الماتى مەن بەيجىڭ: بۇگىن 2022-جىلعى قىسقى وليمپيادا قاي قالادا وتەتىنىن بەلگىلى بولادى

مالايزيانىڭ كۋالا-لۋمپۋر قالاسىندا ح و ك 2022-جىلعى قىسقى وليمپيادا ويىندارىن وتكىزۋگە الماتى مەن بەيجىڭنىڭ قايسىسى لايىق ەكەنى انىقتالاتىن بولادى. ح و ك مۇشەلەرىنىڭ تاڭداۋى الماتىعا تۇسە مە، الدە قىتاي استاناسى بەيجىڭگە تۇسە مە، ونى بارشا قازاقستاندىقتار «Kazsport» تەلەارناسىنان تىكەلەي ەفيردە كورە الادى.

31- شىلدە كۇنى ساعات 15:00 دە الماتىداعى اباي الاڭىندا كۋالا-لۋمپۋردا وتەتىن حالىقارالىق وليمپيادا كوميتەتىنىڭ سەسسياسىنان تىكەلەي كورسەتىلىم ۇيىمداستىرىلادى. قالا تۇرعىندارى مەن قوناقتارى اتالعان ۋاقىتتا الماتى كانديداتۋراسىن قولداۋ ءۇشىن الاڭعا جينالماق. ال الماتىنى قولداۋ ءۇشىن ەلىمىزدىڭ تانىمال كوپتەگەن سپورتشىلارى مالايزياعا اتتانىپ كەتتى. ولاردىڭ قاتارىندا بوكستان وليمپيادا چەمپيوندارى ەرماحان ىبىرايىموۆ، سەرىك ساپييەۆ جانە كونكيدەن الەم چەمپيونى دەنيس كۋزين، سوچيدەگى قىسقى وليمپيادانىڭ جۇلدەگەرى، مانەرلەپ سىرعاناۋشى دەنيس تەن، تانىمال ۆولەيبولشى سابينا التىنبەكوۆا جانە تاعى باسقا بەلگىلى سپورتشىلار بار.

ەسكە سالا كەتەيىك، الەمدىك ماڭىزعا يە ايتۋلى سپورت دوداسىن وتكىزۋ ءۇشىن اۋەل باستا الەمنىڭ ونشاقتى ەلى ءوز وتىنىشتەرىن بىلدىرگەن. الايدا، ۋاقىت وتە كەلە كوپشىلىگى وتىنىمدەرىن كەرى قايتارىپ الدى. سوڭىندا ەكى قالا - الماتى مەن قىتاي استاناسى بەيجىڭ قالالارى ۇمىتكەر رەتىندە قالدى.

قارسىلاسىمىز وسال قالا ەمەس ەكەنى ايتپاساق تا بەلگىلى. ولار 2008-جىلى جازعى وليمپيادا ويىندارىن وتكىزدى. جازعى وليمپيادا وتكىزۋگە مۇمكىندىگى بولعان ەلدىڭ قىسقى وليمپيادانى وتكىزۋگە دە قاۋقارى جەتەتىنى انىق. ءبىراق، الماتى دا بارلىق تالاپتارعا ساقاداي-ساي دەۋگە بولادى. ايتكەنمەن، باق شابا ما، باپ شابا ما، مۇنى ساناۋلى ساعاتتاردان كەيىن بىلەتىن بولامىز.

كۇنسۇلتان وتارباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى