بوكس فەدەراتسياسى 2017 -جىلدىڭ ۇزدىكتەرىن انىقتادى - فوتو

ەرلەر اراسىندا «2017-جىلعى ۇزدىك بوكسشى» نوميناتسياسى بويىنشا گامبۋرگتە وتكەن الەم چەمپيوناتىندا «التىن» العان قايرات ەراليەۆ جەڭىمپاز اتاندى. ال ايەلدەر اراسىندا بۇل اتاققا ازيا چەمپيونى مادينا نۇرشايەۆا يە بولدى.

جاس وسپىرىمدەر اراسىنداعى ۇزدىك بوكسشى اتاعىنا جاستار اراسىنداعى الەم چەمپيوناتىندا التىن مەدالدى جەڭىپ العان ارايلىم بەگدىلدا يە بولدى.

ال «بوكستان ەرلەر اراسىنداعى ۇزدىك جاتتىقتىرۋشى» نوميناتسياسىمەن قايرات ەراليەۆتىڭ جەكە جاتتىقتىرۋشىسى ەرلەر اراسىنداعى ۇلتتىق قۇرامانىڭ باس باپكەرى مىرزاعالي ايتجانوۆ ماراپاتتالسا، «ايەلدەر اراسىنداعى بوكستا ۇزدىك جاتتىقتىرۋشى» اتاعىن مادينا نۇرشايەۆانىڭ جاتتىقتىرۋشىسى شاميل سافيۋللين جەڭىپ الدى.

2017-جىلدىڭ ەڭ جاقسى جاتتىقتىرۋشىسى اتاعى جاس وسپىرىمدەر قۇراماسىنىڭ ازيا چەمپيوناتىندا التى التىن مەدال العان قايرات ءساتجانوۆقا بۇيىردى.

قىزدار كومانداسىنىڭ اعا جاتتىقتىرۋشىسى الماس قۋاتبەكوۆ «قىزدار قۇراماسىنىڭ ۇزدىك جاتتىقتىرۋشىسى» اتالىمى بويىنشا ۇزدىك اتاندى.

ۇزدىك تورەشى اتاعىنا ق ب ف تورەشىلىك كوميسسياسىنىڭ ءتوراعاسى ەرمەك سۇيەنىش، ۇزدىك ايماقتىق فەدەراتسيا - اسقار قۇلىبايەۆ اتىنداعى ءتۋرنيردىڭ ۇيىمداستىرۋشىسى اتىراۋ وبلىسىنىڭ فەدەراتسياسى، ال بوكستان قازاقستان فەدەراتسياسىنىڭ ەڭ جاقسى اقپاراتتىق ارىپتەسى رەتىندە sports.kz پورتالى اتاندى.

سونداي-اق، قازاق بوكسىن دامىتۋعا جانە جاس بوكسشىلاردى تاربيەلەۋ ىسىندە ۇلكەن ۇلەس قوسقان اداگەرلەر ۆيكتور گرەبەنيۋك، الەكساندر انيكين، بولات نۇرسەيىتوۆ پەن راحىمجان سىدىقوۆتارعا دا قۇرمەت كورسەتىلدى.

اۆتور:   كۇنسۇلتان وتارباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى