قازاقستان مەن قىتاي اراسىنداعى جۇك اينالىمى 2018 - جىلعا قاراي 24 ميلليون تونناعا جەتەدى - ءا. يسەكەشيەۆ

 «قىتايمەن اراداعى تەمىرجول قاتىناسىن مىڭ شاقىرىمعا دەيىن قىسقارتۋعا قول جەتكىزىلدى، سونىڭ ناتيجەسىندە 2018 - جىلعا قاراي ەكى ەل اراسىنداعى جۇك تاسىمالىن 24 ميلليون تونناعا دەيىن جەتكىزىپ، ودان ءارى 30 ميلليوندىق مەجەگە جەتۋدى جوسپارلاپ وتىرمىز»، - دەدى ول بۇگىن استاناداعى «نازاربايەۆ ورتالىعىندا» ءوتىپ جاتقان «ەۋرازيالىق ترانسپورتتىق ينتەگراتسيا. ەنەرگەتيكا شەڭبەرىنەن تىس - جاڭا الەم ءۇشىن جاڭا ىنتىماقتاستىق: گەوساياسي تاۋەكەلدەر، بيزنەس مۇمكىندىكتەر مەن بولاشاق دامۋ باعىتتارى اراسىندا» تاقىرىبىنداعى حالىقارالىق كونفەرەنتسيادا.

 ءمينيستردىڭ ايتۋىنشا، ق ح ر- مەن جۇك اينالىمىن كوبەيتۋ ەلىمىزدە جۋىق ارادا ەنگىزۋدى جوسپارلاپ وتىرعان ەلەكتروندى دەكلاراتسيالاۋ ۇدەرىسىن جەدەلدەتۋگە كومەگىن تيگىزەدى.

 «ءبىرىنشى بەسجىلدىق اياسىندا ءبىزدىڭ الدىمىزعا كولىكتىك- لوگيستيكالىق كەدەرگىلەردى جويۋ تاپسىرماسى قويىلعان بولاتىن. ەندىگى كەزەكتە جۇكتەردىڭ كەدەننەن كەدەرگىسىز ءارى جىلدام وتۋىنە جول اشاتىن ەلەكتروندى دەكلاراتسيالاۋ ماسەلەسىن قاراستىرۋدامىز»، - دەپ اتاپ ءوتتى مينيستر.

 سونىمەن قاتار، كونفەرەنتسيا بارىسىندا ءا. يسەكەشيەۆ «باتىس ەۋروپا- باتىس قىتاي» جوباسى تۋرالى دا ايتا كەتتى.

 «سوڭعى 5 جىلدا كوپتەگەن جوبالار ىسكە اسىرىلدى، مەملەكەتتەن قىرۋار قاراجات ءبولىندى. جوبا اياسىندا ەل اۋماعىندا 1700 شاقىرىمدىق جول سالىندى، قازىر 4 وبلىستا جول سالۋ جۇمىستارى قارقىندى ءجۇرىپ جاتىر، ولار 2017 - جىلى تولىق اياقتالادى» ، - دەدى ول.

ايتا كەتەيىك، «باتىس ەۋروپا- باتىس قىتاي» حالىقارالىق اۆتوماگيسترالىنىڭ جالپى ۇزىندىعى 8500 ك م، ونىڭ 2700 شاقىرىمى قازاقستان جەرىنەن، 2200 - رەسەي، 3500  شاقىرىمى قىتاي جەرلەرىنەن وتەدى.

اۆتور: ءابۋ- اسقار مەكەش ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى