ءا چ-2018: رەسەي ساۋد ارابياسىن ءىرى ەسەپپەن جەڭدى
ەكى قۇراما بۇعان دەيىن 1 مارتە كەزدەسۋ وتكىزگەن ەكەن. 1993 -جىلى وتكەن جولداستىق كەزدەسۋدە اراب جىگىتتەرى 4:2 ەسەبىمەن باسىم تۇسكەن ەدى. ال رەسمي كەزدەسۋدە ەكەۋى ەشقاشان كەزدەسىپ كورگەن جوق.
ايتا كەتەلىك، ەكى قۇراما دا ف ي ف ا رەيتينگىندە ورتا دەڭگەيدە كەلەدى. اتاپ ايتقاندا، رەسەي 70-ورىندا تۇرسا، ساۋد ارابياسى ولاردان ءۇش ساتىعا جوعارى تۇر. الەم چەمپيوناتىنىڭ تاريحىندا مۇنداي تومەنگى رەيتينگتە جۇرگەن قوس قۇراما جارىس شىمىلدىعىن اشقان جوق ەدى.
بۇل كەزدەسۋگە ارگەنتينالىق تورەشى نەستور پيتانا قازىلىق ەتتى. ويىننىڭ 12 - مينۋتىندا رەسەي قۇراماسىنىڭ جارتىلاي قورعاۋشىسى يۋري گازينسكي گول سوقتى. ول ءوزىنىڭ ارىپتەسى الەكساندر گولوۆيننىڭ سول قاناتتان اۋەلەتە بەرگەن دوبىن باسپەن قاقپاعا باعىتتاپ، الەم بىرىنشىلىگىنىڭ العاشقى گولىنىڭ اۆتورى اتاندى. بۇدان كەيىن دە رەسەي قۇراماسى قارسىلاستار قاقپاسى الدىندا بىرنەشە قاۋىپتى ساتتەردى ۇيىمداستىردى. ويىندا نەگىزىنەن الاڭ يەلەرىنىڭ باسىمدىعى كورىنىپ تۇردى. ويىننىڭ 23-مينۋتىندا رەسەيلىك فۋتبولشى الان دزاگويەۆ جاراقات الىپ، ونى ارىپتەسى دەنيس چەرىشيەۆ الماستىردى. ويىننىڭ ءبىرىنشى كەزەڭى اسا جوعارى دەڭگەيدە تارتىستى وتكەن جوق. دوپ نەگىزىنەن الاڭ ورتاسىندا كوبىرەك كورىندى. ويىننىڭ 43-مينۋتىندا رومان زوبنيننىڭ پاسىنان كەيىن دەنيس چەرىشيەۆ ساۋدا ارابياسى قاقپاسىنان ساڭىلاۋ تاپتى. ەسەپ 2:0.
كەلەسى ەكى دوپ ويىننىڭ ەكىنشى كەزەڭىندە سوعىلدى. رەسەي شابۋىلشىسى ارتەم دزيۋبا ەسەپتى 3:0-گە جەتكىزسە، ويىننىڭ 91-مينۋتىندا دەنيس چەرىشيەۆ تاعى ءبىر دوپ سوقتى. ويىننىڭ نۇكتەسىن 94-مينۋتتا الەكساندر گولوۆين قويدى. قورىتىندى ەسەپ 5:0. رەسەي جەڭىسكە جەتتى.
ساۋد ارابياسى الەم بىرىنشىلىگىنىڭ فينالدىق كەزەڭىنە 5-مارتە قاتىسىپ وتىر. 1994 -جىلى ا ق ش- تا وتكەن الەم بىرىنشىلىگىندە ولار 6 توپتا سىنعا ءتۇسىپ، ەكىنشى ورىنمەن جارىستىڭ 1/8 فينالدىق كەزەڭىنە جولداما الدى. ماروككونى 2:1، بەلگيانى 1:0 ەسەبىمەن جەڭىپ، گوللانديادان 1:2 ەسەبىمەن جەڭىلىپ قالدى. جارىستىڭ 1/8 فينالدىق كەزەڭىندە ولار شۆەتسيادان 1:3 ەسەبىمەن جەڭىلىپ، جارىستى اياقتاۋعا ءماجبۇر بولدى. اراب فۋتبولشىلارى ودان كەيىن 1998، 2002، 2006 -جىلداردا ءدۇبىرلى دودانىڭ فينالدىق كەزەڭىندە باق سىناعانىمەن، ءوز توبىندا ءتورتىنشى ورىننان اسا المادى.
ال رەسەيلىكتەر ك س ر و قۇراماسى كورسەتكىشتەرىمەن قوسا ەسەپتەگەندە الەم بىرىنشىلىگىنىڭ فينالدىق كەزەڭىندە 11 مارتە باق سىنادى. ك س ر و قۇراماسى 1958، 1962، 1970، 1982 -جىلدارى 1/4 فينالعا دەيىن جەتسە، 1966، 1990 -جىلدارى ءوز توبىندا ءتورتىنشى ورىننان اسا العان جوق. 1986 -جىلى 1/8 فينالدىق كەزەڭگە جەتتى. ك س ر و قۇراماسىنىڭ زاڭدى مۇراگەرى سانالاتىن رەسەي قۇراماسى بيىلعى بىرىنشىلىكتى ەسەپتەمەگەندە بۇعان دەيىن 1994، 2002، 2014 -جىلداردا فينالدىق كەزەڭدە سىنعا ءتۇسىپ، ۇشەۋىندە توپتىق كەزەڭدە ءۇشىنشى ورىندى مىسە تۇتتى.
رەسەي قۇراماسى ەندىگى كەزدەسۋىن 19 - ماۋسىمدا ەگيپەت قۇراماسىنا قارسى وتكىزسە، 20 - ماۋسىمدا ۋرۋگۆاي مەن ساۋد ارابياسى شەبەرلىك بايقاسادى. ا توبىنىڭ ەكىنشى كەزدەسۋى 15 - ماۋسىمدا ەگيپەت جانە ۋرۋگۆاي قۇرامالارىنىڭ اراسىندا وتەدى. سونداي- اق، 15 - ماۋسىمدا ب توبىنداعى ماروككو - يران، پورتۋگاليا - يسپانيا قۇرامالارى اراسىندا ويىندار بولادى.
ءادىلجان ۇمبەت
