تۇركيادا 2023 -جىلى سۋ قويماسىنىڭ سانى مىڭ جارىمعا جاقىندايدى

تۇرىك ماماندارى سۋ كولەمىنىڭ 2030 -جىلى بۇدان دا تومەندەۋى مۇمكىن دەپ دابىل قاعىپ وتىر. الەمدە حالىق سانىنىڭ ارتۋى مەن كليماتتىق وزگەرىستەر سالدارىنان جەر استى سۋ رەسۋرستارى تومەندەپ سۋ تاپشىلىعى تۋىنداۋدا.

2030 -جىلى تۇركياعا دا وسىنداي قاۋىپ ءتونۋى مۇمكىن. مۇنىمەن كۇرەسۋ ءۇشىن ەل ۇكىمەتى 2023 -جىلعا دەيىن سۋ قويمالارىنىڭ سانىن ەكى ەسە ارتتىرىپ، 1454-كە جەتكىزۋدى كوزدەپ وتىر.

 بەكير پاكدەميرلي، ورمان جانە سۋ شارۋاشىلىعى ءمينيسترى:

 - 2002-2017 -جىلدار ارالىعىندا 451 سۋ قويماسى ىسكە قوسىلدى. 2023 -جىلعا دەيىن 727 قويمانىڭ قۇرىلىسىن اياقتاپ، ەلدەگى سۋ قويمالارىنىڭ سانىن 1454-كە جەتكىزۋدى كوزدەپ وتىرمىز. بيىل ەلدەگى جاۋىن- شاشىننىڭ ارتۋىنا بايلانىستى قويمالاردىڭ 50 پروتسەنتتەن استامى سۋمەن تولىقتى. جازعى ماۋسىمعا سۋ جەتكىلىكتى.

تۇرىك سۋ قويمالارى زاماناۋي تەحنولوگيالارمەن جابدىقتالعان. سونداي- اق وتاندىق جانە شەتەلدىك ماماندار تاراپىنان جەتىلدىرىلگەن. جەرگىلىكتى بيلىكتىڭ ايتۋىنشا، قويمالارداعى سۋ ىشۋگە جارامدى. دەنساۋلىققا زيانى جوق. دەگەنىمەن ەل تۇرعىندارى اراسىندا مۇنىمەن كەلىسپەيتىندەر دە بار.

 كۇبرا وزگۇن، انكارا تۇرعىنى:

- وتباسىمىزبەن بوتەلكەدەگى سۋلاردى قولدانامىز. قانشالىقتى دەنساۋلىققا زيانى جوق، تازارتىلعان دەسە دە تاماق جاساعاندا كرانداعى سۋدى پايدالانباۋعا تىرىسامىن. انا جولى كىشكەنتاي جيەنىم كراننان سۋ ءىشىپ، اۋىرىپ قالدى. بۇل جاعداي ءبىزدى ابدەن ابىگەرگە سالدى.

فاتما ەردوعدۇ، انكارا تۇرعىنى:

 - ۇيدە قوسىمشا سۇزگىلەر ارقىلى تازارتىلعان سۋدى ىشەمىز. بۇل ءتيىمدى ءارى زالالسىز. مەنىڭ ويىمشا، بۇل قۇرىلعىلار ءاربىر ۇيگە مىندەتتى تۇردە ورناتىلۋى ءتيىس.

 ازين موحتاري، انكارا تۇرعىنى:

 - ءوزىم كرانداعى سۋدى قولدانامىن. تەلەديدار مەن مەرزىمدىك باسىلىمداردا سۋدىڭ حالىقارالىق ستاندارتقا سايكەس تازارتىلعانى ءجيى ايتىلادى. ۇيگە كەلگەن قوناقتار دا شاعىم ايتپايدى. تەك ءسابي كەزىندە بالالارىما قايناتىپ بەرەتىنمىن.

جالپى ەلدە سۋدىڭ % 72- ءتى اۋىل شارۋاشىلىعىندا، % 12- ءتى ءوندىرىس سالاسىندا، %16 - ءتى اۋىزسۋ رەتىندە پايدالانىلادى. ءۇش تاراپى تەڭىزبەن قورشالعان ەلدە اۋىزسۋ تاپشىلىعى - ءجيى كەزدەسەتىن قۇبىلىس. وسىعان بايلانىستى تۇرىك ۇكىمەتى تەلەارنالار مەن قوعامدىق ورىنداردا سۋدى ءتيىمدى قولدانۋ ءۇشىن الەۋمەتتىك جارنامالار مەن ارنايى ناۋقانداردى قولعا العان.

 اۆتورى: مەرۋەرت قاناعات

www.24.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى