ءۇي الۋعا 2022-جىلى بولاتىن يپوتەكالىق باعدارلامالار
تۇرعىن ءۇي ساراپشىسى نۇرسەيىت مۇراتوۆ Tengrinews.kz-گە قازاقستاندىقتار بيىل تاعى قانداي يپوتەكالىق باعدارلامالارعا قاتىسا الاتىنىن جانە ولاردىڭ شارتتارى مەن تالاپتارىن ايتتى.
نارىقتان ءۇي الۋ بويىنشا 50/50 باعدارلاماسى كوپ بانكتە بار. ايتالىق، وتباسى بانكىندە پاتەر اقىسىنىڭ جارتىسىن جيناپ، ەڭ تومەنگى 5 پايىزبەن تابىسىن راستاماي، يپوتەكا الۋعا بولادى. ءبىراق ول ءۇشىن بىرنەشە تالاپقا ساي بولۋ قاجەت:
• وتباسى بانكىندە مىندەتتى تۇردە دەپوزيت بولۋى شارت؛
• ءۇش جىلدا اقشانىڭ 50 پايىزىن جيناپ، باعالاۋ كورسەتكىشى 16 عا تولۋى كەرەك. ول ءۇشىن ءۇش جىل بويى اي سايىن بەلگىلى ءبىر مولشەردە اقشا سالىپ وتىرۋ قاجەت.
نۇرسەيىت مۇراتوۆتىڭ سوزىنشە، قازىرگى تاڭدا كوپ ادامنىڭ ايلىق تابىسى جەتپەي، يپوتەكا الا الماي ءجۇر. سول ءۇشىن ادام ەرىنبەي ءوز بولاشاعى ءۇشىن اقشانى الدىن الا جيناي بەرگەنى ءجون. ال دەپوزيتى جوق ادامدار پاتەر سوماسىنىڭ 50 پايىزىن جيناپ، تابىسىن راستاۋ ارقىلى 7-8,5 پايىزبەن قيىندىقسىز ءۇي راسىمدەي الادى.
«كوپ بانكتە پاتەر اقىسىنىڭ 50 پايىزىن قۇيىپ، تابىستى راستاماي پاتەر الۋعا بولادى. مىسالى، التىن بانك، سبەربانك، Halyk بانكتە ستاندارت يپوتەكانىڭ پايىزدىق مولشەرلەمەسى 14 پايىزدان جوعارى بولادى. ال تابىسىن راستاۋسىز شامامەن 18 پايىز»، - دەيدى ول.
سونىمەن قاتار، ساراپشى وتباسى بانكىنە ۇقساس جەكە كومپانيالار مەن كووپەراتيۆتەر كوبەيىپ كەتكەنىن ەسكەرتتى. نۇرسەيىت مۇراتوۆ ەشقانداي كەپىل بەرمەيتىن ۇيىمدارعا سەنبەۋگە كەڭەس بەردى.
نۇرلى جەر
بۇل تۇرعىن ءۇي-كوممۋنالدىق دامۋدىڭ 2020-2025-جىلدارعا ارنالعان مەملەكەتتىك باعدارلاماسى. اكىمدىكتە ءۇي كەزەگىندە تۇرعان ادامدار قاتىسا الادى. ول بويىنشا پاتەر اقىسىنىڭ 10 پايىزىن جيناپ، 20 جىلعا دەيىن يپوتەكا راسىمدەۋگە بولادى. نەسيە مولشەرلەمەسى - 5 پايىز.
نۇرسەيىت مۇراتوۆ مەملەكەتتىك باعدارلامالاردىڭ شارتى ءجيى وزگەرىپ تۇراتىنىن ايتتى، سول سەبەپتەن ءۇي الاردا مىندەتتى تۇردە كەڭەسشىمەن جۇمىس ىستەگەن ءجون ەكەن.
«بۇل باعدارلاما بويىنشا قايتالاما نارىقتان ءۇي الا المايسىڭ، تەك ساتىلىمعا جاڭادان قويىلعان نەمەسە سالىنىپ جاتقان ۇيلەردى الۋعا بولادى. تابىستى مىندەتتى تۇردە راستاۋ كەرەك. قازىرگى ۋاقىتتا ادام باسىنا تابىس 133 مىڭ تەڭگەدەن اسپاۋى كەرەك. مىسالى جانۇيادا ءتورت ادام بولسا، وتباسى تابىسى 532 مىڭنان اسپاۋى كەرەك»، - دەپ ءتۇسىندىردى مامان.
«باقىتتى وتباسى» باعدارلاماسى
باقىتتى وتباسى - تابىسى تومەن وتباسىلارعا تۇرعىن ءۇي ساتىپ الۋعا ارنالعان نەسيەلەندىرۋ باعدارلاماسى. بۇل باعدارلاما بويىنشا اكىمدىكتە باسپاناعا مۇقتاج تۇلعا رەتىندە كەزەكتە تۇرعان ادامدار ءۇي الا الادى، ولار:
• كوپبالالى وتباسى (كەم دەگەندە 4 بالا)
• تولىق ەمەس وتباسى (اجىراسقانىنا 3 جىلدان اسۋى كەرەك)
• مۇمكىندىگى شەكتەۋلى بالاسى بار وتباسى (مۇگەدەكتىكتىڭ كەز كەلگەن توبى).
ول بويىنشا جاڭا سالىنعان ۇيدەن جاڭا پاتەر، قولدانىستا بولعان پاتەر مەن جەر ءۇي ساتىپ الۋعا بولادى.
«باعدارلاما بويىنشا زاەم مولشەرلەمەسى جىلدىق 2 پايىز. ەڭ تومەنگى باستاپقى جارنا 10 پايىز. زاەم مەرزىمى 20 جىلعا دەيىن. ونىڭ سوماسى نۇر-سۇلتان، الماتى، شىمكەنت، اقتاۋ، اتىراۋ قالالارىندا 15 ميلليون تەڭگەگە دەيىن. باسقا ايماقتاردا 10 ميلليون تەڭگەگە دەيىن. تۇرعىن ءۇيدى اكىمدىكتە كەزەكتە تۇرعان ايماقتا عانا ساتىپ الۋعا بولادى»، - دەيدى نۇرسەيىت مۇراتوۆ.
تابىس قانداي بولۋى كەرەك؟
وتباسىنىڭ ءاربىر مۇشەسىنە كەلەتىن سوڭعى التى ايداعى تابىس ءتيىستى قارجى جىلىنا ارنالعان رەسپۋبليكالىق بيۋجەت تۋرالى زاڭمەن بەكىتىلگەن ەڭ تومەن كۇنكورىس دەڭگەيىنىڭ 3,1 ەسەلەنگەن شاماسىنان اسپاۋعا ءتيىس، ياعني قازىر وتباسىلىق تابىس مولشەرى ادام باسىنا شاققاندا 111655 تەڭگەدەن اسپاۋى كەرەك.
كىرىس رەتىندە نە ەسكەرىلەدى؟
نەگىزگى كىرىسكە ەڭبەك جانە/نەمەسە كاسىپكەرلىك قىزمەتتەن تۇسەتىن تابىس جاتادى. ءسىزدىڭ نەگىزگى كىرىسىڭىز جەتكىلىكسىز بولىپ جاتسا، قوسىمشا تابىستى قوسىپ ەسەپتەي الاسىز.
نەگىزگى كىرىسكە جاتاتىندار:
ايلىق جالاقى. جەكە كاسىپكەرلىكتەن تۇسەتىن كىرىس. وتەۋلى قىزمەت كورسەتۋ شارتى بويىنشا تۇسەتىن تابىس. تۇرعىن ءۇي تولەمدەرى. شاكىرتاقى (نەگىزگى كىرىس بولعان جاعدايدا).
قوسىمشا كىرىسكە جاتاتىندار:
زەينەتاقى اۋدارىمدارى، ەكولوگيالىق تولەمدەر. وزگە جاردەماقىلار كىرىس رەتىندە ەسەپتەلمەيدى.
«ۇماي» ايەلدەر يپوتەكاسى
«ۇماي» يپوتەكاسىن تەك ايەلدەر الا الادى، سەبەبى، نۇرسەيىت مۇراتوۆتىڭ ايتۋىنشا، ستاتيستيكا بويىنشا، 35 جاستان اسقان ايەلدەر يپوتەكانى كوپ راسىمدەيدى جانە ولار جاۋاپكەرشىلىكپەن قارايتىندار ساناتىنا جاتادى.
بۇل يپوتەكانىڭ نەگىزى شارتتارى:
• وتباسى تابىسى 320 مىڭنان اسپاۋى كەرەك
• العاشقى جارنا 0 دەن 20 پايىزعا دەيىن، ول تابىس كوزى مەن تاڭدالعان ءۇيدىڭ باعالانۋىنا بايلانىستى
• زاەم 13 جىلعا دەيىن بەرىلەدى
• جىلدىق پايىزدىق مولشەرلەمە - 12 پايىز (قازىرگى ۋاقىتتا وزگەرۋى مۇمكىن)
• ەكى نارىقتان دا ءۇي قاراسىترۋعا بولادى
• تابىس كوزى سوڭعى 6 ايعا راستالۋى كەرەك
ماماننىڭ ايتۋىنشا، وتباسى بانكىندەگى پايىزدىق مولشەرلەمەسى ەڭ جوعارى باعدارلاما وسى. الايدا تالاپتارى بويىنشا وزگە بانكتەرمەن سالىستىرعاندا جىلدىق پايىزى از.
7-20-25 مەملەكەتتىك باعدارلاماسى
7-20-25 - قازاقستان رەسپۋبليكاسىنىڭ ازاماتتارىنا ارنالعان الەۋمەتتىك باعدارلاما، ول تۇرعىن ءۇي جاعدايىن جاقسارتۋ ءۇشىن ەلباسى تاپسىرماسى اياسىندا ازىرلەنگەن.
7-20-25 باعدارلاماسىنىڭ وپەراتورى - «قازاقستاننىڭ ورنىقتىلىق قورى» ا ق. بۇل باعدارلاما اياسىندا نەسيە الامىن دەۋشىلەر قورمەن ىنتىماقتاستىق تۋرالى كەلىسىمى بار سەرىكتەس- بانكتەرگە جۇگىنۋى ءتيىس.
«7-20-25 باعدارلاماسىنىڭ نەسيە بويىنشا پايىزدىق مولشەرلەمەسى - 7,2 پايىز. باستاپقى جارنا مولشەرى تۇرعىن ءۇي قۇنىنىڭ 20 پايىزى جانە ودان جوعارى مولشەرىندە بەلگىلەنەدى. باعدارلامامەن نۇر-سۇلتان، الماتى (شەكارالاس ايماقتاردى قوسا العاندا)، اقتاۋ، اتىراۋ، شىمكەنت قالالارىندا 25 ميلليون تەڭگەگە دەيىن تۇرعىن ءۇي قاراستىرۋعا بولادى، ال قاراعاندى قالاسى ءۇشىن 20 ميلليون تەڭگە جانە باسقا وڭىرلەر ءۇشىن 15 ميلليون تەڭگە. قارىزدى وتەۋ مەرزىمى 25 جىلعا دەيىن ۇلعايتىلدى. قارىز الۋشىدان قارىزدى بەرۋ جانە قىزمەت كورسەتۋ ءۇشىن كوميسسيا الىنبايدى»، - دەيدى ساراپشى.
