فۋتبولدان ءا چ-2022: قازاقستان قۇراماسى ۋكراينادان ەسە قايتارا الا ما؟
ايتا كەتەيىك، قازاقستاندىق قۇراما ىرىكتەۋ ساتىسىندا D توبىندا سىنعا تۇسەدى. قارسىلاستارى - فرانسيا، ۋكراينا، بوسنيا جانە گەرتسوگوۆينا، فينليانديا. العاشقى تۋردا ۋكراينا سىرت الاڭدا فرانسيامەن، ودان كەيىن ءوز الاڭىندا فينليانديامەن 1:1 ەسەبىمەن تەڭ وينادى. ال قازاقستان ءبىرىنشى تۋرعا قاتىسقان جوق.
ال ەكىنشى تۋردا ءوز الاڭىندا فرانسيادان 0:2 ەسەبىمەن جەڭىلىپ قالدى. FIFA جاريالاعان سوڭعى رەيتينگتە فرانسيا 24-ورىندا تۇر. ال قازاقستان وندا 122-ورىندا كەلەدى.
قازاقستان مەن ۋكراينا قۇراماسى بۇعان دەيىن ءتورت مارتە كەزدەستى. ولاردىڭ بارلىعىندا قارسىلاسىمىزدىڭ مەرەيى ۇستەم بولدى. ەكى قۇراما الدىمەن 2006-جىلعى الەم چەمپيوناتىنا ىرىكتەۋ ساتىسىندا جولىقتى. 2004-جىلدىڭ 8- قىركۇيەگىندە الماتىدا وتكەن ويىندا الدىمەن ۋكرايندار ساپىنان الەكسەي بەليك 14-مينۋتتا ەسەپ اشتى. ودان كەيىن 34-مينۋتتا قازاقستاندىق اندرەي كارپوۆيچ تارازى باسىن تەڭەستىردى. جەڭىس گولىن رۋسلان روتان 90-مينۋتتا سوعىپ، ۋكراينا قۇراماسى 2:1 ەسەبىمەن جەڭىسكە جەتتى.
ودان كەيىن قوس قۇراما 2005-جىلدىڭ 4- ماۋسىمىندا كيەۆتە تاعى ءبىر مارتە شەبەرلىك بايقاستى. بۇل جولى ۋكراينا قۇراماسىنىڭ قازىرگى باس باپكەرى اندرەي شيەۆچەنكو 18-مينۋتتا ەسەپ اشسا، 83-مينۋتتا قازاقستاندىق يگور اۆدەيەۆ ءوز قاقپاسىنا گول سوعىپ الدى.
وسىلايشا ۋكرايندار 2:0 ەسەبىمەن باسىم ءتۇستى. قۇرامالار 2010-جىلعى الەم چەمپيوناتىندا تاعى ءبىر توپقا ءتۇستى. 2008-جىلى 10- قىركۇيەكتە الماتىدا وتكەن كەزدەسۋدە ۋكراينالىق فۋتبولشىلار 3:1 ەسەبىمەن جەڭىپ كەتتى. بۇل ويىندا ولاردىڭ ساپىنان يۋريي نازارەنكو 45، 80، اندرەي شيەۆچەنكو 54-مينۋتتاردا مەرگەندىك تانىتسا، وعان 68-مينۋتتا قازاقستاندىق سەرگەي وستاپەنكو ءبىر گولمەن جاۋاپ قايىردى.
2010-جىلدىڭ 10- ماۋسىمىندا قازاقستاندىقتار اتالعان قارسىلاسىنا 1:2 ەسەبىمەن جول بەردى. بۇل ويىندا قازاقستاندىق تاڭات نوسەربايەۆ 19-مينۋتتا ەسەپ اشتى. الايدا، ودان كەيىن قازاقستاندىق قۇراما قاقپاسىنا ۋكراينالىق يۋري نازارەنكو 33، 47-مينۋتتا ەكى گول سوعىپ كەتتى. وسىلايشا ءتورت ويىن بويى قازاقستاندىق قۇراما اتالعان قارسىلاسىنان ەسە قايتارا الماي كەلەدى.
قازاقستان مەن ۋكراينا قۇرامالارى اراسىنداعى كەزدەسۋ ەلوردا ۋاقىتىمەن 00.35 تە باستالىپ، «Qazsport» تەلەارناسىنان تىكەلەي ەفيردە كورسەتىلەدى.
اتالعان ويىندا سلوۆەنيالىق ماتەي يۋگ باس تورەشى قىزمەتىن اتقارادى. وعان سول ەلدەن كەلگەن ماتەي جۋنيچ پەن گرەگا كوردەج كومەكشى بولادى. قوسالقى تورەشى دە - سلوۆەنيالىق سلاۆكو ۆينچيچ. سونداي-اق، بۇگىن ەلوردا ۋاقىتىمەن 00.45 تە بوسنيا جانە گەرتسوگوۆينا ءوز الاڭىندا فرانسيانى قابىلدايدى.
