جەر بەتىنەن 2019 -جىلى جويىلعان تىرشىلىك يەلەرى
كوزگە كورىنبەي جۇرگەن بولار دەپ ۇمىتتەنەسىڭ. ءبىراق تابىلا قويۋى نەعايبىل. جوعالىپ كەتۋ قاۋپى تونگەن جان- جانۋارلار جەتەرلىك. وعان ءتۇرلى فاكتورلار (عالامدىق جىلىنۋ، ادامدار ءىس- ارەكەتى، ەكولوگيا، ت. ب. ) اسەر ەتەرى داۋسىز. كەزىندە ەسەپسىز اڭ اۋلاۋدىڭ ناتيجەسىندە قازىر ءبىز ەستىپ بىلمەگەن، كورمەگەن حايۋاناتتاردىڭ جوق بولىپ كەتكەندىگى جايلى جازىلىپ- اق ءجۇر. عالىمدار جويىلۋ سەبەبىن دە تۇسپالدايدى. ال قازىر بار تىرشىلىك يەلەرىن قورعاپ قالۋدىڭ جولى قانداي؟ 2019 -جىلدىڭ وزىندە كەم دەگەندە ءتورت بىردەي جان- جانۋار ءتۇرى جەر بەتىنەن تۇبەگەيلى جوعالعان. ولار:
1. كەدەرتاستى شولاق قۇيرىق
ەگەۋقۇيرىق بۇل تىرشىلىك يەسى اۋستراليانىڭ برامبل- كەي اتتى شاعىن ارالىندا كوپتەپ كەزدەسەتىن. 2009 -جىلدان باستاپ سانى كۇرت ازايعان. ال وسى جىلدىڭ اقپان ايىندا ءبىرجولا جويىلعان تىرشىلىك يەلەرى قاتارىنا قوسىلدى. بۇل - كليمات وزگەرىسى اسەرىنەن ءىزىم- عايىم جوعالعان العاشقى سۇتقورەكتى سانالىپ وتىر.
2. سۋماترا ءمۇيىزتۇمسىعى
قاراشا ايىندا بورنەو قورىعىندا 25 -جىل ءومىر سۇرگەن يمان اتتى سۋماترا ءمۇيىزتۇمسىعى كوز جۇمدى. بۇل - مالايزياداعى سوڭعى قالعانى ەدى. سۋماترا ءمۇيىزتۇمسىعى وسى جىلدىڭ مامىر ايىنان باستاپ جوعالعان جانۋارلار قاتارىنا قوسىلدى. سەبەبى ەركىن تابيعات اياسىندا جۇرگەن سوڭعىسى جان تاپسىرعان بولاتىن. عالىمدار توپشىلاۋى بويىنشا، يندونەزيادا 30-80 ءتۇرى كەزدەسۋى مۇمكىن ەكەن.
3. گاۆاي ۇلۋى
دجوردج اتتى گاۆاي ۇلۋى جاقىندا عانا جارىق دۇنيەمەن قوش ايتىستى. 14 جىلداي گاۆاي ۋنيۆەرسيتەتى زەرتتەۋ ورتالىعىندا ءومىر سۇرگەن. 1997 -جىلى تابىلعان 10 شاقتى گاۆاي ۇلۋىنان ءتىرى قالعانى وسى ەدى. زەرتتەۋشىلەر ساقتاپ قالۋعا تىرىسقانمەن، ناتيجە بولماعان. 20 جىلدان بەرى تابيعاتتا ۇلۋدىڭ بۇل ءتۇرى كەزدەسپەي كەلەدى.
4. باگام كوكتەكەسى
قىركۇيەك ايىندا باگامدا دوريان تروپيكالىق داۋىلى تابيعاتقا اسا كوپ شىعىن الىپ كەلدى. اسىرەسە باگام كوكتەكەسى مەكەندەيتىن ايماققا كوپ زالال ءتيدى. وسى قۋاتتى داۋىلدان كەيىن زەرتتەۋشىلەر بۇل قۇس ءتۇرىن كەزدەستىرە العان جوق. ال وعان دەيىن بىرنەشەۋىن كورىپ، باقىلاپ جۇرگەن. ناتيجەسىندە جويىلىپ كەتۋى مۇمكىن دەگەن تىرشىلىك يەلەرى قاتارىنا قوسىلدى.
Massaget.kz
