الماتىدا 2022-جىلى وتەتىن اق وليمپيادانىڭ بيۋجەتى قىسقارتىلماق
بۇل حالىقارالىق وليمپيادا كوميتەتىنىڭ تەحنيكالىق كوميسسياسىنىڭ تەكسەرىسىنەن سوڭ جاسالعان. ماسەلەن، شىمبۇلاقتا ءوتۋى ءتيىس تاۋ-شاڭعى سپورت تۇرلەرىنىڭ بارلىعى الماتاۋ بازاسىنا، ال فريستايل مەن سنوۋبورد «تاۋ پاركتەن» اقبۇلاققا اۋىستىرىلماق.
وسىنداي وزگەرىس بولسا، اتالعان ەكى نىساندا كۇردەلى جوندەۋ جۇرگىزۋ قاجەت ەمەس. ماسەلەن، شىمبۇلاقتا تىلشىلەرگە ارنايى مەديا-ورتالىق سالىنباسا، 100 ميلليون دوللار ۇنەمدەلەدى ەكەن. الدىن الا ەسەپ بويىنشا تاعى 450 ميلليون دوللار سالىناتىن ينفراقۇرىلىمدار ازايعاندىقتان قورجىندا قالادى. پاراليمپيادا ويىندارىنىڭ كەستەسىنە وزگەرتۋ ەنگىزۋ ارقىلى سلەدج-حوككەي مۇز ارەناسىنان بالۋان شولاق سپورت سارايىنا اۋىستىرۋ كوزدەلىپ وتىر.
سونىمەن قاتار وليمپيادا قالاشىعىنداعى ورىن سانى 1 مىڭنان 350 گە دەيىن قىسقارتىلدى. ايتا كەتەيىك، 2022-جىلعى اق وليمپيادانى وتكىزۋگە الماتىمەن قاتار قىتايدىڭ بەيجىڭى دە ۇمىتتەنىپ وتىر.
«ءبىزدىڭ جوسپارىمىزدى كورسەتەتىن فايل حالىقارالىق كوميتەت كەڭسەسىنە جىبەرىلدى. ونىڭ ىشىندە ويىنداردىڭ شىعىنى مەن سپورت نىساندارىنىڭ اراسىنداعى قاشىقتىقتىڭ ازايعاندىعى كورسەتىلگەن. سوندىقتان ماۋسىم ايىندا شتاب-پاتەرگە ءوزىمىز بارىپ، تاعى ءبىر مارتە مالىمدەمە جاسايمىز»، - دەيدى الماتى قالالىق حالىقارالىق سپورت جوبالارى ديرەكسياسى مەملەكەتتىك قورىنىڭ ديرەكتورى يليا ورازاقوۆ.
