ەۋرو-2020-عا ىرىكتەۋ: قازاقستان- بەلگيا ماتچى تىكەلەي ەفيردەن كورسەتىلەدى

 «قازاقپارات» ح ا ا- نىڭ بريۋسسەلدەگى مەنشىكتى ءتىلشىسى كوماندالاردىڭ جاي- كۇيى، باپكەرلەردىڭ پىكىرلەرى، ولاردىڭ ويىنعا قۇرعان جوسپارلارى تۋرالى باياندايدى.

50 مىڭ جانكۇيەرگە ارنالعان كورول بودۋەن ستاديونىندا دەڭگەيلەرى كەرەعار ەكى كوماندا كەزدەسەدى. بەلگيا قۇراماسى ءوز توبىنداعى العاشقى ەكى ويىندا جەڭىسكە جەتىپ، ءۇشىنشى ويىنعا توپتىڭ كوشباسشىسى رەتىندە دايىندالىپ جاتىر. دەگەنمەن، «سويقانداردىڭ» باپكەرى روبەرتو مارتينەس قارسىلاسقا مەنسىنبەي قاراۋعا بولمايتىنىن ايتادى.

«ەكى ويىن وتكىزدىك، بۇل - التى ۇپاي. سپورتشىلاردىڭ بارلىعى دا بريۋسسەلدەگى فاناتتاردىڭ كوز الدىندا بولاتىن ويىننىڭ قانشالىقتى ماڭىزدى ەكەنىن بىلەد»، - دەيدى مارتينەس جەرگىلىكتى ب ا ق وكىلدەرىنە بەرگەن سۇحباتىندا.

قازاقستاننىڭ باس باپكەرى ميحال بيلەك «ب» جوسپارىمەن جۇمىس ىستەۋگە ءماجبۇر. ويتكەنى بەلگياعا اتتانعان ۇلتتىق قۇراما ساپىندا باستى ويىنشىلاردىڭ بىرنەشەۋى جوق.

«ءبىز ويىنعا دايىندالا باستاعاندا ناقتى جوسپارىمىز بولدى. ءبىراق قازاقستان پرەمەر- ليگاسىنداعى سوڭعى تۋردان كەيىن جىگىتتەردىڭ كەيبىرى جاراقات الدى. ەندى ءبىرى سىرقاتتانىپ قالدى. ءبىراق ءبىزدىڭ باسقا جوسپارىمىز دا بار، جىگىتتەر وعان دايىن»، - دەدى بيلەك.

 جاراقاتىنا بايلانىستى قورعاۋشىلار - يۋريي لوگۆينەنكو مەن دميتريي شومكو، «توبىلدىڭ» شابۋىلداۋشى جارتىلاي قورعاۋشىسى ازات نۇرعاليەۆ كومانداسىنا كومەكتەسە المايدى. گوللانديانىڭ «حەراكلەس» كومانداسىندا دوپ تەۋىپ جۇرگەن جارتىلاي قورعاۋشى الەكساندر مەركەل سۋىق ءتيىپ، ويىندى وتكىزىپ الاتىن بولدى. ونىڭ ۇستىنە، «روستوۆتىڭ» جارتىلاي قورعاۋشىسى باقتيار زاينۋتدينوۆ تە جاتتىعۋ جاساپ ءجۇرىپ جاراقات العان.

ميحال بيلەك جىگىتتەردى قازىردىڭ وزىنەن اسا قيىن ويىنعا دايىنداپ جاتىر. ال روبەرتو مارتينەس شاكىرتتەرى العاشقى مينۋتتاردا- اق ويىن تاعدىرىن شەشىپ، قالعان ۋاقىتتى تەك باقىلاۋمەن وتكىزبەك بولىپ وتىر. توپتاعى بۇعان دەيىنگى ەكى ويىندا بەلگيالىقتار وسىنى ىستەدى دە.

«ءبىز كىمگە قارسى ويناۋ ءۇشىن كەلگەنىمىزدى جاقسى بىلەمىز. بەلگيا ناعىز قازىرگى زاماننىڭ فۋتبولىن وينايدى، ف ي ف ا رەيتينگىندە دە كوش باستاپ تۇر. ءبىز جاقسى ويىن وتكىزىپ، ۇزدىك ناتيجەگە جەتۋگە تىرىسامىز»، - دەيدى قازاقستان قۇراماسىنىڭ باس باپكەرى.

ونىڭ ايتۋىنشا، بەلگيالىقتاردى جەڭۋ ءۇشىن قازاقستان شوتلاندياعا قارسى ماتچتاعى ويىن ورنەگىن كورسەتۋى ءتيىس.

ءبىزدىڭ كوماندا سىرت الاڭداعى وسى ويىنعا بارىنشا دايىندالدى. بۇعان دەيىنگى جاتتىعۋلارىنىڭ بارلىعىن «استانا ارەنانىڭ» جاساندى الاڭىندا وتكىزگەن قۇراما تابيعي كوگالعا بەيىمدەلۋ ءۇشىن تالعارداعى بازادا دايىندىق جۇمىستارىن وتكىزدى.

قازاقستان قۇراماسى ءوز الدىنا 2008 -جىلعى ەۋروپا چەمپيوناتىنا ىرىكتەۋ ويىندارىنان دا كوبىرەك ۇپاي جيناۋ ماقساتىن قويىپ وتىر. سول كەزدە قازاقستان 14 ويىندا 10 ۇپاي جيناعان بولاتىن.

قازاقستان باس باپكەرى بەلگيالىقتار قورعانىسىنىڭ ءالسىز جەرى تۋرالى ەشتەڭە ايتقان جوق. ءبىراق روبەرتو مارتينەس ءوز كومانداسىنىڭ وسال تۇسىن ءوزى- اق ايتىپ بەردى.

«ءبىز ءوز الاڭىمىزدا وينايمىز. سوندىقتان، ويىن قارقىنىن باسقارىپ وتىرۋىمىز قاجەت. ەگەر ويىن جىلدام جۇرمەسە، بۇل قازاقستانعا مۇمكىندىك بەرەدى»، - دەيدى مارتينەس.

ارينە، بەلگيالىقتار قازاقستان كومانداسىنا قاراعاندا الدەقايدا مىقتى. دەگەنمەن كەيدە فۋتبولدا دەڭگەي ەمەس، ءتارتىپ ويىن تاعدىرىن بەلگىلەپ بەرەدى، مۇنى دا ۇمىتپاعان دۇرىس.

 ماتچ كورول بودۋەن اتىنداعى ستاديوندا وتەدى. ونى تىكەلەي ەفيردەن «QazSport» تەلەارناسى كورسەتەدى.

اۆتور: تيمۋر دۇيسەكەيەۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى