قازاقستاندىق قىز «الەم ارۋى-2022» اتاعىنان ايىرىلدى
ۇلتتىق سۇلۋلىق بايقاۋىنىڭ ۇيىمداستىرۋ كوميتەتىنىڭ مالىمەتىنشە، تاشىمبەتوۆا «الەم ارۋى-2022» اتاعىنان ايىرىلدى، - دەپ حابارلايدى Massaget.kz ءتىلشىسى.
وعان سەبەپ تاشىمبەتوۆانىڭ بايقاۋدى جانە ونىڭ قاتىسۋشىلارىن قارالاۋدى كوزدەپ، جالاعا تولى پوست پەن تىكەلەي ەفيردىڭ جاريالانۋىنا بايلانىستى بولعان.
«ديانانىڭ سوزدەرى تەك ۇيىمداستىرۋ كوميتەتىنىڭ مۇشەلەرى مەن ونىڭ سەرىكتەستەرىن ەمەس، سونىمەن قاتار، بايقاۋدىڭ باسقا قاتىسۋشىلارىن دا نەگىزسىز قارالاۋدى كوزدەيدى. ءبىز بۇل باسقالارعا دەگەن ۇلكەن قۇرمەتسىزدىك جانە باسقالاردىڭ ەڭبەگىنىڭ قۇنسىزدانۋى دەپ سانايمىز. قاراپايىم قىزداردىڭ تانىمال بولۋىن قامتاماسىز ەتۋ ءۇشىن جۇمىس جاساي وتىرىپ، ۇيىمداستىرۋ كوميتەتى ۇلكەن ءىس اتقارىپ قانا قويمايدى، سونىمەن قاتار، باسقا مۇشەلەر مەن سەرىكتەستەر الدىندا تولىق جاۋاپكەرشىلىكتى ءوز موينىنا الادى»، - دەلىنگەن حابارلامادا.
ۇلتتىق سۇلۋلىق بايقاۋىنىڭ ۇيىمداستىرۋ كوميتەتىنىڭ مالىمەتىنشە، فينالدىق شوۋعا، پيار-كومپانياعا، ديانا تاشىمبەتوۆانى بايقاۋعا قاتىسۋعا دايىنداۋعا جانە ونىڭ ءيميدجىن دامىتۋعا وراسان زور قاراجات پەن كۇش جۇمسالعان، ال ونىڭ كورسەتكەن قۇرمەتسىزدىگى مۇنداي ادامنىڭ ەلىمىزدىڭ «ارۋى» اتاعىنا لايىق ەمەس ەكەنىن كورسەتەدى.
«بايقاۋدى ۇيىمداستىرۋ كوميتەتى قولداۋلارىڭىزعا العىس بىلدىرەدى جانە بايقاۋعا قاتىسۋشىلاردى ءبىر-ءبىرىن قۇرمەتتەۋگە، ءوز سوزدەرىنە جاۋاپكەرشىلىكپەن قاراۋعا جانە كومپانيا ديرەكتسياسىنا تۇسىنىستىكپەن قاراۋعا شاقىرادى»، - دەلىنگەن حابارلامادا.
ەسكە سالايىق، «قازاقستان ارۋى - 2022» بايقاۋىنىڭ فيناليسى ديانا تاشىمبەتوۆا بايقاۋ ۇيىمداستىرۋشىلارى ونىڭ «الەم ارۋى» بايقاۋىنا قاتىسۋىن قارجىلاندىرۋدان باس تارتتى دەپ مالىمدەگەن بولاتىن. ول بۇل بايقاۋعا 2023-جىلدىڭ قاڭتارىندا بارۋى كەرەك بولعان.
