وليمپيادا-2022: قازاقستان قاي سپورتشىلارعا ەرەكشە ءۇمىت ارتادى
بۇل تۋرالى ق ر مادەنيەت جانە سپورت مينيسترلىگىنىڭ باسپا ءسوز قىزمەتى جاريالادى، دەپ حابارلايدى قازاقپارات ءتىلشىسى.
«ەگەمەن قازاقستان ءۇشىن العاشقى قىسقى وليمپيادا - 1994 -جىلعى ليللەحاممەردەگى ويىندار بولدى. بەيجىڭ وليمپياداسى تاۋەلسىزدىكتىڭ 30 جىلىنداعى 8-وليمپيادا بولماق. تاۋەلسىز قازاقستاننىڭ سپورت تاريحىندا قىسقى وليمپيادالاردا 1 التىن، 3 كۇمىس جانە 4 قولا مەدال قورجىنعا تۇسكەن. ونىڭ ىشىندە، قىسقى وليمپيادانىڭ ءبىرىنشى جانە جالعىز قازاقستاندىق چەمپيونى - ۆلاديمير سميرنوۆ. سونداي-اق، قىسقى وليمپيادا جۇلدەگەرلەرى ليۋدميلا پروكاشيەۆا، ەلەنا حرۋستاليەۆا، دەنيس تەن جانە فريستايل - موگۋلدان قۇراما جەتەكشىسى يۋليا گالىشەۆانىڭ قوسقان ۇلەسىن اتاپ وتكەن ءجون»، - دەلىنگەن حابارلامادا.
بيىلعى XXIV قىسقى وليمپياداعا الەمنىڭ 95 ەلىنەن ءۇش مىڭنان استام سپورتشى قاتىسادى دەپ كۇتىلۋدە. جارىس باعدارلاماسىنا سايكەس، سپورتتىڭ 15 ءتۇرى بويىنشا 109 مەدال ساراپقا سالىنادى. قازاقستاننىڭ وليمپيادالىق قۇراماسىنىڭ اتىنان ابزال اجىعالييەۆ پەن ەكاتەرينا ايدوۆا تۋ كوتەرىپ شىعادى. قۇراماداعى ەڭ ۇلكەن سپورتشى - 35 جاستاعى شاڭعىشى ەۆگەني ۆەليچكو بولسا، ەڭ كىشىسى - فريستايل- موگۋلدا ويىن كورسەتەتىن 16 جاسار اناستاسيا گورودكو، ول 2021 -جىلعى الەم چەمپيوناتىنىڭ قولا جۇلدەگەرى اتانعان.
«وليمپيادا ويىندارىنداعى ەڭ تاجىريبەلى توپ - فريستايل- موگۋل كومانداسى. يۋليا گالىشەۆا بۇل سپورت تۇرىنەن 2018 -جىلعى وليمپيادادا «قولا» جەڭىپ الدى. بيىل ول ءتورتىنشى رەت سپورت ويىندارىنا قاتىسقالى وتىر. دميتري رەيحەرد - ازيا ويىندارى مەن ۋنيۆەرسيادا چەمپيونى، ول دا ءتورتىنشى رەت سىنعا تۇسەدى. پاۆەل كولماكوۆ - الەم كۋبوگى كەزەڭدەرىنىڭ جۇلدەگەرى، ول ءوز مانسابىندا ءۇشىنشى رەت قاتىسادى. سونداي-اق، شورت-ترەك كومانداسىندا مىقتى قۇرام بار. وندا الەم كۋبوگى كەزەڭىنىڭ چەمپيونى ابزال اجىعاليەۆ، الەم كۋبوگى كەزەڭدەرىنىڭ جۇلدەگەرى دەنيس نيكيشا بار. ەكاتەرينا ايدوۆا دا قازاقستان قۇراماسىنىڭ تاجىريبەلى سپورتشىلارىنىڭ ءبىرى، ول جاسوسپىرىمدەر اراسىنداعى الەم چەمپيونى (2010) اتانعان»، - دەپ حابارلايدى مينيسترلىكتىڭ باسپا ءسوز قىزمەتى.
ايتا كەتەيىك، بەيجىڭدەگى XXIV قىسقى وليمپيادا ويىندارى 4-20-اقپان ارالىعىندا وتەدى. اق وليمپيادادا ەلىمىزدىڭ نامىسىن 34 سپورتشى قورعايدى.
اۆتور: ايجان سەرىكجان قىزى
