استانا ءبىر جىلدا تارتىلاتىن شەتەلدىك ينۆەستيتسيالار اعىمىن 2020-جىلى ەكى ەسەلەمەك
بۇل تۋرالى كەشە ەلوردا اكىمى اسەت يسەكەشەۆ قازاقستاننىڭ ەۋروپالىق بيزنەس قاۋىمداستىعىنىڭ مۇشەلەرىمەن جانە ديپلوماتيالىق كورپۋسپەن كەزدەسۋدە ءمالىم ەتتى.
ىسكەرلەر تىكەلەي ديالوگ ارقىلى ەلوردادا بيزنەستەرىن دامىتۋعا قاتىستى ماسەلەلەردى تالقىلادى، دەپ حابارلايدى قالالىق اكىمدىكتىڭ باسپا ءسوز قىزمەتى.
«ءبىز ديەۆەلوپمەنتكە ينۆەستيتسيا تارتۋعا مۇددەلىمىز: تۇرعىن ءۇي قۇرىلىسىنا، قوناق ۇيلەر، مەيرامحانالار، بالالاردىڭ ويىن-ساۋىق ورتالىقتارى، ساۋدا ۇيلەرى سياقتى نىسانداردىڭ قۇرىلىسىنا، كولىك، ەنەرگەتيكالىق قۇرىلىمعا ينۆەستيتسيا تارتۋدى كوزدەپ وتىرمىز»، - دەپ اتاپ كورسەتتى اسەت يسەكەشەۆ.
سونداي-اق، ول استانا ۋربانيستىك دامۋ جولىمەن كەلە جاتقانىن اتاپ كورسەتتى. كولىك، مەديتسينالىق سالالارعا ەنگىزىلىپ جاتقان سمارت-تەحنولوگيالار ادامداردىڭ ءومىر ءسۇرۋى ءۇشىن قولايلى جاعداي جاساۋعا مۇمكىندىك بەرەدى. يننوۆاتسيالار مەملەكەتتىك-جەكە مەنشىك ارىپتەستىك تەتىكتەرى ارقىلى ەندىرىلەتىن بولادى، دەدى ول.
قالا اكىمى كاسىپكەرلەردى قىزىقتىرعان ساۋالدارعا جاۋاپ بەرىپ، باسقارمالاردىڭ باسشىلارىنا كەيبىر ماسەلەلەردى قاراستىرۋدى تاپسىردى. قازاقستاننىڭ ەۋروپالىق بيزنەس قاۋىمداستىعىنىڭ ءتوراعاسى اۋدريس ءبارتسياۆيچيۋستىڭ ايتۋىنشا، كەزدەسۋ جەمىستى ءوتتى.
«ادامدار بايلانىس ورناتادى، ال بۇل استانادا بيزنەستى دامىتۋعا جاسالعان قادام»، - دەدى ول. ايتا كەتەرلىگى، قازاقستاننىڭ ەۋروپالىق بيزنەس قاۋىمداستىعى - كوممەرتسيالىق ەمەس ۇيىم، قاۋىمداستىققا 150 كومپانيا كىرەدى، ولاردىڭ اراسىندا حالىقارالىق، ەۋروپالىق جانە قازاقستاندىق كومپانيالار بار.
ۇيىمنىڭ نەگىزگى باسىمدىعى بيزنەس پەن مەملەكەت اراسىندا قۇرىلىمدىق ديالوگ جۇرگىزۋ ءۇشىن ءتيىمدى الاڭ قۇرۋ.
