التىن تۇعىر-2019: ۇلتتىق سپورت ۇزدىكتەرى ماراپاتتالادى

ق ر ۇلتتىق سپورت قاۋىمداستىعى حابارلاعانداي، ۇلتتىق سپورت سالاسىنداعى ۇزدىكتەردىڭ مەرەيىن كوتەرۋدى ماقسات تۇتقان بۇل ءداستۇرلى ماراپاتتاۋ نۇر- سۇلتان قالاسىنداعى «قازمەديا» ورتالىعىنىڭ كونسەرت زالىندا وتەدى.

جەتىنشى مارتە ۇيىمداستىرىلاتىن بيىلعى «التىن تۇعىر» سىيلىعىنىڭ يەگەرلەرى - 2019 -جىلعى ۇلتتىق سپورتتىڭ رەسپۋبليكالىق، حالىقارالىق باسەكەسىندە دارا شىققان جەڭىمپازدار بولماق.

اۋدارىسپاق، تەڭگە ءىلۋ، جامبى اتۋدان، كوكپاردان الماتىدا وتكەن جاستار اراسىنداعى ءى ازيا چەمپيوناتىندا، ەلوردا تورىندە وتكەن «التىن جەبە» I الەم چەمپيوناتىندا جەڭىمپاز اتانعان، بايگە مەن قۇسبەگىلىك باسەكەلەرىندە توپ جارعان جانە توعىزقۇمالاقتان، اسىق اتۋدان، قازاق كۇرەسىنەن حالىقارالىق جارىستاردا جۇلدەلى ورىن يەلەنگەن كوپتەگەن سپورتشىلار «التىن تۇعىر» سىيلىعىنا لايىق دەپ تانىلادى.

«التىن تۇعىر» - جاستارىمىزدى ەرلىككە، باتىلدىققا، ەپتىلىككە، وجەتتىككە، جۇرەكتىلىككە تاربيەلەيتىن، رۋحىن شىڭدايتىن ۇلتتىق سپورتتىڭ ءداستۇرلى جيىنى. «التىن تۇعىر» - ۇلتتىق سپورت باسەكەلەرىندە ەل نامىسىن اسقاقتاتىپ جۇرگەن ازاماتتارىمىزدىڭ ەسىمىن ارداقتايتىن دۋماندى كەش. «التىن تۇعىردا» ەلىمىزگە تانىمال ءانشى- اقىندار ساحنا تورىندە ونەر كورسەتەدى.

«التىن تۇعىر-2019» ۇلتتىق سپورت ۇزدىكتەرىن ماراپاتتاۋ 5 -جەلتوقسان كۇنى ەلورداداعى «قازمەديا» عيماراتىنىڭ كونسەرت زالىندا وتەدى. باستالۋى ساعات 19-00-دە. كەلەم دەۋشىلەرگە ەسىك اشىق.

اۆتور: كۇنسۇلتان وتارباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى