ءا چ-2018: ماروككونىڭ اۆتوگولى يرانعا جەڭىس سىيلادى
«سانكت-پەتەربۋرگ» ستاديونىندا بولعان كەزدەۋدە يراندىقتار 1:0 ەسەبىمەن جەڭىسكە جەتتى، دەپ حابارلايدى قازاقپارات ءتىلشىسى.
يران ازيا قۇرلىعى قۇرامالارى اراسىندا الەم بىرىنشىلىگىندە ۇپايعا العاش قول جەتكىزۋىمەن ەرەكشەلەنەدى. 1978-جىلى پارسىلار شوتلانديامەن 1:1 ەسەبىمەن تەڭ ويناپ، قالعان ەكى كەزدەسۋدە گوللانديا مەن پەرۋگە ەسە جىبەردى. ارادا 20 جىل وتكەندە ولار ءوز تاريحىندا تۇڭعىش رەت جەڭىسكە قول جەتكىزدى. سول جىلعى فرانسيا تورىندە وتكەن ءدۇبىرلى دودادا پارسىلار ا ق ش قۇراماسىمەن ءبىر توپقا ءتۇستى. سول تۇستا قوس مەملەكەتتىڭ اراسىندا قىرعي-قاباق ساياسي شيەلىنىس ورىن الىپ جاتقان ەدى. بۇل كەزدەسۋدە پارسىلار 2:1 ەسەبىمەن جەڭىسكە جەتىپ، ءوز ەلىنە كول-كوسىر قۋانىش سىيلادى.
يران قۇراماسى بيىلعى بىرىنشىلىكپەن قوسا ەسەپتەگەندە بەسىنشى مارتە ايتۋلى الاماندا باق سىناپ وتىر. ونىڭ ەشبىرىندە توپتىق كەزەڭنەن اسا العان جوق. يران الەمدىك بىرىنشىلىكتە ءالسىز سانالعانىمەن ازيا قۇرلىعىندا قاتارىنان ءۇش مارتە چەمپيون اتانعان. 2018-جىلعى دوپ دوداسىنا ىرىكتەۋ كەزەڭىندە ولار ءوز توبىندا ءبىرىنشى ورىن الدى.
ماروككو دا بيىل بەسىنشى مارتە بەدەلدى باسەكەگە كەلىپ وتىر. جالپى، ماروككولىقتار العاش رەت 1970-جىلى جارىستىڭ وسى ساتىسىندا باق سىناعان ەدى. سول جىلى ءوز توبىندا ءتورتىنشى ورىندى مىسە تۇتسا، 1986-جىلى ءوز توبىندا انگليا، پولشا جانە پورتۋگاليا سەكىلدى قۇرامالاردى ارتقا تاستادى. جارىستىڭ 1/8 كەزەڭىندە فرگ قۇراماسىنان 0:1 ەسەبىمەن جەڭىلىپ ەلىنە قايتتى. ال 1994 جانە 1998-جىلدارداعى الەم بىرىنشىلىكتەرىنە كەلگەنىمەن قورجىنى بوس قايتتى. سودان كەيىن 20 جىل بويى ىرىكتەۋ كەزەڭىنەن ارىگە اسا العان جوق.
بۇل توپتا پورتۋگاليا جانە يسپانيا قۇرامالارى دا سىنعا تۇسەدى. سوندىقتان ماماندار العاشقى ەكى ورىندى ەۋروپالىق قۇرامالار ەنشىسىنە بۇيىرادى دەگەن جورامال ايتىپ وتىر. ايتسە دە، ونى بىرىنشىلىك بارىسى كورسەتەدى. ويتكەنى، ءدۇبىرلى دودا تاريحىندا ءالسىز دەپ باعالانعان تالاي قۇراما ايدى اسپانعا ءبىر-اق شىعارعان ەدى. سول سەبەپتى يران دا، ماروككو دا ەشكىمگە دەس بەرە قويماس.
اتاپ وتەرلىگى، قوس قۇراما بۇعان دەيىن بىردە-ءبىر مارتە ءوزارا كەزدەسىپ كورگەن جوق. ويىن باستالعاننان كەيىن تىزگىندى ماروككو قۇراماسى ءوز قولىنا الۋعا تىرىستى. يران قاقپاسى الدىندا ولاردىڭ باسىمدىعى بايقالىپ تۇردى. اراسىندا پارسى فۋتبولشىلارى دا شابۋىلعا شىققانىمەن ودان ەشقانداي پايدا كەلە قويعان جوق. ولارعا ماروككولىق قورعاۋشىلار توتەپ بەرە ءبىلدى. نەگىزىندە ماروككونىڭ باسىمدىعى ايقىن اڭعارىلدى. افريكالىقتار يران قاقپاسى اۋماعىندا ەمىن-ەركىن قيمىل كورسەتتى. العاشقى كەزەڭنىڭ سوڭىنا تامان يراندىقتار بىرنەشە قاۋىپتى ساتتەردى ۇيىمداستىردى. ويىندا ماروككولىق ازيز بۋحاددۋزدىڭ ءوز قاقپاسىنا سوعىپ العان اۆتوگولى شەشتى. ەسەپ 1:0. يران جەڭىسكە جەتتى.
بۇل توپتا بۇگىن تاعى ءبىر كەزدەسۋ بولادى. سوچي قالاسىنداعى «فيشت» ستاديونىندا پورتۋگاليا مەن يسپانيا قۇرامالارى كەزدەسەدى. ويىن 00.00 دە باستالادى.
بۇل توپتاعى كەلەسى ويىن 20- ماۋسىمدا وتكىزىلەدى. سول كۇنى پورتۋگاليا مەن ماروككو، يران مەن يسپانيا شەبەرلىك بايقاسادى.
