ءا چ-2018: يسپانيا مەن پورتۋگاليا تەڭ ءتۇستى

بيىلعى مۋنديالدىڭ ناعىز تارتىستى ويىنىنا ەندى كۋا بولدىق. پورتۋگاليا مەن يسپانيا قۇرامالارى فۋتبول جانكۇيەرلەرىنە ەستەن كەتپەس قىزىقتى ماتچ سىيلادى. ەڭ العاش قاۋىپتى شابۋىل كەزىندە كريشتيانۋ رونالدۋعا قارسى ناچو فەرناندەس ەرەجە بۇزعاندىقتان، يسپانيالىقتار قاقپاسىنا 11 مەترلىك ايىپ دوبى بەلگىلەندى. ونى 4-مينۋتتا كوماندا كاپيتانى رونالدۋ قالتقىسىز ورىنداپ، ەسەپ اشتى.

تىنىمسىز شابۋىلداعان يسپانيا قارسى شابۋىلدان تاعى دا گول جىبەرىپ الۋى مۇمكىن ەدى. الايدا ديەگو كوستا، اراعا جيىرما مينۋت سالىپ، 24-مينۋتتا ەكى ورتالىق قورعاۋشىنىڭ قورشاۋىنان سىتىلا بەرىپ، وڭ اياعىمەن قاقپانىڭ وڭ جاق تومەنگى بۇرىشىنا كۇشتى سوققى باعىتتاپ ەسەپتى تەڭەستىردى.

كەلەسى جيىرما مينۋتتىق ارپالىستان كەيىن كريشتيانۋ رونالدۋ تاعى دا كومانداسىن العا باستادى. ول ايىپ الاڭى سىزىعىنان كەنەت سوققى بەرىپ، دە حەانى ساستىردى. قولايسىز تراەكتوريامەن كەلگەن دوپتى قاقپاشى قايتارا الماي قالدى - 2:1. كوماندالار ۇزىلىسكە وسىلاي كەتتى.

55-مينۋتتا ديەگو كوستا سەردجي بۋسكەتستىڭ پاسىنان كەيىن تاعى دا ەسەپتى تەڭەستىردى. نەبارى ءۇش مينۋت وتەر-وتپەستە ناچو ايىپ الاڭىنان سەرپىلىپ شىعا بەرگەن دوپتى ايىپ الاڭىنىڭ سىرتىنان وڭ اياعىنىڭ سىرتقى توبىعىمەن شيىرا تەۋىپ، تۋرنيردىڭ ەڭ كەرەمەت گولىن (ازىرگە) سوقتى.

پورتۋگاليا ويىننىڭ سوڭىنا دەيىن ەسەپتى تەڭەستىرۋ ءۇشىن بار كۇشىن جۇمسادى. يسپانيانىڭ ورتا شەبى تىعىز بولعاندىقتان، بۇل تۇستان جارىپ ءوتۋ مۇمكىن ەمەس ەدى. پورتۋگاليالىقتار سول سەبەپتى ەكى قاناتتان ورتاعا ويىسقان جوسپارلى شابۋىلدارىن ۇدەتە ءتۇستى. سونداي شابۋىلداردىڭ بىرىندە رونالدۋعا قارسى تاعى دا ەرەجە بۇزىلىپ، ايىپ دوبى بەلگىلەندى. 88-مينۋتتا كريشتيانۋ سول ايىپ دوبىن كەرەمەت ورىنداپ، تۋرنيردىڭ العاشقى حەت-تريگىنىڭ يەسى اتاندى.

كوماندالار وسىلايشا 3:3 ەسەبىمەن تارقاسىپ، ءبىر-ءبىر ۇپايدان ءبولىسىپ الدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى