پحەنچحان-2018: سپورتشىلار تۋىستارىمەن سويلەسۋى ءۇشىن 30 ميلليون تەڭگە ءبولىندى

بۇل تۋرالى بۇگىن ۇكىمەتتىڭ سەلەكتورلىق رەجيمدەگى وتىرىسىنان كەيىن ب ا ق وكىلدەرىنىڭ ساۋالىنا جاۋاپ بەرگەن ۇلتتىق وليمپيادا كوميتەتىنىڭ باس حاتشىسى دانيار ءابىلعازين ايتتى، دەپ حابارلايدى قازاقپارات ءتىلشىسى.

«سپورتشىلارعا جەكە قولداۋ ۇيىمداستىرمايمىز. دەگەنمەن، ۇلتتىق وليمپيادا كوميتەتى تاراپىنان سپورتشىلارعا قوسىمشا ءىس-ساپار شىعىنىنا قارجى ءبولىندى. بۇل ولاردىڭ ۇيالى بايلانىستى پايدالانىپ، ەركىن سويلەسۋلەرى ءۇشىن جاسالدى. وعان دەمەۋشىلەردىڭ ەسەبىنەن شامامەن 30 ميلليون تەڭگە ءبولىندى»، - دەدى ول.

ونىڭ ايتۋىنشا، وليمپياداعا باراتىن قازاقستاندىق دەلەگاتسيالار ەكى ادامدىق نومىرگە ورنالاساتىن بولادى. سونىمەن قاتار ول وليمپياداعا رەسمي دەلەگاتسيا قاتارىندا ۇكىمەت مۇشەلەرىنەن كىمدەردىڭ باراتىندىعىن دا ايتتى.

«بىزدە مامين (اسقار مامين - ق ر پرەمەر-ءمينيسترىنىڭ ءبىرىنشى ورىنباسارى - اۆت.) ۇلتتىق وليمپيادا كوميتەتىنىڭ ۆيتسە-پرەزيدەنتى، قىسقى وليمپيادا تۇرلەرىنە جاۋاپ بەرەدى. ەگەر ونىڭ جۇمىس كەستەسىندە مۇمكىنشىلىك بولىپ جاتسا، وندا بارىپ قالار. مۇنان باسقا مادەنيەت جانە سپورت ءمينيسترى مەن ۆيتسە-مينيستر، ۇلتتىق وليمپيادا كوميتەتىنىڭ پرەزيدەنتى بارادى»، - دەدى ءابىلعازين.

باس حاتشىنىڭ سوزىنە قاراعاندا، وليمپياداداعى قازاقستان تارابىنان 46 سپورتشى، 30 جاتتىقتىرۋشى، كەشەندى-عىلىمي توپتىڭ 10 مامانى بارادى. جالپى دەلەگاتسيا قۇرامىندا 138 ادام بار، ونىڭ 15 ءى جۋرناليستەر. دانيار ءابىلعازين سپورتشىلارىمىزدىڭ دوپينگ قولدانۋىنا جول بەرمەۋ باعىتىندا دا ناقتى جۇمىستاردىڭ جۇرگىزىلگەندىگىن ايتتى.

«ۇلتتىق وليمپيادا كوميتەتى مادەنيەت جانە سپورت مينيسترلىگىمەن بىرلەسىپ، دوپينگ پايدالانۋ فاكتىلەرىنە جول بەرمەۋ شارالارىن قابىلدادى. ءبىزدىڭ وليمپيادالىق كوماندانىڭ بارلىق الەۋەتتى كانديداتتارى بىرنەشە مارتە دوپينگ سىناعىنان ءوتتى. ءاربىر سپورتشىدان سوڭعى سىناما وسى جىلدىڭ قاڭتار ايىنىڭ باسىندا الىنىپ، درەزدەندەگى دوپينگكە قارسى كوميتەتكە جىبەرىلدى»، - دەدى كوميتەتتىڭ باس حاتشىسى.

اۆتور: مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى