تۇركىستاندا «التىن دومبىرا-2022» يەگەرى انىقتالدى
تۇركىستاندا احمەت بايتۇرسىن ۇلىنىڭ 150 جىلدىعىنا وراي ۇيىمداستىرىلعان رەسپۋبليكالىق اقىندار ايتىسى اياقتالدى. ەكى كۇنگە سوزىلعان جىر الامانىنا قاتىسقان 18 اقىننىڭ بارلىعى دا وسال ەمەس ەكەندىگىن كورسەتتى. ايتىس سۇيەر قاۋىمدى ورەلى ونەرى، ورنەكتى سوزدەرىمەن سۋسىنداتتى. اراسىندا ادەمى ءازىل مەن جاراسىمدى قالجىڭ دا ايتىلدى.
اقىنداردىڭ ونەرىنە كورنەكتى ونەر قايراتكەرى، قازاقستان جانە ك س ر و حالىق ارتيسى، مەملەكەتتىك سىيلىقتىڭ يەگەرى ءاسانالى ءاشىموۆ باستاعان قازىلار القاسى باعا بەردى. سونداي-اق، قازىلار قۇرامىندا اقىن، حالىقارالىق «الاش» ادەبي سىيلىعىنىڭ يەگەرى عالىم جايلىباي، ق ر پرەزيدەنتىنىڭ ادەبيەت سالاسىنداعى ستيپەندياسىنىڭ يەگەرى، اقىن سۆەتقالي نۇرجان، پارلامەنت ءماجىلىسىنىڭ دەپۋتاتى، اقىن جاناربەك ءاشىمجان، حالىقارالىق «الاش» سىيلىعىنىڭ لاۋرەاتى، اقىن داۋلەتكەرەي كاپ ۇلى، قادىر مىرزا ءالي اتىنداعى «مادەنيەت جانە ونەر» ورتالىعىنىڭ ديرەكتورى، اقىن باۋىرجان قاليوللا، ايتىسكەر اقىن، ق ر مادەنيەت قايراتكەرى بەكارىس شويبەكوۆ بولدى.
ايتىستىڭ قورىتىندىسىندا ءادىل قازىلار شەشىمىمەن ەركەبۇلان قاينازاروۆ «التىن دومبىرا» سىيلىعىنىڭ يەگەرى اتاندى. سونداي-اق، 3 ميلليون تەڭگەگە يە بولدى.
رۇستەم قايىرتاي ۇلى جۇلدەلى 1- ورىندى، ءبىرجان بايتۋوۆ پەن شۇعايىپ سەزىمحان Ⅱ ورىندى (1 ميلليون)، تالعات مىقي مەن حازرەت بەردىحان جانە ءمولدىر ايتباي قىزى Ⅲ ورىندى (750 مىڭ) يەلەندى. «التىن دومبىرانىڭ» 500 مىڭ تەڭگەلىك ارنايى جۇلدەسى نۇرلان ەسەنقۇلوۆقا، ارعىنبەك قالبايەۆقا، قاليجان ءبىلداشقا بۇيىردى. وزگە دە ايتىسقا قاتىسۋشى اقىندارعا 300 مىڭ تەڭگەدەن تابىستالدى.
ايتا كەتەيىك، كەشە تۇركىستاندا «التىن دومبىرا» رەسپۋبليكالىق ايتىسى باستالعان بولاتىن. مادەنيەت جانە سپورت مينيسترلىگى مەن «AMANAT» پارتياسى بىرلەسە ۇيىمداستىرعان ايتىسقا 18 اقىن قاتىستى.
