اكىمدىكتەر 2023-جىلعى 1- ماۋسىمعا دەيىن ستيحيالىق پوليگونداردى جويۋى ءتيىس - ۇكىمەت

پرەمەر-مينيستر ءاليحان سمايىلوۆتىڭ توراعالىعىمەن وتكەن پرەزيدەنت جانىنداعى «جاسىل ەكونوميكاعا» كوشۋ جونىندەگى كەڭەستىڭ وتىرىسىندا وسىنداي تاپسىرما بەرىلدى، دەپ حابارلايدى قازاقپارات ۇكىمەتتىڭ تەلەگرام كانالىنا سىلتەمە جاساپ.

وتىرىستا كوممۋنالدىق قالدىقتاردى باسقارۋ تيىمدىلىگىن ارتتىرۋ جانە تۇرعىن ءۇي سەكتورىندا، ونەركاسىپ پەن باسقا دا سالالاردا ەنەرگيا ۇنەمدەۋ تەحنولوگيالارىن ەنگىزۋ جونىندەگى جوسپارلار قارالدى.

بيىلعى جىلدىڭ ءۇشىنشى توقسانىندا رەسپۋبليكا بويىنشا قاتتى تۇرمىستىق قالدىقتاردى قايتا وڭدەۋ ۇلەسى 24 پايىز بولدى. بۇل كورسەتكىش جىل سايىن ارتىپ كەلەدى (2020 - 18 پايىز، 2021- 21 پايىز) جانە 2025-جىلعا قاراي 30 پايىزدان اسۋى كەرەك.

بۇگىندە ەلىمىزدە 3005 قتق پوليگونى جۇمىس ىستەيدى، بۇدان بولەك اباي، اقمولا، اقتوبە، اتىراۋ، شىعىس قازاقستان، باتىس قازاقستان جانە پاۆلودار وبلىستارىندا تاعى 20 پوليگون سالۋ جوسپارلانىپ وتىر. ءارتۇرلى كەزەڭدەردە قوقىستى ءبولىپ جيناۋ 142، ال سۇرىپتاۋ 101 ەلدى مەكەندە ەنگىزىلدى.

پرەمەر-مينيستر قولدانىستاعى پوليگونداردىڭ ىشىندە تەك 630 عا جۋىعى عانا (21 پايىز) ەكولوگيالىق جانە سانيتارلىق نورمالارعا ساي ەكەنىن اتاپ ءوتتى. سونداي- اق، ۇكىمەت باسشىسى جىلىنا 4-4,5 ميلليون توننا تۇرمىستىق قالدىقتار جينالاتىنىن، الايدا جەرگىلىكتى اتقارۋشى ورگاندار قوقىس جيناۋ جۇمىسىن ءتيىستى دەڭگەيدە ۇيىمداستىرا الماي وتىرعانىن ايتتى.

«بۇل ءۇردىس ستيحيالىق پوليگونداردىڭ پايدا بولۋىنا الىپ كەلەدى، ولاردى جويۋ ءۇشىن بيۋجەت قاراجاتى جۇمسالادى. اتاپ ايتقاندا، قۇرىلىس قالدىقتارىن قايتا وڭدەۋگە ارنالعان ينفراقۇرىلىم قوستاناي وبلىسى مەن ەلوردادا عانا ۇيىمداستىرىلعان. قالعان ايماقتاردا ونداي ينفراقۇرىلىم جوق»، - دەدى ءاليحان سمايىلوۆ.

پرەمەر-مينيستر اكىمدىكتەرگە 2023-جىلعى 1- ماۋسىمعا دەيىن بارلىق رۇقسات ەتىلمەگەن پوليگونداردى جويۋدى جانە جالپى پوليگونداردى ەكولوگيالىق جانە سانيتارلىق نورمالارعا سايكەستەندىرۋ جۇمىستارىن جەدەلدەتۋدى تاپسىردى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى