2020 -جىلعى الەمدەگى ەڭ قىمبات نارسە انىقتالدى
ماسەلەن لاعىل تاس، مۇناي، گاز، جەردىڭ قازبا بايلىقتارى، اقشا ت. ب. بۇل ءتىزىمدى ءار قاراي جىپكە تىزگەندەي تىزبەكتەپ، جالعاستىرا بەرۋگە بولادى. الايدا 2020 -جىلى وسىعان دەيىنگى بولعان بارلىق قىمبات زاتتاردىڭ ورنى باسقا نارسە باستى. بۇل - اۋا.
جىلدىڭ باسىنان باستاپ بۇكىل الەم دابىل قاققان كوروناۆيرۋس ىندەتىنىڭ تارالۋى، ادام ءولىمىنىڭ كوبەيۋى دۇنيەجۇزىلىك دەڭگەيدە پاندەمياعا ۇلاستى. جاپپاي جۇقتىرىپ جاتقان ادامدار، ۆيرۋستان قازا بولعاندار سانى كۇن ساناپ ارتتى. بۇل قورقىنىشتى ءتۇس سەكىلدى الەم قازاقستاننىڭ دا باسىنا قارا بۇلت سەكىلدى ءۇيىرىلدى. بۇلت ءالى سەيىلگەن جوق.
الەم مۇناي دەپ، جەر ءۇشىن دەپ، بايلىق ءۇشىن دەپ تالاسىپ جاتقان كەزدە، ولارعا كەرەك تەك كۇندەلىكتى جۇتىپ جۇرگەن اۋاسى ەكەنى بەلگىلى بولدى. ميلليونداپ جيعان اقشاسىن ۇستاي الماي ءبىر كۇندە ومىرمەن قوشتاسقانداردىڭ اجال الدىنداعى ارمانى ءبىر جۇتىم اۋانى جۇتۋ ەدى. قادىرىنە ءوز كەزىندە جەتپەگەندەر قينالعان كەزدە كولىك تە، ءۇي دە، اقشا سۇراعان جوق، تەك «اۋا» دەپ جان بەردى.
بارلىعىن ساتىپ الۋعا بايلىعى جەتەتىن بايلارعا دا ءبىر جۇتىم اۋا بارىنەن قىمبات بولدى. كەدەي دەمەي، باي دەمەي اجالدىڭ قارماعىنا تۇسكەن كۇننەن باستاپ شىرماۋىنان شىعۋ ءۇشىن اقشا بەرە المادى، ساتىپ الا المادى. تەك سۇراعاندارى «اۋا» بولدى.
ءدال قازىر الەمدە بولعان جانە ءالى جالعاسىپ جاتقان پاندەميا (COVID 19) قۇندىلىقتاردىڭ ورىنىن اۋىستىرىپ، ناعىز بايلىقتىڭ نە ەكەنىن كورسەتتى. مۇنى جاس تا، كارى دە، حان دا، قارا دا ءتۇسىندى. تۇسىنبەسكە شارا بار ما، جانىنداعى جاقىنىن اۋاعا زار قىلعان دەرتتىڭ دەمدى قىسىپ، دەنەسىن قىزدىرىپ وتقا وراپ بارا جاتقانى جانعا باتتى.
الەم ۇلكەن ءۇزىلىس الدىندا تۇر. جۇتىپ جۇرگەن اۋاسىنا دا قۇرمەتپەن قارايتىن كۇنگە كەلدى. ءمان بەرمەيتىن، ۇمىتىپ كەتەتىن قاسيەتتەردى قايتا ەسىنە تۇسىرە باستادى. ادامنىڭ كۇنى اداممەن ەكەنىن سەزىندى.
الەمدەگى ەڭ قىمبات اۋا ءۇشىن ميلليونداپ ەمەس، ميللياردتاپ ەمەس، تريلليونداپ اقشا جۇمسالدى.
الەمدەگى ەڭ قىمبات اۋا ءۇشىن ءبىر ادام ەمەس، ءبىر قالا، ءبىر ايماق ەمەس، بۇكىل ءبىر مەملەكەت، بۇكىل دۇنيەجۇزى كۇرەستى.
الەمدەگى ەڭ قىمبات اۋا ءۇشىن ءبارىن تاستاپ، جەتپەي جاتقان ۋاقىتىن دا جەتكىزىپ، كورمەي جۇرگەن كوزىن دە اشىپ، ادامدار ءبىر-ءبىرىن ىزدەي باستادى. ساعىندى.
ىقىلىم زاماننان بەرى اۋانى تەگىپ جۇتىپ كەلگەن ادامزات ءبىر-اق كۇندە وعان قارىز ەكەنىن ەندى ءتۇسىندى.