جەكە تۇلعا 7-20-25 باعدارلاماسى بويىنشا قارىز الۋ ءۇشىن مىناداي تالاپتارعا سايكەس كەلۋگە ءتيىس:
• قازاقستان رەسپۋبليكاسىنىڭ ازاماتتىعى؛
• قازاقستان رەسپۋبليكاسىنىڭ اۋماعىندا مەنشىك قۇقىعىنداعى تۇرعىن ءۇيىنىڭ بولماۋى؛
• راستالعان ەڭبەك جانە (نەمەسە) كاسىپكەرلىك قىزمەتتەن الىناتىن كىرىسىنىڭ بولۋى؛
• يپوتەكالىق كرەديتتەرىنىڭ بولماۋى.
«الماتى جاستارى»، «ەلوردا جاستارى» جانە «اسكەري باسپانا»
مامان 35 جاسقا دەيىنگى جاستارعا ارنالعان «الماتى جاستارى» جانە «ەلوردا جاستارى» جەڭىلدەتىلگەن نەسيە بەرۋ باعدارلامالارى بيىل دا اشىلاتىنىن ايتتى. كونكۋرس ارقىلى وتەتىن بۇل باعدارلامالاردىڭ ازىرگە تالاپتارى بەلگىسىز ەكەن. ال «اسكەري باسپانا» باعدارلاماسى بيۋجەتتەن اقشا بولىنگەنىنە قاراي جىلىنا 1-2 رەت وتەدى.
ءۇي الۋعا العاشقى جارناسى جوق ادامدار نە ىستەيدى؟
نۇرسەيىت مۇراتوۆتىڭ سوزىنشە جىلجىمايتىن مۇلكىڭدى كەپىلگە قويىپ تا تۇرعىن ءۇي الۋعا بولادى.
«العاشقى جارنا بولماسا، ءوز ءۇيىن قوسىمشا كەپىلگە قويىپ، يپوتەكا الۋعا مۇمكىندىك بەرەتىن بىرنەشە بانك بار. مىسالى، Halyk بانكىندە مۇلكىڭىزدى كەپىلگە قويىپ 13 پايىزبەن جاڭا جانە قايتالاما نارىقتان ءۇي الا الاسىز. ءبىراق تابىس كوزىن مىندەتتى تۇردە راستاۋ كەرەك. سوسىن تابىستىڭ شامامەن 40 پايىزى عانا يپوتەكا جابۋعا ارنالۋى كەرەك»، - دەيدى ول.
جالدامالى پاتەر اقىسىنىڭ 50 پايىزىن مەملەكەت تولەيدى
جاقىندا يندۋستريا جانە ينفراقۇرىلىمدىق دامۋ مينيسترلىگى الەۋمەتتىك وسال توپتارعا جالعا الىپ وتىرعان تۇرعىن ءۇيىنىڭ 50 پايىزىن ۇكىمەت تولەيتىندەي كومەك تەتىگىن ازىرلەدى. ياعني جالعا الۋ قۇنىنىڭ 50 پايىزىن مەملەكەت، قالعان 50 پايىزىن جالعا الۋشى تولەيدى. جەكە تۇرعىن ءۇي قورىنان باسپانانى جالعا العانى ءۇشىن بەرىلەتىن تولەمدى تابىسى ءبىر ەڭ تومەنگى كۇنكورىس دەڭگەيىنەن، ياعني 36018 تەڭگەدەن تومەن، جەرگىلىكتى اتقارۋشى ورگانداردا كەزەكتە تۇرعان ازاماتتارعا بەرۋ ۇسىنىلدى.
ولار:
• كوپ بالالى وتباسىلار،
• 1 جانە 2 توپتاعى مۇگەدەكتەر جانە مۇمكىندىگى شەكتەۋلى بالا اسىراپ وتىرعاندار
• اتا-اناسىنىڭ قامقورلىعىنسىز قالعان بالالار جاتادى.
• جالدامالى پاتەر اقىسىنىڭ 50 پايىزىن مەملەكەت تولەيدى: توپ-7 سۇراققا جاۋاپ
باعدارلاما 2022-جىلدىڭ مامىرىنان باستاپ جۇزەگە اسادى. وپەراتور - وتباسى بانك.
