قازاقستاندىقتاردى 2019-جىلى قانداي وزگەرىستەر كۇتىپ تۇر؟
1. جالاقى كوتەرىلەدى
2019-جىلدىڭ قاڭتار ايىنان باستاپ مينيمالدى جالاقى كولەمى ءبىر جارىم ەسە كوبەيەدى، ياعني 28 مىڭ تەڭگەدەن 42,5 مىڭ تەڭگەگە جەتەدى. وسىلايشا 1,3 ميلليون ازاماتتىڭ جالاقىسى كوتەرىلەدى. سونىمەن قاتار ءبىلىم بەرۋ جانە دەنساۋلىق ساقتاۋ سالاسىنداعى 275 مىڭ قىزمەتكەرلەردىڭ ورتاشا جالاقىسى 35 پايىزعا وسەدى. ەنگىزىلگەن قوسىمشا شارالاردى ەسكەرسەك، 2019-جىلى ورتاشا جالاقى كولەمى 9,1 پايىزعا ءوسىپ، حالىقتىڭ كىرىسى 4,6 پايىزعا كوتەرىلەدى.
2. سالىق جۇكتەمەسى تومەندەتىلەدى
2019-جىلدىڭ ءبىرىنشى قاڭتارىنان باستاپ جالاقىسى تومەن ازاماتتارعا (25 ا ە ك تومەن بولسا) جەكە تابىس سالىعى 10 ەسە ازايتىلادى. سالىق جۇكتەمەسىنىڭ تومەندەۋى التى ميلليون تۇرعىندى قامتيدى.
3. الەۋمەتتىك تولەمدەر وسەدى
ەڭبەك جانە حالىقتى الەۋمەتتىك قورعاۋ مينيسترلىگى «2019-جىلدىڭ ءبىرىنشى قاڭتارىنان باستاپ الەۋمەتتىك ساقتاندىرۋ مەملەكەتتىك قورىنان الەۋمەتتىك تولەمدەر مولشەرىن ارتتىرۋ» زاڭ جوباسىن ازىرلەدى. قاۋلى بويىنشا، ەڭبەككە قابىلەتتىلىگىن نەمەسە اسىراۋشىسىن جوعالتقان جانداردىڭ جاردەماقى مولشەرى بەس پايىزعا وسەتىن بولادى.
4. ەلەكتروندى ەڭبەك كەلىسىمشارتتارى
2019-جىلدان باستاپ ەلەكتروندى ەڭبەك كەلىسىمشارتتارىن تىركەۋ جۇيەسى ىسكە قوسىلادى. بۇل جۇمىسقا تۇرۋدى جەڭىلدەتەدى. ازاماتتارعا قۇجات جيناۋ كەرەك بولمايدى. ءاربىر جۇمىس ىستەيتىن ازاماتتىڭ جەكە ءىسى قالىپتاستىرىلادى. وسىنىڭ ارقاسىندا جىل سايىنعى ازاماتتاردىڭ شىعىسى تومەندەتىلىپ، 600 ميلليون تەڭگە ۇنەمدەلسە، ەلەكتروندى ءىس قاعازدارىن جۇرگىزۋ جۇيەسى ەنگىزىلگەن سوڭ ۇكىمەت شىعىنى جىل سايىن ءبىر ميللياردقا ازايادى.
5. سالىقتىق امنيستيا
جاڭا جىلدا كىشى جانە ورتا بيزنەس ءۇشىن سالىقتىق امنيستيا جۇرگىزىلەدى. ءبىرىنشى قازانداعى كورسەتكىشتەر بويىنشا، ورتا جانە كىشى بيزنەستىڭ 90 مىڭ نىسانى 294 ميلليارد تەڭگە قارىز. 2019-جىلى نەگىزگى قارىز وتەلگەن جاعدايدا 111 ميلليارد تەڭگە قۇرايتىن ءوسىم اقى جويىلادى. بۇل ءبىرىنشى قازانعا دەيىن بولعان قارىز مولشەرىنە قاتىستى امنيستيا. اكتسيزدەلەتىن تاۋار وندىرۋشىلەر جانە مۇناي سالاسىنداعىلار امنيستيانى قولدانا المايدى.
6. زەينەتاقى كوتەرىلەدى
2019-جىلدىڭ ءبىرىنشى قاڭتارىنان باستاپ ورتاشا جالاقى مولشەرى بازالىق زەينەتاقىعا بايلانىستى 5728 تەڭگەدەن 87243 تەڭگەگە دەيىن وسەدى. سونىمەن قاتار بازالىق زەينەتاقىنى تاعايىنداۋ ءتارتىبى دە وزگەرتىلەدى. 2019-جىلى ونىڭ مينيمالدى مولشەرى 27732 تەڭگەنى قۇراسا، بازالىق زەينەتاقى مولشەرىن 36108 تەڭگەگە ءوسىرۋ جوسپارلانعان.
7. كوممۋنالدى قىزمەت باعالارى تومەندەتىلەدى
ەلەكتر قۋاتى ءۇشىن شەكتىك تاريفتەر 2025-جىلعا دەيىن جوسپارلانىپ قويدى. مىسالى، «استانا- ەنەرگيا» اكتسيونەرلىك قوعامىنىڭ (9 توپ) بەكىتىلگەن شەكتىك تاريفتەرى ءبىر كيلوۆات ساعاتقا 4,87 تەڭگە دەپ بەكىتىلدى. ال «الماتى ەلەكتر ستانتسيالارى» اكتسيونەرلىك قوعامىنىڭ تاريفتەرى ج ە و-1,2,3, قاپشاعاي گەس، كاسكاد گەس (26 توپ) - 8,33, ەكىباستۇز گرەس-1 (1 توپ) - 5,76 تەڭگەنى قۇراعان.
شەكتىك كوتەرمە باعالاردى تومەندەتۋ ارقىلى تاۋار گازىنىڭ باعاسىن ءبىرىنشى قاڭتاردان باستاپ ەلەكتر ستانسيالارى ءۇشىن ايماققا بايلانىستى 12-22 پايىزعا تومەندەتۋ جوسپارلانعان.
8. ۇيالى بايلانىستىڭ جاڭا تاريفتەرى
ۇيالى بايلانىس وپەراتورلارى ينتەرنەت باعاسىن بەستەن 50 پايىزعا دەيىن تومەندەتەدى. «قازاق تەلەكوم» اكتسيونەرلىك قوعامى ءبىرىنشى قاڭتاردان باستاپ باعالاردى بۇرىنعى تاريفتىك جوسپاردان بەس پايىزعا تومەندەتەدى. «قازترانسكوم» ابونەنتتەردى قوسۋ باعاسىن 50 پايىزعا تومەندەتىپ، ابونەنتتىك تولەمگە 10 پايىزدىق جەڭىلدىك ۇسىنىپ، ابونەنتتىك تولەم مەن ينتەرنەت باعاسىن %15 پايىزعا ازايتادى.
9. كولىكتەردىڭ جاڭا تەحنيكالىق قۇجاتى ەنگىزىلەدى
ءبىرىنشى قاڭتاردان باستاپ ءچيپى بار تەحنيكالىق قۇجاتتار ەنگىزىلەدى. جاڭا قۇجاتتىڭ ءپىشىنى مەن كولەمى وزگەرتىلىپ، قولدانۋعا ىڭعايلى بولادى. تەحنيكالىق قۇجاتتاردا ۋلتراكۇلگىن قورعانىش ەلەمەنتتەرى سالىنىپ، كولىكتىڭ تىركەۋ مالىمەتتەرى جازىلعان ەلەكتروندى ميكروسحەما ورناتىلادى.
