ۇكىمەت 2019-جىلعا ارنالعان بيۋجەتتى ناقتىلاۋ تۋرالى شەشىم قابىلدادى
«پرەزيدەنت ءبىرقاتار الەۋمەتتىك شارالاردى قابىلدادى. ولاردى ىسكە اسىرۋ ازاماتتارعا الەۋمەتتىك پروبلەمالاردى شەشىپ قانا قويماي ءوزىنىڭ ماتەريالدىق جاعدايىن ايتارلىقتاي جاقسارتۋعا مۇمكىندىك بەرەدى. سوندىقتان قازىر ءبىزدىڭ الدىمىزدا تۇرعان مىندەت - ولاردى ۋاقىتىندا ورىنداۋ ءۇشىن بارلىق ۇيىمداستىرۋشىلىق جانە زاڭنامالىق ماسەلەلەردى جىلدام شەشۋ»، - دەدى ۇكىمەت وتىرىسىن قورىتىندىلاعان اسقار مامين.
ۇكىمەت باسشىسىنىڭ اتاپ وتۋىنشە، ول ءۇشىن 2019-2021-جىلدارعا ارنالعان رەسپۋبليكالىق بيۋجەتتىڭ جوباسىنا قاجەتتى قاراجات كوزدەلگەن.
«باياندامالاردا «ەڭبەك» باعدارلاماسىنا تۇزەتۋلەر ەنگىزىلەتىندىگى ايتىلدى. ولار شاعىن كرەديتتەر بەرۋگە، گرانت ءبولۋ قۇرالدارىن كەڭەيتۋگە، كاسىپكەرلىك نەگىزدەرىن وقىتۋعا، قىسقا مەرزىمدى وقىتۋعا باعىتتالعان. 2019-2021-جىلدارعا ارنالعان رەسپۋبليكالىق بيۋجەتكە جانە «ەڭبەك» مەملەكەتتىك باعدارلاماسىنا وزگەرىستەر مەن تولىقتىرۋلار ەنگىزۋ تۋرالى ءتيىستى ۇكىمەت قاۋلىلارىن داۋىس بەرۋگە شىعارامىن»، - دەپ اتاپ ءوتتى پرەمەر-مينيستر.
قاۋلى جوبالارىن ۇكىمەت مۇشەلەرى ءبىراۋىزدان قولداعاننان كەيىن اسقار مامين قارجى مينيسترلىگىنە پرەمەر-مينيستر كەڭسەسىمەن بىرلەسىپ، 2019-جىلعا ارنالعان رەسپۋبليكالىق بيۋجەتتى ناقتىلاۋ بويىنشا زاڭ جوباسىن پارلامەنت ماجىلىسىنە ەنگىزۋدى تاپسىردى.
ايتا كەتەيىك، بۇگىن ۇكىمەت وتىرىسىندا قازاقستاندىقتاردىڭ ءال-اۋقاتىن ارتتىرۋ جانە الەۋمەتتىك ماسەلەلەردى شەشۋ بويىنشا مەملەكەت باسشىسىنىڭ تاپسىرمالارىن، سونداي-اق 26- ماۋسىمداعى قازاقستان ازاماتتارىنىڭ بورىش جۇكتەمەسىن ازايتۋ شارالارى تۋرالى جارلىعىن ىسكە اسىرۋ ءۇشىن 2019-جىلعا ارنالعان رەسپۋبليكالىق بيۋجەتتى ناقتىلاۋ جوباسى تانىستىرىلعان بولاتىن.