الاياقتارعا سان سوقتىرماۋدىڭ قانداي جولى بار؟
تۇرعىن ءۇي ساراپشىسى نۇرسەيىت مۇراتوۆتىڭ سوزىنشە، كوپ ادام دەلدالدارعا سەنىپ، اقشا بەرىپ الدانىپ، سان سوعىپ قالادى. وسىندايدى بولدىرماۋ ءۇشىن وتباسى بانكىندە كەڭەسشىلەر جەلىسى جۇمىس ىستەيدى ەكەن. ماماننىڭ سوزىنشە، ولار ادام دەپوزيت اشقاننان باستاپ ءۇي العانعا دەيىن جەتەلەپ، كەز كەلگەن وزگەرىستەر بويىنشا كومەك كورسەتىپ، كەڭەس بەرەدى.
«وتباسى بانكىنىڭ» كەڭەسشىلەرى رەسمي دەلدال دەۋگە بولادى. ولار كليەنتتەردەن اقشا المايدى. الماتىنىڭ وزىندە 200 گە جۋىق كەڭەسشى بار. وزگە جەكە بانكتەردە دە ءوز كەڭەسشىلەرى بولادى، ولاردان ونلاين نەمەسە بولىمشەگە بارىپ ويىڭىزداعى بارلىق سۇراقتى قويىپ الۋعا بولادى. جالپى كەڭەسىم، كليەنتتەر ەكى-ءۇش بانكتى ارالاپ، تولىق اناليز جاساپ، جەكە كەڭەسشىلەرمەن اقىلداسىپ بارىپ ءۇي العانى دۇرىس. ولاردان قالاي الدانىپ قالماۋ كەرەگىن، قانداي قۇرىلىس كومپانياسىن تاڭداۋ كەرەگىن سۇراستىرعان ابزال»، - دەيدى مامان.
نۇرسەيىت مۇراتوۆ اقشاعا ونلاين ساباقتار وتكىزىپ جۇرگەن بلوگەرلەردىڭ ايتاتىنىن كەڭەسشىلەر تەگىن تۇسىندىرەتىنىن ايتتى.
«ءۇي ماسەلەسىنە جەڭىل قاراۋعا بولمايدى. جولىن بىلسە ەشكىمگە اقشا بەرۋدىڭ قاجەتى جوق. بارلىق جەردە باسەكە جوعارى. بانكتەر كليەنتتەرگە بار جاعدايدى جاساعان، ونلاين-وفلاين»، - دەپ قوستى ول.
ءۇيدى ءتيىمدى الۋدىڭ جولى قانداي؟
مامان تۇرعىن ءۇي الۋدى 40-50 جاستا ەمەس، 20 جاستان باستاپ ويلانۋ كەرەگىن ايتتى.
«جاستار تابىس تابا باستاعان كۇننەن باستاپ وتباسى بانكىنەن دەپوزيت اشىپ، سول جەرگە تابىسىنىڭ 10-20 پايىزىن سالىپ ۇيرەنۋى كەرەك. مەملەكەتتىك قىزمەتكە كىرگەندە التى ايدان كەيىن كەزەككە تۇرىپ، اقشا جيناي بەرسىن. بىزدە كوپ ادام ءجۇرىپ-ءجۇرىپ ۋاقىت وزدىرىپ الادى، ءۇي الۋ كەرەك كەزدە 18 پايىزبەن ستاندارت يپوتەكا الا سالادى. ونى تولەۋدىڭ ءوزى وڭاي ەمەس، بانكتەر بىرگە ءبىر قوسىپ بەرەدى. سۋدىڭ دا سۇراۋى بار. تەگىن بەرگەندەي ءۇي العانعا قۋانىپ، ەرتەڭ تولەي الماي وتباسى اجىراسىپ جاتقان جاعدايلار بار. سول سەبەپتى جوسپار قۇرىپ، الدىن الا ويلانعان دۇرىس»، - دەدى ول.
massaget.kz
