الماتىدا «سىنشىلار تاڭداۋى-2018» كينوجۇلدەسى تابىستالدى

 استانا. قازاقپارات - قازاقستاننىڭ كينوسىنشىلار قاۋىمداستىعى وتاندىق كينەماتوگرافيانىڭ 2017 -جىلعى ۇزدىكتەرىن اتادى، دەپ حابارلايدى قازاقپارات.

الماتىدا «سىنشىلار تاڭداۋى-2018» كينوجۇلدەسى تابىستالدى

«سىنشىلار تاڭداۋى-2018» جۇلدەسىن تاپسىرۋ سالتاناتى الماتىداعى «ارمان» كينوتەاترىندا ءوتتى. ۇزدىكتەر 13 نوميناتسيا بويىنشا ماراپاتتالدى.

قاۋىمداستىق پرەزيدەنتى گۇلنار ابىكەيەۆانىڭ ايتۋىنشا، «ەڭ ۇزدىك فيلم (كومەديا/شىتىرمان/ەكشن جانرى) » اتالىمىندا جەڭىمپازدى انىقتاۋ قيىنعا سوققان. كينوسىنشىلار «ارمان» («كوگدا انگەلى سپيات» ) ، «بولىنبەيتىن» ، «كەلىن دە ادام بالاسى» ، «قازاقشا كاسىپ امەريكادا» فيلمدەرى اراسىندا ەڭ ۇزدىكتى انىقتاۋدا ۇزاق پىكىرتالاسقان. ناتيجەسىندە، رەجيسسەر راشيد سۇلەيمەنوۆتىڭ «ارمان» كارتيناسى ەكى داۋىس ايىرماشىلىقپەن جەڭىسكە جەتتى.

فيلمنىڭ پروديۋسەرلەرى - گۇلزيرا ايداربەك پەن رايا ادىعانوۆا. باستى رولدەردى ءانشى قايرات نۇرتاس پەن ونىڭ جۇبايى جۇلدىز ابدىكارىموۆا وينادى. جۇلدىز سونداي- اق «ەڭ ۇزدىك ايەل ءرولى» نوميناسىن جەڭىپ الدى.

ال «ۇزدىك دراما» اتالىمى بويىنشا جۇلدە «ورالمان» فيلمىنە (رەجيسسەرى - ءسابيت قۇرمانبەكوۆ) تاپسىرىلدى. ايتا كەتەيىك، تۋىندى بىرنەشە حالىقارالىق كينوفەستيۆالداردا ۇزدىك تانىلعان بولاتىن.

رەجيسسەرلار مەن پروديۋسسەرلەرگە «سىنشىلار تاڭداۋى-2018» جۇلدەسىنە يە بولۋى ءۇشىن ءوتىنىم بەرۋدىڭ قاجەتى جوق. كينوسىنشىلار وتاندىق پروكاتقا شىققان نەمەسە جالپى قوعام نازارىنا ۇسىنىلعان فيلمدەردى وزدەرى سارالاپ، جۇلدەلەردى 13 نوميناتسيا بويىنشا ۇلەستىرەدى.

قازاقستاننىڭ كينوسىنشىلار قاۋىمداستىعى 2014 -جىلى قۇرىلعان.

«ۇزدىك دراما»

«ورالمان» - تاڭىربەرگەن قاجيەۆ، ەرجان احمەتوۆ

«ەڭ ۇزدىك فيلم (كومەديا/شىتىرمان/ەكشن جانرى) »

«ارمان - پروديۋسەرى گۇلزيرا ايداربەك، رايا ادىعانوۆا

«ۇزدىك رەجيسسەر»

سەرىك اپرىموۆ - «اكەگە قوڭىراۋ شالۋ»

 «ۇزدىك ستسەناري»

«لاستانعان ۇلكەن شاھار» - ناريمان تورەبايەۆ، تالعات شاعامبايەۆ

«ۇزدىك وپەراتورلىق جۇمىس»

«ول» - ازامات دۋلاتوۆ

«ۇزدىك سۋرەتشى- قويۋشى جۇمىسى»

«ورالمان» - رۇستەم ودينايەۆ

«ۇزدىك ەر ادام ءرولى»

دۋلىعا اقمولدا - «ورالمان»

«ۇزدىك ايەل ءرولى»

جۇلدىز ابدىكارىموۆا - «ارمان»

«ەكىنشى پلانداعى ۇزدىك ەر ادام ءرولى»

ەربولات وسپانقۇلوۆ - «اكەگە قوڭىراۋ شالۋ»

«ەكىنشى پلانداعى ۇزدىك ايەل ءرولى»

 داناگۇل تەمىرسۇلتانوۆا - «كەلىن دە ادام بالاسى»

«ۇزدىك ءان»

91 «Mooz» - «91» فيلمىنە OST

«فيلمگە ۇزدىك ءان»

ءابىلقايىر جاراسقان - «بولىنبەيتىن»

«ۇزدىك قىسقامەتراجدى فيلم»

«سامال» - شۇعىلا سەرجان

оқулық
ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى