەكسپورتتىق كەلىسىم بار. الايدا بۇل كولەمدى ورىنداي الماي وتىرمىز. سەبەبى ەكسپورتقا تيەسىلى گاز ەلىمىزدىڭ ىشكى نارىعىنا باعىتتالىپ جاتىر. ەلىمىزدە ىشكى نارىقتى قامتاماسىز ەتۋگە باسىمدىق قويىلعان»، - دەدى ول.
بۇدان بۇرىن حابارلانعانداي، 2025-جىلعا قاراي وتاندىق گازدىڭ تاپشىلىعى بولۋى مۇمكىن.
ەل ىشىندە گاز تۇتىنۋ كولەمى تۇراقتى تۇردە ءوسىپ كەلەدى. سونىمەن قاتار سانجار جاركەشوۆ قازاقستان گازىنىڭ ەكسپورتىن 5 ميلليارد تەكشە مەتر دەڭگەيىندە ساقتاۋعا باسىمدىق بەرىلۋى كەرەك ەكەنىن ايتتى.
