استانادا «قولجەتىمدى باسپانا-2020» باعدارلاماسى بويىنشا قۇجاتتار قابىلداۋ باستالدى
بۇل باعىت بويىنشا استانا قالاسىنىڭ كوممۋنالدىق تۇرعىن ءۇي قورىنان باسپانا الۋعا كەزەكتە تۇرعان ازاماتتار قۇقىلى، دەپ حابارلانعان ەلوردا اكىمدىگىنىڭ رەسمي سايتىندا.
استانا قالاسى تۇرعىن ءۇي باسقارماسىنىڭ باسشىسى اسحات ەلەۋجانوۆ قالا تۇرعىندارىنىڭ رەسمي تاراتىلعان اقپاراتتى دۇرىس تۇسىنبەي، بوسقا دۇرلىككەنىن، ءبارى تۇسىندىرىلگەن سوڭ جاعدايدىڭ تۇراقتانعانىن ايتتى.
«بۇقارالىق اقپارات قۇرالدارىندا، ينتەرنەت- رەسۋرستاردا، تەلەديداردا قۇجاتتاردى قابىلداۋ 13-25 - قازان ارالىعىندا جۇرگىزىلەتىنى تۋرالى اقپارات جاريالاندى. قۇجاتتاردى تەك كەزەكتە تۇرعان ازاماتتار عانا تاپسىرۋى ءتيىس ەكەنى دە ايتىلدى. اقپاراتتىڭ ادامنان ادامعا تەز تارايتىنىن ەسكەرسەك، بۇل شىنايى اقپارات كوزى ەمەس. ناتيجەسىندە قۇجاتتاردى تاپسىرۋعا باسپانا الۋعا كەزەكتە تۇرعان ازاماتتار دا، كەزەككە تۇرماعان ازاماتتار دا كەلىپ وتىر»، - دەدى ا. ەلەۋجانوۆ.
سونىمەن قاتار باسقارما باسشىسى ءوتىنىش بەرۋ مەرزىمى پاتەرلەردى ۇلەستىرۋگە اسەر ەتپەيتىنىن اتاپ ءوتتى. ول باسپانا الۋعا مۇقتاج ازاماتتاردىڭ كەزەگى مەن ءوتىنىش بەرۋشىنىڭ تولەم قابىلەتىنىڭ راستالۋ ناتيجەسى بويىنشا جۇرگىزىلەدى.
قازىرگى ۋاقىتتا «قولجەتىمدى باسپانا-2020» باعدارلاماسىن 4 وپەراتور جۇزەگە اسىرادى: جەرگىلىكتى اتقارۋ ورگاندارى، «قازاقستاننىڭ يپوتەكالىق كومپانياسى» ا ق، «سامۇرىق- قازىنا» جىلجىمايتىن مۇلىك قورى» ا ق جانە «قازاقستاننىڭ تۇرعىن ءۇي- قۇرىلىس جيناق بانكى» ا ق.
ەستەرىڭىزگە سالا كەتەيىك، باعدارلامانىڭ بۇل باعىتى بويىنشا استانا قالاسىنىڭ كوممۋنالدىق تۇرعىن ءۇي قورىنان باسپانا الۋعا كەزەكتە تۇرعان مەملەكەتتىك قىزمەتشىلەر، بيۋدجەتتىك ۇيىمداردىڭ قىزمەتكەرلەرى, اسكەري قىزمەتشىلەر، عارىشكەرلىككە كانديداتتار، عارىشكەرلەر، ارناۋلى مەملەكەتتىك ورگان قىزمەتكەرلەرى جانە مەملەكەتتىك سايلانبالى قىزمەت اتقاراتىن ادامدار؛ الەۋمەتتىك جاعىنان ءالسىز توپتارعا جاتاتىن ادامدار (ۇلى وتان سوعىسىنىڭ مۇگەدەكتەرى مەن قاتىسۋشىلارىنا تەڭەستىرىلگەن ادامدار؛ 1 جانە 2 - توپتاعى مۇگەدەكتەر؛ مۇگەدەك بالالارى بار نەمەسە ولاردى تاربيەلەۋشى وتباسىلارى؛ قازاقستان رەسپۋبليكاسىنىڭ ۇكىمەتى بەكىتەتىن اۋرۋلار تىزىمىندە اتالعان كەيبىر سوزىلمالى اۋرۋلاردىڭ اۋىر تۇرلەرىمەن اۋىراتىن ادامدار؛ جاسىنا قاراي زەينەت دەمالىسىنا شىققان زەينەتكەرلەر؛ كامەلەتكە تولعانعا دەيىن اتا- انالارىنان ايىرىلعان جيىرما توعىز جاسقا تولماعان جەتىم بالالار مەن اتا- اناسىنىڭ قامقورلىعىنسىز قالعان بالالار؛ ورالماندار؛ ەكولوگيالىق ءزىلزالالار، تابيعي جانە تەحنوگەندى سيپاتتاعى توتەنشە جاعدايلار سالدارىنان تۇرعىن ۇيىنەن ايىرىلعان ادامدار؛ كوپ بالالى وتباسىلار؛ مەملەكەتتىك نەمەسە قوعامدىق مىندەتتەرىن، اسكەري قىزمەتىن ورىنداۋ كەزىندە، عارىش كەڭىستىگىنە ۇشۋدى دايىنداۋ نەمەسە جۇزەگە اسىرۋ كەزىندە، ادام ءومىرىن قۇتقارۋ كەزىندە، قۇقىق ءتارتىبىن قورعاۋ كەزىندە قازا تاپقان (قايتىس بولعان) ادامداردىڭ وتباسىلارى؛ تولىق ەمەس وتباسىلار) قاتىسا الادى.
باعدارلامانىڭ بۇل باعىتى بويىنشا استانا قالاسىنىڭ كوممۋنالدىق تۇرعىن ءۇي قورىنان باسپانا الۋعا كەزەكتە تۇرعان ۇلى وتان سوعىسىنىڭ مۇگەدەكتەرى مەن قاتىسۋشىلارى، جالعىز تۇرعىن ءۇيى قازاقستان رەسپۋبليكاسىنىڭ زاڭناماسىندا بەلگىلەنگەن تارتىپپەن اۆاريالىق جاعدايدا دەپ تانىلعان قازاقستان رەسپۋبليكاسىنىڭ ازاماتتارى قاتىسا المايدى.
قۇجاتتاردى قابىلداۋ «جاستار» سارايىندا 13-25 - قازان ارالىعىندا جۇرگىزىلەدى. استانا قالاسى بويىنشا «قولجەتىمدى باسپانا-2020» باعدارلاماسىنا «سامۇرىق- قازىنا» جىلجىمايتىن مۇلىك قورى» اق تۇرعىن ءۇي» باعىتى بويىنشا قاتىسۋ تۋرالى تولىق اقپاراتپەن مىنا جەردە تانىسۋعا بولادى: http://astana.gov.kz/kk/modules/material/6350.
