بۇكىل الەمدىك جازعى ۋنيۆەرسيادا 2023-جىلى قاي ەلدە وتەتىنى بەلگىلى بولدى
ق ر ۇلتتىق وليمپيادالىق كوميتەتى حابارلاعانداي، وسىدان ءبىر كۇن بۇرىن حالىقارالىق ۋنيۆەرسيتەت سپورتى فەدەراتسياسىنىڭ وتىرىسىندا اتقارۋشى كوميتەت 2023-جىلعى جازعى ۋنيۆەرسيادانىڭ استاناسى رەتىندە رەسەيدىڭ ەكاتەرينبۋرگ قالاسىن تاڭداعان.
«نەاپولدە وتكەن وتىرىستا رەسەيدىڭ ءىرى سپورتتىق جارىستاردى وتكىزۋدەن تاجىريبەسى مول ەكەندىگىنە باسىمدىق بەرىلدى. اتاپ ايتار بولساق، كورشى ەلدە فۋتبولدان الەم چەمپيوناتى، قىسقى جانە جازعى ۋنيۆەرسيادا ويىندارى مەن وليمپيادا وتكەن بولاتىن»، دەپ جازىلعان حابارلامادا.
ايتا كەتەيىك، رەسەي بۇل بۇكىل الەمدىك جازعى ۋنيۆەرسيادا ويىندارىن وسىمەن ءۇشىنشى مارتە وتكىزگەلى وتىر. وسىعان دەيىن، ناقتىراق ايتساق، 2013-جىلى رەسەيدىڭ قازان قالاسىندا جازعى ۋنيۆەرسيادا وتسە، 2019-جىلى كراسنويارسكىدە ستۋدەنتتەردىڭ قىسقى ويىندارى ۇيىمداستىرىلدى.
اۆتور: كۇنسۇلتان وتارباي
