مينيسترلىك 2022-جىلى ەلىمىزدە قانشا جەتىم بالا باسپانالى بولعانىن ءمالىم ەتتى
بۇل تۋرالى ورتالىق كوممۋنيكاتسيالار قىزمەتىندە وتكەن بريفينگىدە وقۋ-اعارتۋ ۆيتسە-ءمينيسترى عاني بەيسەمبايەۆ مالىمدەدى، دەپ حابارلايدى قازاقپارات ءتىلشىسى.
«بيىلعى جىلى رەسپۋبليكا بويىنشا 700 گە جۋىق جەتىم بالا پاتەر الدى. قازاق جەتىمىن جىلاتپاعان حالىق. وسى ورايدا ەلىمىزدە سوڭعى ۋاقىتتا بالالار ۇيلەرىنىڭ سانى ازايىپ كەلە جاتقانىن اتاپ وتكەن ءجون. ەڭ باستى قاعيدا - بالانىڭ وتباسىندا ءومىر ءسۇرۋ جانە تاربيەلەنۋ قۇقىعىن قامتاماسىز ەتۋ. بۇگىنگى كۇنى ەلىمىزدەگى 22081 جەتىم جانە اتا-اناسىنىڭ قامقورلىعىنسىز قالعان بالالاردىڭ 3790 بالاسى 84 ۇيىمدا تاربيە الىپ جاتسا، قالعان 18291 ءى وتباسىندا تاربيەلەنۋدە. بۇل - ءوز وتباسىندا بالا تاربيەلەۋگە ىقىلاس بىلدىرگەن اتا-انالار سانىنىڭ ءوسۋىنىڭ ناتيجەسى. قازىرگى كەزدە مينيسترلىك دەنساۋلىق جاعدايىنا قاراماستان، بارلىق بالالاردى قابىلداۋعا دايىن بولاتىن قوسىمشا كاسىبي قابىلداۋشى وتباسىلاردى قۇرۋ بويىنشا زاڭنامالىق دەڭگەيدە جۇمىس جۇرگىزۋدە»، - دەدى عاني بەيسەمبايەۆ.
سونىمەن قاتار، ۆيتسە-مينيستر بالالار جىلىندا ەلىمىزدە بۇلدىرشىندەردى قولداۋعا باعىتتالعان قانداي شارالار ۇيىمداستىرىلعانىنا توقتالدى.
