سپورتشىلار مەن باپكەرلەر جالاقىسى ارتتى: 2022-جىلى سپورت سالاسىندا نە وزگەردى
قازاقپارات مادەنيەت جانە سپورت مينيسترلىگىنە سىلتەمە جاساپ، نەگىزگى باعىتتارعا توقتالدى.
1. وليمپيادا جەڭىمپازدارى مەن جۇلدەگەرلەرىنىڭ جانە الەم چەمپيوندارىنىڭ اي سايىنعى ماتەريالدىق قامسىزداندىرۋ مولشەرى ارتتى.
قازاقستاندىق سپورتشىلار مەن جاتتىقتىرۋشىلارعا وليمپيادا، پاراليمپيادا، سۋردليمپيادا ويىندارى جەڭىمپازدارى مەن جۇلدەگەرلەرىنە جانە وليمپيادالىق سپورت تۇرلەرى بويىنشا الەم چەمپيوندارىنا ءومىر بويى بەرىلەتىن اي سايىنعى قامسىزداندىرۋ مولشەرى 4 ەسەگە ءوستى.
ساباقتان تىس سپورتتىق ءىس-شارالاردى وتكىزگەنى ءۇشىن دەنە شىنىقتىرۋ مۇعالىمدەرىنە لاۋازىمدىق جالاقىدان %100 قوسىمشا اقى تولەۋ ەنگىزىلدى. سونداي-اق مامانداندىرىلعان مەكتەپتەر مەن كوللەدجدەر، دوپينگكە قارسى زەرتحانا، ۇلتتىق دوپينگكە قارسى ورتالىق قىزمەتكەرلەرىنىڭ جالاقىسى كوتەرىلدى.
2. سپورتتاعى شتاتتىق بىرلىك 3 مىڭعا دەيىن ارتتى. ياعني 1994-جىلدان بەرى ەلىمىزدىڭ ۇلتتىق قۇراماسىنداعى جالپى باپكەرلەر مەن سپورتشىلار سانى 1 مىڭ ادامنان اسپاعان ەدى. ەندى ءۇش مىڭ باپكەر مەن سپورتشى قۇراما ساپىنا كىرىپ، مەملەكەت قولداۋىنا يە بولادى. ياعني ايلىق تولەنىپ، مەملەكەت بەرەتىن وزگە دە جەڭىلدىكتەردى الا الادى.
3. 2025-جىلعا دەيىن 113 جاڭا سپورت نىسانى سالىنىپ، جۇمىس ىستەپ تۇرعان 27 نىسان قايتا جوندەلەدى. سونداي-اق وڭىرلەردە 10 دەنە شىنىقتىرۋ-ساۋىقتىرۋ كەشەنىنىڭ قۇرىلىسى جۇرگىزىلىپ جاتىر. وليمپيادالىق جاتتىعۋ ورتالىعى 2023-جىلى، ال وليمپيادالىق دايارلاۋ ورتالىعىنىڭ قۇرىلىسى 2025-جىلى اياقتالاتىنى جوسپارلانۋدا.
4. سپورتتىق-قۇرال جابدىقتار جاڭارتىلدى. پاريجدەگى وليمپياداعا دايىندىق اياسىندا مادەنيەت جانە سپورت مينيسترلىگى ارنايى باعدارلاما ازىرلەدى. ونىڭ ماڭىزدى تارماقتارىنىڭ ءبىرى زاماناۋي سپورت جابدىقتارىن ساتىپ الۋدىڭ جاڭا نورمالارىن بەكىتۋ، سونداي-اق وسى ماقساتقا قوسىمشا قاراجات ءبولۋ. 2017-جىلى بەكىتىلگەن نورمالار باسقا ەلدەردىڭ قۇراما كوماندالارىنا بولىنەتىن قولجەتىمدى، ۇنەمى جاڭارتىلىپ وتىراتىن جانە جاڭا بۋىن جابدىقتارىن ساتىپ الۋعا مۇمكىندىك بەرمەگەنىن اتاپ وتكەن ءجون.
5. ArtSport جوباسىنا وزگەرىستەر ەنگىزىلدى. بۇل رەتتە بالالاردىڭ قاۋىپسىزدىگىن قامتاماسىز ەتۋگە باعىتتالعان باعدارلامانىڭ شارتتارى جەتىلدىرىلدى. سونىمەن قاتار 7 قالادا 180 مىڭنان استام ادامدى قامتيتىن «قولجەتىمدى سپورت» جوباسى جۇزەگە اسىرىلىپ وتىر.
6. ۇلتتىق قۇرامالاردىڭ جاتتىقتىرۋشىلار قۇرامى قايتا قارالدى. 20 عا جۋىق جازعى وليمپيادالىق سپورت تۇرلەرىنەن جاڭا باس باپكەرلەر تاعايىندالسا، جالپى سپورتتىڭ 13 تۇرىنەن اۆستريا، گەرمانيا، سەربيا، ماكەدونيا، گرەكيا، كورەيا، فرانتسيا جانە تاعى باسقا ەلدەردەن كەڭەسشى-جاتتىقتىرۋشىلار شاقىرىلعان.
7. سپورت كوميتەتىنە قاراستى سپورتتىق مەديتسينا ورتالىعىنىڭ جۇمىس جۇيەسى وزگەردى. سپورتتىق مەديتسينا جانە وڭالتۋ ورتالىعىنىڭ ماتەريالدىق-تەحنيكالىق بازاسىن نىعايتۋ، قالپىنا كەلتىرەتىن ونىمدەر مەن سپورتتىق تاماقتانۋ، ۆيتاميندەر ساتىپ الۋ، جۇمىس جاساۋشى مامانداردى وقىتۋ جانە شەتەلدىك مامانداردى شاقىرۋ، فارماكولوگيالىق جانە بيومەديتسينالىق قامتاماسىز ەتۋ تىزبەسىن قايتا قاراۋ جۇمىستارى جۇرگىزىلىپ جاتىر.
8. «ۇلى دالا جورىعى» رەسپۋبليكالىق مارافون-بايگەسى ءوتتى. بۇرىن-سوڭدى بولماعان الامان بايگە بىرنەشە ءوڭىر بويىنشا ءوتىپ، 1200 شاقىرىمدى قۇرادى.
9. الماتى قالاسىندا رەسپۋبليكالىق سپورت كوللەدجىنىڭ جانىنان سپورت جانە دەنە شىنىقتىرۋ ىستەرى كوميتەتى سپورتتى دامىتۋ ديرەكتسياسى ر م ق ك- ءنىڭ فيليالى رەتىندە جاتتىعۋ ورتالىعى اشىلدى.
ۇلتتىق شتاتتىق قۇراماعا كىرە الماعان 4-8№ رەزەرۆ سپورتشىلارى اتالعان ورتالىقتا جاتتىعۋلارىن جالعاستىراتىن بولادى. سونداي-اق، مۇنداعى سپورتشىلار الەمدىك باسەكەلەردە باق سىناۋعا مۇمكىندىك الادى، ۇلتتىق قۇراماعا باسەكەلەستىك تۋدىرادى.
10. 2022-جىلى سپورتشىلارىمىز 600 گە جۋىق ءتۇرلى ستارتتارعا قاتىسىپ، ناتيجەسىندە 800 دەن اسا مەدال جەڭىپ الدى.
