ەڭ باي ادامداردىڭ ءبىرى بيلل گەيتس 2017 -جىلى قانداي كىتاپتار وقىعان؟
بۇل تىزىمگە ەكى پۋليتتسەر پرەمياسى يەگەرى مەن ۆەتنام تۋرالى روماندار ەندى. «كىتاپ وقۋ - مەنىڭ ويىمداعى ەلگەزەكتىكتى ارتتىرۋدىڭ ءبىر امالى. ومىرىمدە قىزىقتى ادامدارمەن كوپ جولىعىپ، ءتۇرلى شارالارعا ءجيى باراتىنىما قاراماستان، مەن ءۇشىن كەز- كەلگەن تاقىرىپتى زەردەلەۋدە كىتاپتىڭ ورنىن ەشتەڭە باسا المايدى» ، - دەيدى بيلل گەيتس ءوزىنىڭ Gates Notes بلوگىندا.
بيلل گەيتس ۇسىنعان ءبىرىنشى كىتاپ مەتتيۋ دەسموندتىڭ «قونىستان قۋىلعاندار: امەريكالىق قالاداعى كەدەيلىك پەن بايلىق» تۋىندىسى. امەريكالىق سوتسيولوگ بۇل تۋىندىدا امەريكالىق كەدەي وتباسىلارى مەن باسپانا جالعا بەرۋشىلەر اراسىنداعى قارىم- قاتىناستى سيپاتتاعان. كىرىسىنىڭ كوپ بولىگىن ءومىر سۇرۋگە جارامسىز باسپانالارعا تولەۋ ارقىلى كۇن كەشىپ جاتقان وتباسىلار تاعدىرىنان سىر شەرتەتىن كىتاپ بيىل پۋليتتسەر پرەمياسىن الدى. بيلل گەيتستى ءتانتى ەتكەن تاعى ءبىر عالىم - ۆاتسلاۆ سميل. ميللياردەر ونى ءوزىنىڭ سۇيىكتى اۆتورلارىنىڭ ءبىرى ەكەنىن اتاپ ءوتتى. ۆاتسلاۆ ءسميلدىڭ «ەنەرگيا مەن تسيۆيليزاتسيا: تاريح» تۋىندىسى - ادامداردىڭ ەنەرگياعا دەگەن قاجەتتىلىگى ادامزات تاريحىن قالاي وزگەرتكەنى تۋرالى اڭگىمە. گەيتس بۇل كىتاپتىڭ قابىلداۋعا تىم قيىن ەكەنىن دە ەسكەرتتى. بيلل گەيتس تىزىمىندە ءبىر ەمەس، بىردەن ەكى كىتاپ ۆەتنامعا ارنالعان. ءبىرى - تحي بۋيدىڭ ء«بىزدىڭ قولىمىزدان كەلگەن ەڭ جاقسى دۇنيە» . اۆتور روماندا ءوز اتا- اناسىنىڭ 1987 -جىلى وتانىن تاستاپ كەتكەنى ءسوز بولادى.
ەكىنشى كىتاپ - ۆيەت تان نگۋەننىڭ «قايعىعا ورتاقتاسۋشىلار» اتتى دەبيۋتتىك رومانى. 2015 -جىلى جازىلعان تۋىندىنى The New York Times باسىلىمى بەستسەللەرلەر قاتارىنا قوستى. ال 2016 -جىلى پۋليتتسەر پرەمياسىن الدى. تۋىندى اۆتورى تۋرالى جيۋري: «قوس ەلدىڭ (ۆەتنام مەن ا ق ش) ازاماتى ايتقان ەميگرانتتىق وقيعا» - دەگەن پىكىر ءبىلدىردى. بيلل گەيتس ءتىزىمىن اعىلشىن ستەنداپ ءارتىسى ەددي يززاردتىڭ «ماعان سەن: ماحاببات، ءومىر مەن دجاز بالاپاندارى تۋرالى مەمۋارلار» اتتى اۆتوبيوگرافيالىق رومانى اياقتادى. ءبىراق، گەيتس بۇل كىتاپتى وقىماس بۇرىن، يززارد شىعارماشىلىعىمەن تانىسىپ شىعۋعا كەڭەس بەردى.
Massaget.kz
