قازاقستاندا «ايبالتا-2022» ستراتەگيالىق كوماندالىق- شتابتىق وقۋ- جاتتىعۋى ءوتىپ جاتىر
ق ر قورعانىس مينيسترلىگىنىڭ حابارلاۋىنشا، ءبىرىنشى كەزەڭدە باس قولباسشىلار مەن قولباسشىلاردىڭ باسشىلىعىمەن سوعىس ۋاقىتىندا اسكەرلەردى قولدانۋدىڭ وقۋ جوسپارلارى ناقتىلاندى. اۋماقتىق قورعانىس بولىمشەلەرىنىڭ قاتىسۋىمەن اسكەري مىندەتتىلەردى شاقىرۋ ارقىلى جۇمىلدىرۋ جانە تاكتيكالىق- ارنايى وقۋ- جاتتىعۋلارى وتكىزىلىپ، ۆەدومستۆوارالىق ءوزارا ءىس- قيمىل ماسەلەلەرى پىسىقتالدى.
2022 -جىلعى 26- قىركۇيەك پەن 8- قازان ارالىعىنا جوسپارلانعان ەكىنشى كەزەڭدە «ايبالتا-2022» ستراتەگيالىق وقۋ- جاتتىعۋى شەڭبەرىندە قازاقستاندا ءبىرقاتار جەدەل- تاكتيكالىق، تاكتيكالىق، تاكتيكالىق- ارنايى، ۇشۋ- تاكتيكالىق جانە ارنايى وقۋ- جاتتىعۋلارى وتكىزىلەدى. باس قولباسشىلار مەن قولباسشىلار قابىلداعان شەشىمدەردىڭ نەگىزىندە ءبىرىنشى كەزەڭ بارىسىندا اسكەرلەر وقۋ- جاۋىنگەرلىك تاپسىرمالاردى ورىنداۋى قاجەت.
ونىڭ ىشىندە ۇجىمدىق قاۋىپسىزدىك تۋرالى شارت ۇيىمىنىڭ «ءوزارا ءىس- قيمىل»، «ىزدەۋ» جانە «ەشەلون» وقۋ- جاتتىعۋلارى دا بار. بۇل بىرلەسكەن مانيەۆرلەر ۇ ق ش ۇ- نىڭ قورعانىس مينيسترلەرى كەڭەسى مەن قاۋىپسىزدىك كەڭەستەرى حاتشىلارى كوميتەتىنىڭ 2018 -جىلعى 8 -قاراشاداعى شەشىمىنە سايكەس، ۇيىمعا مۇشە ەلدەردىڭ ءبىرىنىڭ اۋماعىندا جىل سايىن وتكىزىلىپ تۇرادى.
«ەشەلون-2022» ارنايى وقۋ- جاتتىعۋىندا اسكەرلەردى ماتەريالدىق- تەحنيكالىق قامتاماسىز ەتۋ ماسەلەلەرى پىسىقتالاتىن بولادى. وقۋ- جاتتىعۋدىڭ ءبىرقاتار ەلەمەنتتەرىنىڭ جۇمىس ىستەۋى، وعان قوسا تەمىرجول كولىگىمەن تاسىمالداۋ، جانار- جاعارماي قۇيۋ جانە وق- دارىلەردى جەتكىزۋ، دالا جاعدايىندا قارۋ- جاراق پەن تەحنيكانى جوندەۋ، زاتتاي، ازىق- تۇلىك جانە مەديتسينالىق قامتاماسىز ەتۋ ۇيىمداستىرىلادى.
«ىزدەۋ-2022» ارنايى وقۋ- جاتتىعۋى ۇيىمعا مۇشە مەملەكەتتەر بارلاۋ ورگاندارىنىڭ كۇشتەرى مەن قۇرالدارىمەن بارلاۋدى ۇيىمداستىرۋ جانە جۇرگىزۋ بويىنشا وقۋ- جاۋىنگەرلىك مىندەتتەردى ورىنداۋعا باعىتتالعان.
«ءوزارا ءىس- قيمىل-2022» كوماندالىق- شتابتىق وقۋ- جاتتىعۋى ۇجىمدىق قاۋىپسىزدىكتىڭ ورتالىق ازيا وڭىرىندەگى قارۋلى قاقتىعىستى وقشاۋلاۋ بويىنشا بىرلەسكەن وپەراتسيالارىن دايىنداۋ مەن ولاردى وتكىزۋ ماسەلەلەرىن پىسىقتاۋدى كوزدەيدى.
رەداكتور
ايدار وسپاناليەۆ
