قاتار-2022: ارگەنتينا ءوز توبىنان ءبىرىنشى ورىنمەن پلەي-وفقا ءوتتى

بۇل توپتا پولشادا 4، ارگەنتينا مەن ساۋد ارابياسىندا 3، مەكسيكا قورجىنىندا 1 ۇپاي بار ەدى.

سوندىقتان پلەي-وفف كەزەڭىنە ءوتۋ ءۇشىن ءۇشىنشى تۋر قاي كوماندا ءۇشىن دە اسا ماڭىزدى ەدى.

ارگەنتينانى ليونەل مەسسي باستاسا، پولشا قۇرامىندا روبەرت ليەۆاندوۆسكيدەي سۇرمەرگەن بار-دى.

پولياكتارعا تەڭ ويىن جەتكىلىكتى بولسا، ارگەنتينالىقتارعا جەڭىس اۋاداي قاجەت ەدى. ءبىرىنشى تايمدا نيدەرلاندىلىق تورەشى دانني ماككەلي پولشا قاقپاشىسى ۆويتسەح شەنسنى مەسسيگە قارسى ءتارتىپ بۇزدى دەپ ەسەپتەپ، 11 مەترلىك ايىپ دوبىن بەلگىلەدى. ءبىراق ۆويتسەح شەنسنى ساۋد ارابياسىمەن وتكەن كەزدەسۋدەگىدەي ەرلىك جاساپ، بۇل جولى 39-مينۋتتا مەسسيدىڭ سوققىسىن قايتارا ءبىلدى.

ەكىنشى كەزەڭ باستالىسىمەن، وڭ قاناتتا ادەمى ۇيىمداستىرىلعان شابۋىلدان كەيىن ناۋەل مولينادان پاس العان ارگەنتينالىق الەكسيس ماكالليستەر 46-مينۋتتا ەسەپ اشتى - 1:0. وڭتۇستىك امەريكالىقتار مۇنىمەن توقتاعان جوق. 68-مينۋتتا ەنسو فەرناندەستەن پاس العان حۋليان الۆارەس توعىزدىقتى ءدال كوزدەدى - 2:0.

وسىلايشا، س توبىندا 6 ۇپاي جيناعان ارگەنتينا ءبىرىنشى ورىنعا يە بولدى. ليونەل سكالونيدىڭ شاكىرتتەرى 1/8 فينالدا اۋستراليانى سىناپ كورەدى.

جەڭىلىپ قالعانىنا قاراماستان، پولشا قۇراماسى دا كەلەسى كەزەڭگە ءوتتى. پولياكتار فرانسيامەن شەبەرلىك بايقاسادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى