2021 -جىلى «پرەزيدەنتتىك جاستار كادرلىق رەزەرۆىنە» تاعى ءبىر كونكۋرستىق ىرىكتەۋ وتەدى
انار جايىلعانوۆا قاسىم- جومارت توقايەۆقا اگەنتتىك جۇمىسىنىڭ نەگىزگى باعىتتارى بويىنشا ەسەپ بەردى. اگەنتتىك باسشىسى اكىمشىلىك- مەملەكەتتىك قىزمەت باعىتىنداعى كادر ساياساتىن قالىپتاستىرۋ، مەملەكەتتىك قىزمەتشىلەردىڭ سالالىق زاڭناما مەن ەتيكالىق نورمالاردى ساقتاۋىن باقىلاۋ، سونداي- اق، مەملەكەتتىك قىزمەت كورسەتۋ ساپاسىنىڭ جاعدايى تۋرالى باياندادى. مەملەكەت باسشىسى «پرەزيدەنتتىك جاستار كادرلىق رەزەرۆى» بويىنشا جۇمىستى جالعاستىرۋدى، وعان ەنگەن ازاماتتاردىڭ جۇمىسپەن قامتىلۋىنا مونيتورينگ جۇرگىزۋ جانە رەزەرۆكە كىرۋ شارتتارىن رەتتەۋدى تاپسىردى. قاسىم- جومارت توقايەۆ 2021 -جىلى «پرەزيدەنتتىك جاستار كادرلىق رەزەرۆىنە» تاعى ءبىر كونكۋرستىق ىرىكتەۋدى وتكىزۋ جونىندە تاپسىرما بەردى. كونكۋرستى وتكىزۋ بارىسىندا مەملەكەتتىك ورگانداردىڭ قاجەتتىلىكتەرىن ەسكەرىپ، ىرىكتەلەتىن كانديداتتاردىڭ سانىن قىسقارتۋ كەرەك ەكەنىن ايتتى.
